Ramri Lonh In Myanmar Vanlawng A Zuan Ahcun Minute 5 Chung Ah Kah(thlak) Ding – Thai Defence Minister. Ramri lonh in Thailand ramchung ah Myanmar vanlawng an luh a si ahcun minute 5 chung ah kah ding in Thai runvennak Vuanci Suthin Klangsaeng nih April 11 ah nawl a chuah tiin Thai media Khaosod English nih an langhter.
Thailand thlanglei, Tak pengchung ah ramri lonh in kahdohnak a um caah atu bantuk in nawl an chuah, tiah Myanmar Now nih cun a langhter.
Ramri uknak ah a biapi ngai mi Myawaddy khuapi cu KNU nih an uk cang caah SAC lei nih hin laak ṭhan ding ah vanlei kahdohnak hi an tuah khawh.
Myawaddy um SAC ralkap Khah-Lah-Yah 275 sakhan cu April 11 zing suimilam 4:20 hrawng ah hriamnam tampi he kan laak, tiah KNU nih an thanh i, SAC ralkap zeimawzat cu Thailand lei ah an rak zaam. KNU nih khuapi an laak hnu in Thailand ralkap zeimawzat zong ramri an phan ve. The Chin Post
Thawngpang dang: April 12 – 2009 April 10 in an rak dirh mi Arakan Army (AA) cu 2024 April 10, kum 15 a tlin ni ah Arakan Army ti si ti loin Arakka Army (AA) tiah min an thlen cang.
Minung 26 in an rawk thawk lio ah MNDAA hruaitu U Pheung Kya-sin nih meithal zuun 100 le RPG 2 a rak pek hna tiah AA Commander in Chief Major Twan Mrat Naing Nih U Pheung Kya-sin ruak thlahnak ah a rak chim.
AA nih atu ahcun Rakhine ram ah SAC ralkap he kahdohnak a tuah cuahmah i Rakhine ramchung peng 8 le Paletwa peng zong a tlaih khawh dih cang.
Rakhine mipi hnatlakpinak le thazang peknak tha tein a hmu mi AA nih mipi himnak aa-ma-khan telh in zauk phung lennak aa-ma-khan zong aa zuam cuahmah lio a si tiah AA lei chim phuannak nawl a ngeitu Khine Thukha nih The Irrawaddy Burmese ah a chim.
Atulio AA hmuitinh dirhmun le ramkhel dirhmun kong he pehtlai in AA chimphuannak nawl a ngeitu Khine Thukha kha Tne Irrawaddy Burmese nih biaruahnak a tuah mi a si. Muicawl – The Irrawaddy Burmese. The Chinland Post