Maw! Hakha nangmah hi maw ka mang ah kan hmuh mi cu na si!

‘Relve Hrim Na Caah A Sunglawi Tuk Ve Ko Lai’
===========
Lairam Missionary a phan hmasa bik mi Rev. Authur Carson Bawipa le Dr. E.H East Hakha khua ah an i Tawnnak le Rev. Arthur Carson Thlan ah (1988).

Dr. E.H East cu Kawlram Laitlang Hakha khua i Pathian rianțuan ding kha aa tim, Boston USA in Dec.11st 1901 in aa thawh i Kawlram kha January 1902 ah a phan. Dated 22nd March 1902 ah Hakha cu a phan, Rev. Carson nih lampi in a rak don kha khanhnih khanthum tluk a hlatnak in a van hmuh, ” Khi khi amah cu a si țheu țheu lai, Carson Bawipa cu a si hrimhrim ko lai,” tiah a ti.

Kan hun i naih deuh deuh i ka luchin kha ka hei hler hnawh i anih zong nih a luchin cu a hun ka hler hnawh ve i a mit thli hai dulmal bu in, ” Na rat cu kaa lawm ko,” tiah a ti. Ka rang cun ka vung țum i pakhat le pakhat kan kut kan i tlai. Bia tampi a chim lo a ka chimh mi cu lungthleng an um rih lo ti kha a si i cucu a sullam hmanh ka rak hngal tuk lo. Cu ti cun Hakha cu ka phan i, nangmah hi maw Hakha cu na si?

Dec.11 st 1901 ni kaa thawh i nihin March 22 ni ahhin kan phak. Nangmah hi ka Mang i kan manh mi khua na si i na ca i țhathnemnak ngeih ding hi ka saduhthah a si. Maw Hakha khua na sin i ka rat hi, sui hmuh duh ah ka ra lo, sihmanhselaw ka Bawipa suiluchin cung i benh awkah Lungvar hmuh awk ah ka ra a ti.

Rev. Dr. David Van Bik nih a rak țial mi Cauk Laimi caah Deirel Arfi, p.8; Hi kong ka chim tik paoh ah hin ka lung a ka suk tuk i ka mit thli a luang Zungzal ko. Laimi phun hi zeimiphun ko dah kan si i Siangbawi Dr. E.H East nih a mang ah kan Khualipi Hakha cu a hmuh hnga?

Maw! Hakha nangmah hi maw ka mang ah kan hmuh mi cu na si, atu kan hmuh taktak cang i kan na sinah ka phan taktak cang tiin mit thli hai dulmal pi in a chim. Na sin i ka rat hi Sui hmuh duh ah a si lo, ka Bawipa Suiluchin cung i benh awkah Lungvar hmuh awkah ka ra tiah a ti.

Laimiphun cu thuh mi Suilungvar cu kan rak si hrimhrim ko ti cu a fiang. Salm 60:7 “Gilead cu keimah ta a si, Manasseh zong keimah ta a si, Efraim cu ka luchin a si i Judah cu ka bawifung a si. “Ka sinah Pathian bia a ra mi cu Laimiphun cu Joseph hrinthlak Ephraim miphun nan si a ka ti. Tlang cung khua tlak mi phenh khawh lo mi bantuk in zei hmanh nih Laimiphun cu an phen kho te hna lai lo a ti,(1986).

Yahshua Messiah cu Israel miphun chungin a tlau mi Tuu hna caah a ra, (Matt.15:24-28) cun mi vialte caah a thih bantuk in Rev. Arthur Carson Bawipa cu Laimiphun kan caah a ra ve i Hakha khualipi cu a lu phumnak a si ve. Falam Khualipi Matu buk chak Far Hual tang i ni thum le zan thum thla ka cam lio ah Thiang thlarau fialnak in Rev. Carson bawipa, Hakha i a thlan ah thlacam in va riak awkah ka tlung i muizan pi hnu ah Hakha Siangbawipa Rev. Arthur Carson thlan cu ka va phan.

An rak hrenh dih caah a Thlan inn chungah riahnak a țhat ti lo ruangah a Lungphun hnulei dithla tangte cu ka phiak i thla ka cam. Zan tim hnu pi ah aw nih Rev. Arthur Carcon Bawipa nan Lairam i a rat hlan ah nan hla cu țial tuah a ka ti i ka țial mi hla a si. Caang nga a si ko nain Tlawmpal te longin ka hun țial lai.

1). Dawt hlei hrinhniang Lairam dawh e, khuakhirh zunglai ai cang, Zunglian uk mang bawi Vialte lo cang lai, cung chin Vanbawi fa dawt hrinhniang biakam phur tu phuntungtu kan chuah ni ah cun. 2). Lai khua zungah buhțilțawt char le maw Ar vai hmanh khi kan tluk ti lo lenpi rual hawi sinah, siseh ho tluklo mang hrin ve Keimah tiin Chalcuaimai law Ephraim Laimi. 3). Theihlo Van hram dengin a ho hngalh lo ram dang Valpa rihzung mual liam ai cang roling khun seh, Zingdir ni bang tlang ve cang lai Bawi min thang ram, Carson lennak kan Lairam ah.

Nawlhnak; An tlau cang e ti tawn hna maw, Babilon sal tang Bu ram vialte nih, kan tlau lo e Voh bik fahniang Laimi kan si, Bawicin cang lai Chanri dongh tiang. Credit; Rabbi Ephraim Lian Rum, Beth Israel CMC, Kalaymyo