Midang ruah piak zia a thiam lomi le hngalh piak zia a thiam lomi hi vawleicung ah mi vanchia bik an si Dr. Ephictetus (Greek Philosopher)

Midang ruah piak zia a thiam lomi le hngalh piak zia a thiam lomi hi vawleicung ah mi vanchia bik an si Dr. Ephictetus (Greek Philosopher)
*******************
Minung kan nunnak ahhin pakhat le pakhat ruah piak zia thiam le i thiehthiam hi a biapi tukmi a si. Mi dang ruahnak theihthiam piak le pawm piak khawh hi pumpak lungthin damnak a si pin ah, kan khrihfabu, kan community le kan miphun damnak zong a si.mNain Laimi (Chinmi) tampi cu hika zawn te ahhin kan chambau ngai tiah ka ruah. Khrihfabu cawlcangnak ah siseh, community cawlcanghnak le miphun kong khuakhan lairelnak ah keimah ruahning, keimah duhning le keimah tining in thil si dih seh ti kan duh tawn.

Nihin ah Laimi (Chinmi) buu kan dirhnak ah buaibainak tampi a um tawn ticu zapi theih a si. Hi vialte hi zeiruang ah dah a si? Keimah timi lungput kan ngeih ruang ah a si bik ko. Keimah ruahning, duhning le chim ningin si dih seh timi lungput ruangah kan buai tawnnak a si.mCu bantuk lungput cu, 2020 US le Myanmar ram thimnak (election) ah a lang khun. US thimnak kong kan chim ahcun; Trump ttanhtu pawl nih Biden ttanhtu pawl cu, mi piangthar lo, Pathian thei lo, khrihfa deu le hell tla ding phun in kan hei ruah hna. Khat leiin Biden ttanhtu pawl nih Trump ttanhtu pawl cu, khua ruat kho lo, cathiam lo, politics kong ze hngal lo bantukin kan hei ruah ve hoi hna.

Cu long hlah, Kawlram thimnak ah; NLD ttanhtu pawl cu miphun daw lo, miphun dang a uar ngaimi le miphun zuartu bantuk ah kan ruah hna. Khat leiin CNLD ttanhtu pawl zong, ram pumpi huap in khua ruat kho lo, mah tappi le lungthu tiang long khua ruat bantuk ah kan hei ruat ve hna.,A tawinak in kan chim ahcun, Trump ttanhtu pawl caah cun, Biden ttanhtu pawl cu zei theih lo minung ah ruah an si bantukin, Biden ttanhtu pawl zong, Trump ttanhtu ca ahcun hell tla ding minung ah ruah a si ve. Cun NLD ttanh tu pawl cu, miphun zuar tu ah ruah lio ah, CNLD ttanh tu pawl cu, ram pumpi huap in khuaruat kho lo ah ruah an si ve.

Kan duhmi le kan ttanhmi aa khat lo tikah bia chiakha hmang in comment pek kan hmang rih fawn. Cu bantuk minung cu ral zoh in kan hei zoh rih hoi hna. Kan duhmi le kan ruahnak aa dang lengluang ko lai. Biaruahnak le meeting tibantuk ah bia-alnak zong kan ngei men ko lai. Nain pumpak i huat ding le i ral ding hrimhrim a si lo. Cu bantuk cu fimthiamnak a ngei lomi le a puitling rih lomi ruahnak le nunning a si. Hi a cunglei thil sining vialte hi Trump le Biden, NLD le CNLD nakin kanmah pumpak cio dirhmun le ruahning tu nih lai a rak rel deuh.

Hi vialte thil sining hi a hram taktak cu midang ruah piak zia kan thiam lo caah a si ko. Hiti midang ruah piak zia kan thiam lo caah khrihfabuu, community le miphun kong khuakhan lairelnak ah kan buai tawnnak a si. Keimah ruahning long in siseh, keimah ka chimmi le ka ruahmi hi a dik bik le a hman bik a si timi ruahnak kan ngeih caah kan buai tawnnak hi a si bik. A poi tuk rih mi cu, kanmah chimning le duhning in thil a kal lo ahcun nuar kan hmang fawn. Kei kaa tel ti lai lo, kei cu ka huam ti lo, ruahnak zong ka chuah ti lai lo, thazang zong ka chuah ti lai lo, khuakhan lairelnak zong ah kaa tel ti lai lo tiah a phunphun in kan phunzai tawn. Cu tikah khrihfabuu, community le miphun kan buaiter dih tawn.

Cu tikah buu chungah buaibainak le tthencheunak a chuak tawn. Hi vialte hi a taktak le a ngaingai ti ahcun midang ruah piak zia kan thiam lo ruangah a si ko. Keimah caah a thaw bikmi voksa cu pakhat pa caah cun ei lo sa a si timi kan philh, Pakhat pa caah a thaw bikmi ngasa cu pakhat nu caah ei lo sa a rak si ve timi kan tuak ti lo. Kanmah caah a thaw bikmi voksa kha Chinmi dihlak duhter le eiter kan timh hna. Mi dang an duhmi le an eimi a si le si lo kan tuak piak ti hna lo.

Cun Trump, Biden, NLD le CNLD tiah a phunphun le a dangdang in kan ttanh cio men ko hna lai. Voksa, arsa, ngasa le cawsa kan duhning aa khat lo bantukin Trump ttanhtu kan um lai i, Biden ttanhtu zong kan um ve lai, cun NLD ttanhtu kan um lai i, CNLD ttanhtu zong kan um fawn lai. Cuti Biden ttanh ruang le Trump ttanh ruangah kan piangthar le piangthar lo deuh tinak a si hrimhrim lo. Cun NLD ttanh ruangah miphun zuar kan si lo bantukin CNLD ttanh ruangah miphun a daw khunmi kan si ve fawn lo.

Chinmi cu zumtu longte kan si. Kan zumhnak zeitluk dah si timi le hell kal ding zumhnak maw si, vanram kai ding zumhnak dah timi tucu nangmah le keimah nih tah ding le biaceih ding si lo. Pumpak pakhat cio i kan donghnak ni ah le biaceihnak ni ah kan Pathian nih bia a kan ceih te ko lai.

Biden ttanhtu chin pa zong zumtu, Trump ttanhtu chin pa zong zumtu tthiam, NLD ttanhtu chin pa zong miphun dawtu, CNLD ttanhtu chin pa zong miphun dawtu tthiam. Kan dihlak in miphun kan dawt dih. Kan dihlak in zumtu kan si dih. CNLD ttanh ruangah miphun a daw hleimi kan si lo bantukin Trump ttanh ruangah a piangthar hlei kan si fawn lo. NLD kan ttanh ruangah miphun zuartu kan si lo bantukin Biden ttanh ruangah hell tla ding kan si ve fawn lo.

Cucaah cun minung pakhat le pakhat ruah piak zia i thiam hna u sih. Mi dang ruahnak zong cohlan piak zia thiam hna u sih. Kanmah ruahnak long a dik bik le a hman bik ah chia hna hlah u sih. Kanmah ruahning in mi dang nih an ruah ve lo tik ah nuar fawn hna hlah u sih. Mi dang ruahpiak zia le theihthiam piak zia kan thiam lo ahcun Greek mifim pa Dr. Ephictetus nih a chim bantukin vawleicung ah mi vanchia bik kan si ko lai. Mi vanchia bik si cu duh hna hlah u sih. Salai Biak Tum Lian