Min Aung Hlaing Cu A Mang Siseh Law A Va Duh Hringhran Lai Dah!

ASEAN tonbiaruahnak ah Min Aung Hlaing sawmlo ding kan ceih, tiah ASEAN Palai nih chim
=========
Aralai mi ASEAN tonbiaruahnak ah Min Aung Hlaing sawmlo ding kong nihin ah ASEAN ram Ministers hna nih kan ceih, tiah Brunei Ramdanglei Minister (2) Erawan bin Pehin Yusof nih a chim. “ASEAN he biahrennak 5 kan ngeih mi zong SAC phu nih tuanchuah le tawlrel an i tim lo.

Cun, nawlngeihnak an lakka tein hren mi Daw Aung San Suu Kyi he ton ding nawl kan hal mi zong direct in a kan let fawn lo,” tiah Erawan bin Pehin Yusof nih a chim, tiin BBc nih a tial. Hi kong ah Malaysia Ramdanglei Minister Abdulah zong nih, NUG he tonbiaruahnak ngei ding ah timhcia kan si, tiah a chim ve.

NUG He Biaruah Dingin Timhcia Kan Si Tiah Malaysia Ramleng Vuanci Nih A Chim. Myanmar buainak kongah ASEAN hruaitu hna hnatlaknak 5 kha ralhrangbu nih zulhnak a um lo ahcun Malaysia nih NUG he biaruahnak ngeih dingin timhcia kan si ko tiah Oct 6, tuni ah Malaysia ramleng vuanci nih a chim.

Malaysia ramleng vuanci Saifuddin Abdullah nih cun hlutdaw meeting i biahalmi a lehnak atu bantukin a chimmi a si. Ralhrangbu nih ASEAN hruaitu hna hnatlaknak 5 cu atu tiang a zul lo, mahtining a si ahcun tuthla donghlei ah tuah dingo ASEAN Summit ah ralhrangbu hruaitu sawm awk a tha ti men lai lo tiah ramleng vuanci Saifuddin Abdullah nih cun a chim tiah BBC nih a tial.

Yesagyu ah ralhrangbu rianpek mi khuabawi minung 36 cu phungning in rian an chuak, khuabawi tam deuh cu an tlizaam. Magway ramthen, Yesagyu peng chung sanguktu le khuabawi riantuan mi 89 chungah khuabawi 36 nih phungning in rian chuahnak an tuah. Rian chuah lo in a ummi a dang khuabawi hna cu rian an ngeihnak khua ah um ngam lo in hmundang ah an tlik zaam caah khua uknak le cawlcangh nak ah hma a kal kho ti lo tiah khuachung thawngzamh nak hna nih an langhter.

Magway ramthen, Yesagyu peng chung khuabawi cheukhat cu rian chuah nak le rian ngolnak ca chiah lo in, an umnak le rian an ngeih nak hmun ah um ngam lo in, battalion 256, 257, 258 ralhrang hna sin ah chungkhar le rualchan tiang auh in an zam, cun ralhrang hna sin ah si lo in hmundang ah a tli zaam mi khuabawi an tam caah an rian hma a kal kho ti lo tiah khuami hna sin in theih a si.

Yesagyu khuachung mi Mino pakhat nih “Khuabawi tamdeuh cu rian an chuak ko. Cheukhat cu rianngol le rian chuah a um lo na in rian an ngeihnak hmunah um ngam lo in an tli zaam, cheukhat cu ralhrang sin ah an i fon, ralhrang hna zong cu leng ah an chuak ngam lo, cucu tu lio ton mi a si” tiah a chim.

Yesagyu khuachung ah sang 8 a um, peng chungah khua 89 an um. Cu chungah phungning in khuabawi rian ngolnak a tuahmi hna cu minung 36 an si tiah theih a si. Yesagyu khuachung sangngan 8 in sangbawi dihlak nih rian chuahnak ca an chiah cang tiah Khit Thit Media nih a tial.

Irrawaddy ramthen chung ah hriamnam he minung 30 kan tlaih hna tiah ralhrang nih thawng an thanh. Irrawaddy ramthen chungah chung ah minung 30 hna cu September thla dih lai hrawng ah hriamnam he an tleih hna tiah theih a si. Tlaih a tongmi chungah cheukhat cu khuabawi zung mei khangh mi le USDP party chung tel pakhat thahnak he aa pehtlaimi an si tiah ralhrang nih an thanh.

