Min Aung Hlaing, Hriamtlaih dohthlennak kan daihter cang lai!!

2008 Phunghrampi He NCA Minthutnak Cu Hrambunh In Ramdaihnak Kan Sersiam Ko-Min Aung Hlaing!!
=================================
2008 phunghrampi he ram pumpi lungtling tein kahdohdaih min thutnak (NCA) cu hrambunh in remdaihnak cu kan sersiam ko, tiah SAC ralhrang lutlai Min Aung Hlaing nih a chim.

Sikpar ni 17 ah a phan mi Miphun teinak hmuh ni lomhpinak ah atubantuk in a chim nak hi a si. Hriamtlaih buainak cu daihter in a dik mi remdaihnak hmuh khawh nakhnga dingah Ramthen, Ramkulh, hmunhma kip in aa pehtlai mi palai pawl cu kan auh hna ii kap hnih in ceihmaitinak kan ngei, ti zongin a chim.

(A chim duhnak cu, “hriamtlaih dohthlennak cu daihter in a dik mi remdaihnak hmuh khawh nakhnga dingah tuanvo ngeitu Palai pawl cu sawm in ceihhmaitinak cu kan ngeih khawh cang caah a dik mi remdaihnak kan ser lai, ti duhnak, Sawm mi ah tlangcung hriamtlai phu cheukhat lawng an itel i ceihmaitinak cu an ngeih khawh taktak cang,A sinain hmailei ah zei a theipar dah an zuun te lai timi cu theih khawh a si rih lo)

Ceihhmaitinak lawngin a tu ton cuahmah mi harnak pawl cu hmaimilh khawh a si lai ii ram punmpi cu a dai, a nuami thancho ter dingah zapi i teltum dihin riantuanti khawh a si lai, tiah ka zumh. (A chim duhnak cu” ‘Ceihmaitinak kan i sawm mi hna cu nan kan cohlan piak ii kan mah he ceihmaiti in tonbiruahnak ngeih khawh lawng ah rampi daihnak cu kan sersiam khawh lai ii kan hmaimilh khawh lai pin a dai, a nuam mi rampi thanchonak cu zapi i teltium in kan sersiam khawh lai, tinak a si.)

Democracy le Federal hrambunh mi Pyidaungsuu ram hlawhtling tein sersiam khawh nak cu mipi vialte hna nih zapi i teltum in
kan fonhtom khawh nakhnga ding zongah timhtuah tein tuanvo kan lak ko, ti zongin a chim chap. (Mipi vialte kan mah lei ah an i fonh khawh nak hnga dingah timhtuah tein tuanvo kan lak ko, ti duhnak).

Lashio Nanpaung Kahdohnak Ah SAC Ralkap 30 Hrawng An Thi, November 15 zinglei ah Shan ramkulh chaklei Lashio peng Nanpaung khua ah SAC ralkap le The Kokang MNDAA kar kahdohnak a chuak i SAC ralkap 30 hrawng an thi, hliamtuar zong an tam tiah MNDAA The Kokang nih November 17 ni ah cathanh an chuah tiah theih a si.

MNDAA The Kokang nih cathanh an chuahning ah aluancia November ni 15 zinglei suimilam 6 hrawngah Nanpaung khua ah umhmun khuarmi SAC ralkap thazaang 70 hrawng cu MNDAA The Kokang hriamtlaiphu hna nih an sakhan ah an va kah hna tiah an langhter.

Cu kahdohnak ah cun tualchung hriamtlaiphu lei nih an kah hmasa hna hleiah hriamngan an hman caah SAC ralkap 13 cu hmakhat te ah an thi i 15 hrawng nih hliam an tuar, cu hnuah SAC ralkap nih raltuknak vanlawng in a rak bawmh hna tiah theih a si.

Kalaymyo Thonginn In Thongtla Minung 27 Nih Luatnak An Hmuh, Ramkhel Lei Thongtla 2 Lawng An I Tel, Sagaing ramṭhen, Kalaymyo thonginn ah nihin November 17, ah thongtla minung 27 nih luatnak an hmuh nain luatnak a hmutu thongtla hna chung ah ramkhel lei thongtla minung 2 lawng an i tel tiah theih a si.

