Mim Aung Hlaing chungkhar le ralbawi tthalo dang chungkhar vialte

Atutan Kawlram CDM, sandahpiah cu a ropui in lung a hmui ko. 88 lio he cun a dang tuk. Social media a ttha tuk cang i minung zong kan ral a ttha deuh cang. Minung pakhat a nunnak a liam zongah ttha tein minute pa 2/3 ah vawlei cung pumpi nih theih dih colh a si. A kaptu tiang theih colh a si. Social media nih thil a ti khawh ning hi mu. Atutan Kawlram pumpi cawlcanghnak cu a phun2 in a si i mahtluk CDM le sandahpiah ropui hi a um ti men lai lo. Muidawh le minthang zong an i tel viar. Noble laksawng le Guinness World Records laksawng pek phu an si cang. Zung kip le minung kip in i tel cio a si. A biapi bikmi ngol loin piah peng ding hi a si ko. Kan i hnek a hau. Kan lung a dongh lo a hau. Sifah le rawlttam zong kan tuar a hau ko lai. Teinak kan hmuh hlan lo sandah kan piah a hau. A thla a kum in a rau khomi a si. Kan i ngol ahcun a zungzal a kum khua in ralkap butkedanh tangah um a hau ko lai. Ralkap uknak doh ruangah sifah tuar cu an kuttang i zungzal umnak in duhdeuh ding/i thim deuh ding a si.

Ralkap bawi lawng maw anaa ting a thiam/uknak lak a thiam. Myint Aung Hlaing nih Suh Kyi le NLD cozah kut in uknak an lak. Ralkap nih uknak voithum an lak cang. Anmah lawng maw uknak lak (anaa ting) a thiam lai. Mipi zongnih anaa ting (uknak lak) an thiam ve timi hi atutan ahhin theihter ve hna ding an si. Atutan cu mipi nih MAH kut in a rauh hlan ah anaa (uknak) kan lak a hau/kan lak hrimhrim lai. Cu anaa kan lak khawhnak ding caah cun “kan i ngol lo” kha a biapi bikmi cu a si ko. Lungsau a hau.

Mipi nih ralkap kut in uknak kan lak ve tik ahcun atu i ralkap tthalo le palik tthalo le mirum tthalo vialte khi an rian in kan phuah dih hna lai i midang a felmi te kan lak hna lai. Than Shwe chungkhar, Thein Sein chungkhar, Shwe Mann chungkhar, Myint Aung Hlaing chungkhar le ralbawi tthalo dang chungkhar vialte, ralkap tthalo le palik tthalo vialte, anmah ttanhtu vialte le mirum tthalo vialte umnak caah khuathar kan thlak lai/kan samh lai i mah khuathar ahcun kan chiah dih hna lai. Cycle le cawleng hmannak nawl lawnglawng kan pek hna lai. Electric mei kan pe hna lai lo. Internet zong kan pe hna lai lo. Bank zong kan serpiak hna lai lo. TV line zong kan pe hna lai lo. Motor le tlanglawng le vanlawng kan luhter lai lo. Mah khuathar cun nan chuak kho lo kan ti hna lai. Khual nan tlawng kho lo kan ti hna lai. Anmah ei awk a zuarhtu ding le a petu hna dingah Rohingya muslim pawl kan fial hna lai. An khua min ah “Misual Khua” ti a si lai.

Kawlram, Bawipa Pathian nih a rauh hlanah ralkap uknak tthalo kut in in luatter hram ko seh. Abraham Pathian, Isak Pathian le Jacob Pathian nih Federal democracy uknak in pe zau ko seh. Daw Aung San Suh Kyi, President U Win Myint, le tlaihmi dang vialte a rauh hlanah Pathian nih luatnak pe hram ko hna seh. CDM sandahpiahnak vialte Bawipa nih hlawhtlingnak in pe hram ko hna seh. Yahweh God will surely save Myanmar from dictatorship soon. God bless Myanmar abundantly!Credit: Saya Van Tum