Sagaing Peng, Padu Khua Um Palik Sakhan Cu PDF Nih An Laak, SAC Lei In Ralkap 10 An Thi
===============
Sagaing peng, Padu palik sakhan cu PDF nih May 22 zinglei suimilam 8:00 hrawng in an kah i an laak khawh. SAC lei in ralkap 10 an thi, tiah People Servant Force in ṭuanvo ngeitu nih a chim.
SAC ralkap nih umhmun an khuarnak Padu khua um palik sakhan cu May 22 zinglei suimilam 8:00 hrawng in PDF nih an kah i suimilam 9:30 hrawng ah an laak khawh, tiah theih a si.
Palik sakhan chung um thongtla hna an chiahnak khan zong PDF nih an laak i, cu lio ah Mi 17 Helicopter nih Khah Lah Yah 42 in SAC ralkap pawl cu zanlei suimilam 5:28 hrawng ah an hawile bawm dingin a chiah hna. Palik sakhan chung um thongtla chiahnak khan cu PDF nih mei in an khangh, tiah theih a si.
Kahdohnak ah cun People Servant Force in Letyung Column, Knight Commander Force le Pah Kah Phah hna i bawm in kan kah hna i, ṭangṭi phu lei in ralkap pakhat hliamhma a pu, tiah People Servant Force in ṭuanvo ngeitu nih a chim.
Pazigyi Khua Ralhrial mi Hna Cu Eidin, Phaisa Le Thilri Bawmhnak Pek An Si; Kanbalu peng, Pazigyi khua ralhrialmi hna cu nihin May 23 ah S&C mei ral bawmchantu hna nih eidin, phaisa le thilri an bawmh hna, tiah theih a si. SAC ralkap nih bomb an thlak ruangah nunnak a liammi Pazigyi khuami 157 hna nih an tantaakmi chungkhar hna cu minung pakhat ah Kyats 30,000 cio an pek hna, tiah theih a si.
Cupinah khuami ralhrial hna cu facang tun 50, chiti cuai 225, cite cuai 250, hruk-aih hnipuan, ruahkham muka 5, sii-ai phun 100, nga chiahnak kuang 1,200, khohsuai ro tom 720, coffee tom 2, hangthlum thawl 600, muṭhai bawm ngan 10, changreu thuk 7 le nu hmanmi thilri tun 1(phaisa fang in kyats sing 220 man hrawng) an bawmh hna, tiah theih a si.
Thlichia A Tuarmi Rakhine Mi Hna Ca Ah Shan State Progress Party(SSPP) Nih Kyats Sing 1,000 Bawmhnak Pek; Mocha thlichia ruangah harnak a tongmi Rakhine rammi hna cu Shan State Progress Party(SSPP)/ Shan State Army(SSA) nih kyats sing 1,000 Arakan Army(AA) sinah bawmhnak kan pek, tiah SSPP nih May 22 ah an thanh. Mocha thlichia nih Rakhine ram cu faak tuk in a den i a rawkralmi a tam caah bawmhchanhnak rianhma a kal khawh nakhnga bawmhnak kan pek hna hi a si, tiah an langhter.
Thilchia a tuarmi Rakhine ram bawmhnak ah Ta’ang National Liberation Army(TNLA) nih kyats sing 500, NUG nih kyats sing 1,000, KIO nih kyats sing 3,000 le Myanmar National Democratic Alliance Army(MNDAA) nih kyats sing 1,000 cu AA sinah an pek cang, tiah theih a si.
Rakhine ramkulh chung, Sittwe, Punakyun, Kyaukdaw, Myo oo, Minpyia, Maypone, Pauktaw, Yathetaung, Buthitaung le Maungtaw peng cu thlichia nih faak ngai in a den caah inn rawkral a tam pinah minung nunnak a liam zong an tam, tiah theih a si.
SAC Nih An Chuahmi Cement Cu PDF Sinah Ngunkhuai Pek In Phorh A Si! Magway ramṭhen, Yesagyo peng, Yelaykyun hmunram Ayeyarwaddy tiva in SAC chuahmi mirang vawlei(cement) cu tilawng in phorh a si i, a phortu hna nih PDF sinah ngunkhuai an pek, tiah Bright Star Group Defense Force in ṭuanvo ngeitu nih a chim. SAC phaisa luhnak hram a si mi le SAC serchuahmi cement cu Min Thu Aung le Yebayingyi tilawng nih an phorh i, PDF sinah ngunkhuai an peknak catlap kan hmuh, tiah Bright Star Group Defense Force nih an thanh.
PDF hruaitu hna nih phaisa mit zoh in ngunkhuai an khawlhmi catlap ah phaisa kyats sing 29 le sing 20 catlap kan hmuh i, kan lung a ṭha hrim lo, tiah Bright Star Group Defense Force in ṭuanvo ngeitu nih cun a chim. Pakokku peng mizapi ukhruainak phu nih SAC chuahmi thilri phun 19 hna cu cawk le zuarnak nan tuah hrimhrim lai lo tiah cathanh an chuah nain nawl a zul lo mi an um tawn tiah tualchung mi hna nih an chim. Credite; The Chin Post