Luatnak a hmutu ramkhel lei thongtla minung 2 cu poh-mah 505(a) in tazacuai le tlaihkhih a tongmi an si i, sianginn cachim saya pakhat le lamzawhnak hmun pawng ah tlaihkhih a rak tongmi pa pakhat an si tiah theih a si. Luatnak a hmutu an dihlak hi pa 24 le nu 3 tiin an dihlak ah minung 27 an si.

SAC ralkap hna nih nihin November 17 zinglei ah Myanmar ramchung huapin thonginn hmunkip ah thongtla mi 6000 tluk hrawng cu November 17, a voi 102 nak National Day ni camtuak a phanh tik ah luatnak kan pek hna lai tiah an rak thanh. Tlaih than an ton a si ah cun a tangmi thong an tlak ding caan zong thongthlak chap an si lai tiah an thanhmi ah an langhter chih.

Watlet Peng Ah Rallam Sialtu SAC Ralkap Bomb Puahhnawh An Tong, 2 An Thi, Sagaing ramṭhen, Watlet peng ah rallam sialtu SAC ralkap hna cu bomb puahhanwh in doh an ton caah ralbawi pakhat telh in SAC ralkap 2 an thi tiah theih a si.

November 17, zinglei suimilam 7:00 hrawng ah Watlet peng Hladaw khua palik sakhan um SAC ralkap hna cu Hladaw dawr pakhat an kal lio ah bomb puahhnawh in doh an ton caah ralbawi pakhat telh in SAC ralkap 2 an thih hi a si.

“A tha a cak ngai mi bomb pakhat puahhnawh in kan doh hna, ralbawi bo 3 pakhat le ralkap pakhat tiin minung 2 an thi, minung 3 nih hliamhma an tuar. Bomb puahhnawh in doh a tongmi SAC ralkap hna nih an pawngkam khua hna cu hriamngan le hriamhme in an kah hna.

Tutan kahdohnak hi October thla chung ah nunnak a liammi Black Wolf PDF chungtel minung 4 hna caah lehrulh cham in kahdohnak kan tuahmi a si” tiah Black Wolf PDF chungtel pakhat nih a chim. SAC ralkap hna cu Black Wolf PDF le tualchung hriamtlai pah-kah-phah, Pinlay Mungdaing(ပင်လယ်မုန်တိုင်း) pah-kah-phah phufonh hna nih an doh hna tiah theih a si.

Myaung Peng Kyauksayit Sakhan In A Chuakmi SAC Ralkap Bomb Puahhnawh An Tong, 4 An Thi, Sagaing ramṭhen, Myaung peng Kyauksayit(ကျောက်ရစ်) sakhan in a chuakmi SAC ralkap hna cu kahdoh an ton caah SAC ralkap 4 an thi tiah 11 Brothers Revolution Forces in Bo Yar Kyaw nih nihin November 17 ah a chim tiah theih a si.

November 14, zinglei suimilam 11:05 ah Myaung peng Kyauksayit(ကျောက်ရစ်) sakhan in thil fir ding ah a chuakmi SAC ralkap hna cu lampi hmun pakhat an phak ah 11 Brothers Revolution Forces ( 11 BRF ) hruainak in tualchung hriamtlai phu fonh hna nih bomb puahhnawh in an doh hna caah SAC ralkap hliamh an tong i minung 4 an thih hi a si. Cu kahdohnak cu 11 Brothers Revolution Forces, Myaung peng TGR, Bo Naytoe pah-kah-phah phufonh hna nih an tuah mi a si tiah theih a si.

Tuluk-Myanmar Ramri Ah Kahdohnak A Chuak I Motor Remhtu Ngakchia Pakhat A Nunnak A Liam, Pakhat Hliamhma A Pu, Tuluk-Myanmar ramri, Muse Cinsankyaw(ကျင်စန်းကျော့) ah SAC ralkap le a ho ti theih lomi hriamtlai phu karah nizan November 16 zaanlei sml 1:30 hrawngah kahdohnak a chuak i, motor remhtu ngakchia pakhat cu hriamngan kuan nih a khen caah a nunnak a liam, pakhat hliamhma a pu, tiah ramri um tualchung mi hna sinin theih a si.

