Mara kan unaupa thihnak case hi, nihin tiang news le evidence a chuakmi zoh tikah!

Mara kan unaupa thihnak case hi, nihin tiang news le evidence a chuakmi zoh tikah!
==========
Mara kan unaupa thihnak case hi, nihin tiang news le evidence a chuakmi zoh tikah, “international rule of war” ningin, “War Crime” a si.

Miphun le ram a dirhkamhtu kan mino le kan pasal ttha vialte hna nih international phung buar in, “War Crime/ Raldoh sualnak” an tuah dingmi kan siang hna lo. Cucaah, hmailei ahcun, atu bantuk eksiden/ accident a um ti nakhnga lo, kan zuam piak hram u.

Kan dihlak in theih a herhmi cu, tulio kan doh cuahmahmi ral hi, “regime change/ uknak thlen” tiang sawh lawng a si lo. Fidel Castro bantuk in, rammi harnak pek dingin meithal aa tlaihmi kan si lo. Chin miphun, Freedom le liberty hmuh dingin tiang kemhchihmi ralthawh a si.

International phung buar in, war crime a tuahcuahmahmi Mah Ralkap in, Chin miphun kan him lo. An pawng ah um zong kan duh lo. Nu, ngakchia le taar tiang nih kan ttih hna. Mahbantuk dirhmun in a kan vengtu le hnangamnak a kan petu cu, Chin pasal ttha nan si kha, philh hrim hlah u!

Meithal itlaih, nunnak thap in Chin miphun dirhkamhtu vialte hna, Chin miphun he ral/ enemy si ding cun, kan in siang hna lo. Nan man/ value a sang tuk. Miphun nih a sangbik upat pekmi nan si. Chin miphun nih ther le phang in a ttih in ttih dingmi, nan si awk a si lo. Chin, mizapi nih nanmah control area an luh/ an phak tikah, luatnak ram luh bantuk in an feel khawh ding tiang in, Chin mizapi he idaw cikcek in um khawh izuam u.

lunghrinh in nan tlaihmi hna an um ai kun, nan phung a zul lomi zong an um tikah, khrifa kan sinak, civilized society kan sinak dirhmun in, phungning in tawlrel thiam hram ko u. Kan ral pa, mah Ralkap hmanh, nan tlaih hna i, nan kut an phan ahcun, puitling lungput he, dawhte nan tawlrel ahcun, Chin miphun kan hmai a hngal lai.

Zapi lak ahcun, bad apple pakhat hnih an um ko lai. Bad apple ruang ah apple dihlak a thur/ a nam ding a si lo. Bad apple cu lak in a dang tein chiah ding a si ko. Cucaah, tutan kan tonmi thil hi kan zaang a dernak siloin, hmailei kan iralrinnak le thil tawlrel kan thiamnak ah cang hram seh.

Thisen tamtuk a luang cang mi,nunnak tampi thap cang mi Dohthlennak a par pazik kan um lio asi caah CHIN Miphun vialte nih a donghnak tiang kan kut kan i tlai hna lai ti ka zumh ko. A harbik mi caan karlak ah kan um lio si bantukin ralsa lak ah i tukdoh cuahmah lio asi caah a hleihluat in kut thlak le thihnak fahnak i pek sual zong a um ko hnga, zeikhomh asi ah “We Are One In Chin”.

Kan sinak langhter in Unau rual kan i khawnden sual hmanh ah ngaihthiam hal a herh mi um cun i hal ding, Bawikhrih min in i ngaihthiam ding kan si ko hna. Zei kan ton mi poah hi a zoh zia thiam ahcun nun cawnnak le fim chimtu an si viar ko. Thihnak le fahnak a tong mi kan Unau hna nan ngaihchiatnak ah kan in tuarpi ve hna ee.

Kan Chinland Miphun ning piin kan dothlennak mawtaw maw dir sual lai kaw, a pengtlang le a khua ti bantukin ca tial i sum deuh rih hna uh si. CNA/F, CDF, CDM hi lungthu pathum nan si kan nih ramleng in fund kawl piak tu, chawva le fimnak in nan hnulei a rak dir mi pawl hi mei thingthu kan si ve. Kan dihlak kan tuan cio lawng ah rawl cu a hmin kho lai.

Lungsau thinfual tein, lung thawng tak in hmailei ah kal chin ko hna uh si. Bawipa kan lei ah a tang ko kan tei zau lai. Amen.