Manipur Peng Miphun Kong Buainak Ruangah Minung 54 An Thi
================
India ramchung, Manipur ramkulh ah Miphun kong buaibainak ruangah Cozah nih ralkap thlah in venhimnak an tuah ko bu ah pehzulh in buainak a chuak thiam. Hi buainak ruangah Palik sakhan meithal an chiah mi zong an lak piak hna i May 5 tiang pehzulh in buaibai nak a chuak rih.
Cu caah cozah tuanvo ngeitu hna nih Internet line phih dingin nawl an chuah. Pehzulh in buainak a chuah caah hliamtuar hna zong Imphal khua le hmun dang siizung ah an kal pi hna, a tu ni tiang ah minung 54 an thi cang tiah kan theih.
Yenangyaung Peng Ah SAC Ralhrang Kuttang Khuabawi Le Pyusaw-hti Pakhat Thah An Tong; Magway ramthen, Yenangyaung (ရေနံချောင်း) peng Mung-kaan khua SAC ralhrang kuttang riantuan khuabawi pakhat le Pyusaw-hti chungtel pakhat cu May 7 zantim suimilam 12 tluk ah meithal kahnak in an thi tiah kan theih.
Kum 40 tluk a si mi khuabawi Khin Maung Swe le Pyusaw-hti chungtal Khin Maung Myint hna cu khuabawi pa inn ah an pahnih tein an um lio ah kan thah hna tiah PDF-Yenangyaung tuanvo ngeitu pakhat nih a chim.
“Mah hna pahnih cu SAC ralhrang le palik he i bawm in khua mi sin ah hramhram in mei man an hal hna, thapcelh nak zong an tuah ti mi an si caah a tubantuk in PDF phu hnih fonh nih kan fimhlawm hna hi a si. Mah hna pahnih cu meithal kuan khat veve kahnak in a hmun ah an thi colh” tiah a cunglei PDF upa nih a chim. Hi hna pahnih an thih tlawmpal ah SAC ralhrang hna cu ra in check hlatnak an tuah i mipi khuachung luh chuah zong an rengh ngai hna tiah kan theih.
Min Aung Hlaing Fapa Sizung Saknak Ding Ah Pyin Oo Lwin Khuapi Inn 1,200 Hrawh Dingin SAC Nih Nawl A Chuah; Pyin Oo Lwin peng, Taung yatanar sang cu SAC ralhrang nih May ni 8 ah hramhram in hrawh dih ding in nawl an chuah caah sangmi mipi hna nih anmah te in an inn an hrawh dih hna, tiah tualchung mipi nih an langhter.
Taung yatanar sang cu an dirhnak kum 40 lengkai a rau cang i, hrawh ter an sinak a ruang bik cu Myin Aung Hlaing fapa sizung saknak ding caah a si, tiah tualchung mipi nih an chim. “May ni 5 lio ah a voi khatnak hrawh ding in nawl an chuah lio ah SAC ralhrang bawi le a kuttang hna cu motor 2 he a rak ra i, hrawhpiak nan si tik ah vuivai lo le lehrulhnak tuah lo dingin mipi chimhchnawhnak a rak tuah hna.
Cu hnu ah SAC ralhrang motor pakhat in a rak ra ṭhan i, hrawhpiak nan si ṭhan lei lo ti ah an au nain May ni 8 ah an hrawh ṭhan hna, SAC ralhrang pawl zeihmanh zumhawk an tlak lo, mipi dehhlen lawng an rian” tiah tualchungmi pakhat nih Khit Thit Media ah a chim.
Taung yatanar sang hi inn 1,200 leng a umnak sang a si, Gram inn pawl le Meter Box tampi a hmumi inn zong an tampi, atu cu mah inn cio hrawhdih a si caah mipi hna harsatnak phunkip kan tuar, tiah tualchung mipi nih an langhter. Credite ; Lungmili Post