Maungtaw Um SAC Ralkap Sakhan Cu AA Nih An Laak. Rakhine ramkulh, Maungtaw khuapi um SAC ralkap Yanaungpin sakhan cu February 23 zinglei ah kan laak, tiah AA nih an thanh. Cu pin ah Maungtaw khuapi um a dang SAC ralkap sakhan pawl zong AA nih an kah cuahmah, tiah theih a si.
Minbya khuapi ah pakhat lawng a taang cang mi SAC ralkap No. 9 ramṭhen raltuk cawnnak sianginn laak ding ah ni ruknak tiang kahdohnak kan tuah i Ponnagyun khuapi Khah Mah Yah 550 zong kan kah, tiah an langhter.
Ponnagyun, Rathedaung, Buthidaung, Maungtaw le Minbya khuapi um hriamnam a chia duh lo mi SAC ralkap sakhan pawl zong laak dih dingin AA nih an nam cuahmah.
SAC ralkap sakhan AA nih an laaknak kong he pehtlai in SAC chimphuannak nawlngeiru Zaw Min Tun cu RFA nih phone in pehtlaihnak an tuah nain a cohlang lo.
AA nih February 22 ah Ponnagyun khuapi sakhan zong an laak i Chinram, Paletwa khuapi telh in Pauktaw, Minbya, Myo Oo, Kyauktaw, Myebon le Taungpyu, a dihlak khuapi 7 an laak cang. The Chin Post
Thawngpang dang: Myingyan Peng Ah PDF Nih Khuabawi Telh In Pyusawhṭhi 7 An Tliah Hna. Mandalay ramṭhen, Myingyan peng ah khuabawi pa1 telh in pyusawhṭhi 7 hna cu tualchunh PDF ṭangṭi phu nih an tlaih hna, tiah Myingyan pengkomh battalion (1) in ṭuanvo ngeitu pakhat nih People’s Spring ah a chim.
February 22, ah Myingyan peng, Myingyan-Taungtha lam lei Paiktekone khua in pyusawhṭhi chungtel khuabawi Moe San le pyusawhṭhi 7 cu motor pakhat in an rak chuah lio ah Myingyan pengkomh no.1, no.2, no.8 Battalion, Mahlaing Pah-Kah-Phah le Sunye Guerrilla Force hna i bawm in an tlaih hna, tiah theih a si.
SAC nih Myingyan pengkomh pyusawhṭhi pawl cu Naypyitaw ah training kai ding in thlah a timh hna lio ah a tu bantuk in PDF ṭangṭi phu hna nih an tlaih hna hi a si, tiah kan theih.
Myingyan pengkomh hi Mandalay ramṭhen chung ah SAC ralhrang a doh kho ngaimi le thazaang a ṭhawngmi hmunram an si caah SAC ralhrang zong nih voi tampi khuami pawl an tlaih hna i an thah cang hna, tiah theih a si. Lungmili Post