“Motor remhnak dawr a tuahtu pa pakhat sinah motor remh rian a ṭuanmi ngakchia hna le Muse motor remhnak ah rian a ṭuantu ngakchia hna cu midang motor a rawkmi remhpiak dingin an kal, lam tanṭim ah a rawkmi motor an remh cuahmah lioah hriamngan kuan nih a tlak hna caah ngakchia pakhat a nunnak liam hi a si,” tiah tualchung mi pakhat nih a chim.

Ramri ah thil a phurmi pakhat nih, “Hpayarkone(ဘုရားကုန်း) ah kahdohnak a chuak i, hriamngan kuan nih motor a remhtu ngakchia pakhat a khen caah a nunnak a liam, pakhat hliamhma a pu,” tiah a chim. A nunnak a liammi ngakchia pakhat le hliamhma pumi hna hi kum 16 tluk ngakchia an si. Hriamngan kuan nih Tuluk motor pakhat le SAC ralkap motor pakhat a khen ve hna, tiah mithmutu motor khal pakhat nih a chim.

Kahdohnak a chuah lioah Tuluk le Myanmar ramri gate cu an kham hna nain, zaanlei in cun motor lutchuak hna cu an kalter ṭhan hna, tiah tualchung mi hna nih an chim. Cu kahdohnak hmunram cu Pyituhsit, KIA, TNLA, MNDAA, SSPP/SSA hna an cawlcanghnak hmunram a si, tiah tualchung mi hna nih an chim.

Mayangone No. 3 Sang Chung Inn Vialte Cu SAC Ralkap Nih Nithum Chungah An Ṭhialter Dih Hna, Yangon ramṭhen, Mayangone No. 3 sang chung, Kanthar Zeyung lam um inn 100 leng cu mah hmunhma a si lomi hmun ah sakmi a si tiin SAC ralkap, sipin le penguk zung hna nih an kan ti i nithum chungah ṭhial dih dingin nawl an kan pek, tiah sang chung a ummi pakhat nih a chim.

“Mah hmunhma a si lomi hmun ah sakmi inn an si hrimhrim lo. Cheukhat cu innhlang in a ummi zong an um i cheukhat cu an har caah inn a pawnmi zong an um. SAC ralkap nih minsen an kan thutter i zeiruang ah dah kan thut lai tiin kan hal hna zong ah an chim duh lo, a hro tuin a kan hrocer. A hnuah kan mah hmun a si lomi ah sakmi inn a si tiah tialmi catlap cungah minsen a kan thut termi cu an kan hmuhsak,” tiah a chim chap.

Nawl kan chuahmi nan zulh lo ahcun upadi ning in kan in tawlrel hna lai. Nithum chungah nan inn nan ṭheh hna lo ahcun kan hrawh dih lai an kan ti, tiah sang chung a ummi pakhat nih cun a chim. Mingalardone peng, No. 5 sang ah a um mi inn 10,000 tluk zong SAC ralkap nih a cozah hmunram a si tiin sangmi hna cu a tlai bik November 18 hlan ah nan ṭhial dih lai tiah SAC ralkap nih nawl an rak pek cang hna tiah theih a si.

Myanmar Ram In Aa Thawhmi Rohingya 100 Leng Indonesia Rili Ah Tlaih An Tong, Myanmar ram nitlaklei in tilawng in a kalmi Rohingya ngakchia 22, nu 36 le pa 61 cu Indonesia ram an phanh ah Indonesia nawlngeitu hna nih an tlaih hna i Bluka Teubai khuate ah an chiah hna, tiah theih a si.

Indonesia nawlngeitu hna nih, Rohingya miphun hna hi Myanmar ram in a rami an si ṭheu lai, tiah an zumh. A luancia March thla lio zong ah Rohingya 114 cu Aceh ramkulh Bireuen pengkomh pawngah an rak tlaih cang hna. A luancia 2017 August ah Myanmar ralkap nih rallam an ral sial caah Rohingya minung a sing in Bangladesh ram ah an rak zam. Cu ruangah Rohingya mi hna cu Muslim biaknak phung a biami ram hna ah harnak phunzakip tuar in pawcawmnak ruah ah a kalmi an si, tiah theih a si.