Nawlngeihnak an lakmi duhlonak laughter ruangah Irrawaddy ramthen chung ah ralhrang an tlaih mi hna chung in tutam September thla i an tlaihmi hna hi a tam bik an si tiah BBC nih a tial.

KNU Brigade (4) pawngkam ah ralhrang mi sawhsawh thilthuam he security an tuan. KNU Brigade (4) ukmi hmunhma chung khuate le a pawngkam khua cheukhat hna ah ralhrang nih October 5 ni chun ah misawhsawh thilthuam in hmunhma zohnak nak an tuah tiah khuami hna nih an chim.

Covid – 19 ruven nak sii a chun dingmi min cazin lak ding, mipi veng tu ralkap hna le CDM cozah riantuan hna an i thuhnak kawl ding ti kha an i chimter i October 4 zinglei in Pulaw peng, Thar Yar Kone khua hna cu ralhrang thazaang 50 hrawng hmunhma khuar in mipi cheukhat cu an auh hna i bia an hal hna i an kir than.

October 5 chun hrawng ah KNU ukmi hmunhma le pawngkam khua cheukhat hna cu ralhrang hna nih mi sawhsawh thil thuam in an lut, an i chawk an cawlcang i hmunhma zohfel nak hna an tuah tuiah Pulaw khua mi hna nih an chim. September thlachung ah KNU Brigade (4) ukmi hmunhma chungah mipi ngeihmi taangka le thil dang hna cu ralhrang nih hramhram in an lak piak hna tiah KNU Centre nih a thanhmi cu Than Lwin Time nih a tial.

=Yaw ah a phanmi ralhrang motor cu bomb puahhnawh an tong than. Yaw hmunhma chungah a phanmi ralhrang motor 50 leng cu October 5, nizaan zaanlei suimilam 3:30 hrawngah bomb puah in doh an si tiah Yaw mipi vengtu YDF-Gangaw nih cathanh an chuah. Cu ralhrang motor cu bomb lung 14 puahhnawh in doh an si, ralhrang phu motor 5 le Tank pakhat a rawk, ralhrang a thi mi 40 leng an si, hliamhma tuar mi hi minung 30 hrawng an si tiah an cathanh ah an langhter chih.

Ralhrang hna bawmh dingah Monyua lei in ralhrang motor tampi cu Yaw hmunhma ah an ra tiah Yaw mipi vengtu ralkap hna nih an chim. Cu ralhrang motor cu an kal nak lamthluan ah khuakip in mipi vengtu hna nih nitin in an doh hna , October 3 ah Pale peng Wampin khua pawng ah kaphnih kar kahdohnak a chuak tiah Pale PDF nih cathanh an chuah.
Cu kahdohnak ah cun ralhrang phu lei in minung 25 an thi, hliamhma tuar mi zong tampi an um tiah Pale PDF nih an langhter.

Cu kahdohnak kong he pehtlai in Gangaw lei ah kalmi ralhrang bawmtu motor hna cu mipi vengtu phu hna nih an doh hna caah Pale PDF in minung pakhat a nunnak a liam tiah theih a si. October 4 ah Monyua in a thawhmi ralhrang motor cu Pale peng Kyaityin khua nitlak lei ah meter 2000 hlatnak hmun in bombpuahhnawh an ton caah motor pakhat cu hliam in thlalang an kuai nain ralhrang lei hliam tuar an um lo tiah ralhrang phu nih cathanh an chuah.

Yaw hmunhma chungah ralhrang hna nih minung thazaang chap nak le kahdohnak a tam caah Gangaw-Kalay, Gangaw-Thilin motor lampi ah khualtlawn lo ding in Yaw mipi vengtu nih ralrinnak cathanh an chuah.

Oct 5 Ah YDF Nih Ralhrang 40 Renglo An Thah Hna. Oct 5 zanlei 3:30 pm hrawngah Magway remthen Gangaw lei ah a kalmi ralhrang mawtaw 50 renglo hna cu YDF-Gangaw nih bomb 14 in an puahhnawh hna i Tank pakhat, mawtaw dang 5 an rawk.

Ralhrang 40 renglo an thi i 30 leng hliam an tuar, tiah YDF-Gangaw nih an fehter. YDF ralkap hna cu ralhrang nih hriamngan le RPG hna in an kah len ve hna. Asinain YDF lei hliamtuar le a thimi um lo in hnu an tolh kho tiah theih a si.