Martyr Day Kum 76 Tlin Camtuak Ah Aung San Oo Le SAC Aiawhtu Cheukhat Lawng An Kai!
=========
Nihin July 19 Martyr’s Day kum 76 tlin camtuak cu Yangon khuapi Martyr thlanhmun ah SAC nih an tuah i Bogyoke Aung San fanu Aung San Suu Kyi cu kai kho loin Bogyoke Aung San fapa Aung San Oo a kai, tiah theih a si.
Naypyidaw ah inn hrenhkhumh in hrenmi Aung San Suu Kyi cu Martyr’s Day camtuak a hman khawh lonak kum 3 a si cang. Hlan lio ralkap uknak chan ah Suu Kyi cu Yangon ah hrenh khumh in hren a rak si ṭhiam ko nain Martyr’s Day camtuak cheukhat cu an rak hmanter tawn.
Nihin July 19 Martyr’s Day ah hin Deputy Prime Minister le Minister of Transport and Communications General Tin Aung San lawng an kai hmuh a si. Tu kum Martyr’s Day camtuak hmannak ah SAC aiawh in a kaimi hna hi SAC hruaitu luzik hna si loin an kuttang rank a niammi lawngte an si, tiah ramkhel tuaktantu hna nih an chim.
Martyr’s Day Sullam : 1947 July 19 zing suimilam 10:37 ah Galon U Saw nih a kuttang ralkap hna cu uniform tling le meithal in Bogyoke Aung San le ram huaitu 8 cu meeting an tuah lioah a rak thahter hna ca ah nihin July 19 cu Martyr’s Day tiah ti a si. Ramkomh kawlram(Union Of Burma) chung zung vialte khar ni a si fawn.
India-Myanmar Ramri Ah I Thahnawnnak A Chuak! India-Myanmar ramri Chin ramkulh chung, Rihkhuadar ah nizaan July 18, chunhnu ah khan pa pakhat cu nu pakhat nih thi lak in a tuk, tiah tualchung mi nih an chim.
Falam peng, Rihkhuadar no.2 sang ummi Pu Pau Khaw Zaam(kum 55) cu nu Lalrinmuan(Kum 33) nih a lu ah thir in a tuk i India lei Zokhawthar, Mercy sii-khan ah a hliamhma an thlop lio ah a nunnak a liam, tiah tualchung mi pakhat nih a chim.
Lainawngtu ah puh mi Lalrinmuan cu ralzam dirhmun in Champhai, Bethel veng ah khuasa mi a si i, India le Myanmar phaisa a thleng tawn mi a si, tiah an chim. Lalrinmuan cu nizan July 18 ah khan Rihkhuadar ah phaisa thleng ding in a kal i, nizan chunhnu suimilam 2:30 hrawng Pu Pau Khaw Zaam he phaisa kong ah an i tong, tiah theih a si.
Pu Pau Khaw Zaam le Lalrinmuan hna hi an pahnih karah phaisa kong buainak a um ruangah hi bantuk thil a can hi a si, tiah Rihkhuadar ummi nih an chim. Lalrinmuan cu mipi kut a tuar hlan ah Chin ralkap nih an tlaih i, atu bantuk thil a cannak ah aa teltum ve mi hna zong an hlathlai cuahmah lio, tiah theih a si.
Myanmar Ram Pumpi In Ni Khat Chung Kahdohnak Ah SAC Ralkap 165 An Thi. Myanmar ram pumpi in nizaan July 18 ni khat chung kahdohnak ah SAC ralkap 165 an thi, tiah theih a si. Ni khat chung i SAC ralkap a thi mi cazin langhtermi hi tualchung hriamtlai phu hna nih an langhtermi le an chimmi cazin khomhsuat in kan langhter tiah Khit Thit Media nih a ṭial.
2023, July 18 ni khat chungah Magway ramṭhen in SAC ralkap 88, Karen ramkulh ah 51, Chin ramkulh ah 11, Sagaing ramṭhen ah 10, Mon ramkulh ah 3, Bago ramṭhen ah 1 le Shan ramkulh ah 1, an dihlak ralkap 165 an thi, tiah theih a si.
Tualchung hriamtlai phu lei in Magway ramṭhen ah PDF 5, Chin ramkulh ah Chin ralkap 3 le Sagaing ramṭhen ah 1, an dihlak 9 an thi ve. Chin ramkulh Hakha ah SAC ralkap pakhat cu a hriamnam he CDF Hakha sin ah aa pe, tiah theih a si. Credit: The Chin Post