Min Aung Hlaing a thluak a dik ti lo a molh taktak cang ko!!

Rampi Cozah Sinah Nan Pek Dingmi Tax Felfai Tein Pe Hna Uh-Min Aung Hlaing
===========================
Ram mipi hna nih rampi cozah sinah nan pek dingmi Tax hna felfai tein pek cio dingin SAC hruaitu Min Aung Hlaing nih a chim tiah theih a si. Tax a pe dingmi hna nih tling tein pek dingah le sipuaizi tuahmi hna nih nan i cawimi leiba cham cio dingin October 3 ni meeting ah a chim tiah theih a si.

Ramchung chuak thilri in citi kan ser lai I ramdang ah kan kuat khawhnak dingah kan i zuam cuahmah lio ti zong meeting ah a chap. SAC hruaitu Min Aung Hlaing cu ramkomh huap meeting ah a lungchuak bia poah a chim lengmang mi a si i kan hnu zongah cozah lutlai hna mah pumrua le khiing rih zaan ai tlak dingin nan um lai tiah nawl a chuahtu a si. Crd-The Chin Post

Hpakan Ah Motorcycle Ai Citmi Mino 2 SAC Ralkap Nih An Kahthah Hna, Kachin ramkulh, Hpakan ah motorcycle ai citmi mino 2 hna cu SAC ralkap nih meithal in an kahthah hnu ah an chungkhar sin ah an ruak pek lo in an khangh tiah pengkulh pyituh hluatdaw palai le tualchung mi hna nih an chim. October 2, zaan suimilam 10:00 hrawngah Hpakan, Myomah sang Kalat dawr kalnak chukṭumnak zawnah cycle aa citmi mino pahnih hna cu SAC ralkap le palik nih thi lak in an kah hna hi a si.

“Thil a can ning tak cu SAC ralkap hi mipi nih kan hmuh paoh ah cun ṭih an nun caah tlik zaam a si, tutan zong ah an ṭihlaunak ruangah dir loin an zaam i cu ah cun kahthah an ton hi a si tiah kan theih” tiin U Aung Hein Min nih a chim. Kahthah a tongmi mino pahnih hna ruak cu SAC ralkap nih chungkhar sin ah pek lo in, hlamtu ngeilo ruak tiin an khanghpiak hna tiah tualchung mi nih an chim.

Mizoram Ramkulh Myanmar Ramri Ah Rupee Sing 640 Jan Bing-rang An Tlaih Mizoram ramkulh, Champhai ah Assam mi pahnih sin in sapiat bawm 100 chung ah rawnmi bing-rang rupee sing 640 man cu palik phu nih nihin October 3 ah an tlaih tiah theih a si.

Cu bing-rang cu Motor hnulei zawn ah ṭha tein an chiahnak hmun ah thuhnawh in an phorh tiah theih a si.
Bing-rang phorh ruang ah tlaih a tongmi pahnih hna cu Champhai palik phu nih 21(c)/ 25/29 rithaisi upadi poh-mah in an sual kawl an si tiah theih a si.

Ye Ah SAC Ralkap Thawngpetu A Umnak Inn Lila Ah Kahthah A Tong, Mon ramkulh, Ye peng Kyunelaung(ကျူံလောင်း) khua hlun ah a ummi SAC ralkap sin thawngpetu U Aung Myint cu kan fimhlawm tiah Mon State Revolutionary Organization (MSRO) nih an thanh. Nihin October 4, zinglei suimilam 9:00 hrawng ah, a umnak inn ah MSRO phu nih meithal voi 15 kah in kan fimhlawm tiah an chim.

“A umnak inn ah kan fimhlawm, a chungkhar cu zeihmanh kan ti hna lo, March thla lio MSRO kah an ton lio ah SAC ralkap sin ah thawngpeknak a tuahtu a si, SAC ralkap sin in sing 25 a ngah tiah kan theih” tiah MSRO phu in ṭuanvo ngeitu nih a chim. Kum 40 tluk hrawng a si mi U Aung Mint cu kah a tonnak hmun ah a thi colh, a ngandamnak a ṭhat lo caah inn ah chae(ချဲ) zuar in a um, cun SAC ralkap sin ah thawngpeknak a tuah tiah theih a si.

Tedim Ah Motorcycle Firtu 2 Tlaih An Tong, Chimhhrinnak An Tuah Hnu Ah An Thlah Than Hna, Chin ramkulh, Tedim ah October 3, zaanlei suimilam 5:00 hrawng ah motorcycle firtu 2 cu Tedim khuami nih an tlaih hna tiah theih a si. Motorcycle firtu 2 hna cu hremnak le tukvelhnak zeihmanh tuahlo in, chimhhrinnak tuah in an cawnpiak hna hnu ah thla an campiak hnu i an thlah ṭhan an si tiah Tedim khuami mino hna nih an chim.

Zaanlei suimilam 2:00 hrawng ah Tedim khuachung Myomah sang um Bethel Biakinn pawnghrawng ah motorcycle firpiak kan tong tiin Tefim mino hruaitu sin ah a chimtu an um caah, Tedim mino hruainak in cu a tlaumi Motorcycle cu an kawl i zaanlei suimilam 5:00 hrawng ah a firtu 2 hna cu tlaih an si tiah theih a si.

“Tutan tlaih a tongmi pahnih hna hi cu ngaihthiam an si, hmailei ah tlaih an ton ṭhan a si ah cun Tedim Myomah sang, Luaibual sang tiin mi an tamnak hmun ah hti ṭem in nihnih chung ni ah kan pho hna lai, hi ti tuah lawng ah hmailei ah mifir an lau lai” tiah Tedim khuami mino hruaitu pakhat nih a chim. A luanciami thla chung hna zong ah Tedim khuachung ah motorcycle hi atu le tu a tlau lengmang tiah tualchung mi nih cun an chim.

SAC Ralkap Nih Monyway Kyaymon (မုံရွေးကြေးမုံရွာ) Khua An Khangh Pinah Tualchungmi 80 Hrawng An Tlaih Hna, Sagaing ramṭhen, Monywa peng, Monyway Kyaymon khua cu SAC ralkap nih an luh hnawh i an khangh, cun tualchungmi 80 hrawng zong an tlaih hna tiah theih a si.

Monyway Kyaymon khua cu nihin October ni 4 zing suimilam 9 hrawngah SAC ralkap thazaang 80 an lut i an khangh pinah ngakchia le nu telh in 80 hrawng cu phungki sianginn pakhat ah an tlaih hna, cun khuachung ah an i chawk i lamkam inn hna a um mi hna cu kan in kah hna lai tiin an hro hna tiah theih a si.

Zing suimilam 5 hrawng ah Monywa-Mandalay lampi ah bomb puahhnawh an tong i a thimi tam ngai dawh an si, khuachung ah an rak lut i an hmuhmi paoh an tlaih hna, an chungkhar ning in an tlaihmi le an sang ning in an tlaihmi zong an um. Innchung um mi zong kan in kah hna lai tiin an hro hna hnu ah an tlaih hna tiah tualchungmi pakhat nih a chim.

Monyway Kyaymon khua hnu lei ah nihin October ni 4 zing suimilam 5 hrawngah SAC ralkap pawl bomb puahhnawh an ton hnu in atu bantuk in khuachung ah luh in an khangh hi a si tiah theih a si.

Monywa-Amyint Lampi Cu Mipi Kal Khawh Lo Ding In SAC Nih An Hrawh, Sagaing ramṭhen Monywa khua Nyaungpinzauk sang thlanglei Monywa-Amyint lampi cu nihin October ni 4 chun suimilam 2 hrawngah SAC ralkap nih vawlei cawhnakseh in an hrawh tiah tualchungmi hna sin in theih a si.

SAC ralkap pawl cu ralkap mawtaw a nganmi pakhat le private mawtaw pakhat in thazaang 30 hrawng an ra i vawlei cawhnakseh in an hrawh tiah tualchungmi pakhat nih a chim. Monywa-Amyint lampi cu Monywa le Chaung U peng pehtlaihnak ah a bik in hman mi a si. A tubantuk in an hrawh caah mawtaw zong kal ngah ti lo tiah theih a si. Crd-The Chin Post