Zumh sual a fawi tawnmi: Thawngthar silomi thawngthar!
=======
Malaysia ralzaam kan konglam tial le chim ka duh setsai ti lo nain chim pah lo ah le thawngpang pakhat khat kan theih tikah zumhsual le tuahsual a chuak lengmang theo tawn i chimrel lo awk tha pah tawn lo.
Malaysia cu mah le holh le peng le tlang le miphun teng hoih in ralzaam bu (community) tamtuk luakchuak a umnak asi bantukin UNHCR kong siseh, ramthumnak kalnak kong ah siseh tial le thanh cio asi. Cheukhat community chuak thar tete nih a luancia kum 10 kum 15 lio hrawng in a rak um cangmi US le Australia a um cangmi nih an chungkhar le auhkhawh kong hna a thar in an van tial le thanh tikah mi tampi nih thilthar le a um bal lomi a chuak thar ah kan ruah tawn i tuahpoh le sok poh ah kal khawh colh ding phun in kan i ruah theo tawn.
Mithar kan si ah mihlun kan si ah UNHCR nih UN card an kan pek poh ahhin ramthumnak ah kal khawh colh ding in kan i ruahsual tawn. Siloah US le Australia um ciami nih auhnak vun tuahpiak poh ahcun kal khawh asi ti phun in a ruat lengmangmi kan um.
Ram pakhat nih an ram chungah ralzaam sinak in an luhter an cohlan hna tikah an upadi (policy) ning in luhter le cohlan asi. UNHCR nih US ah kal ding in kuatpiak asi zong ah US cozah tahfung tlinh lo ahcun kal khawh asi hlei lo. Cubantuk thiamthiam in Australia zong si.
Kan nih Laimi ca le bang ahcun UN kan rak luh lio ah siseh, Australia le US kan rak kal lio ah mah min le sining taktak siloin a kalmi kan tam tuk. Mah tikah unau le nu le pa le chungkhar auhnak tuah tik ah siseh, auh duh tikah siseh chambaunak le tlamtlin lonak tamtuk a chuak. Kha kha kan theih zungzal a hau.
Auh khawh a ngah ti sawhsawh ruahnak lawng in tuah tikah hmai lei zeidah ka ton te lai zeidah a cang te lai ti kan ruat ti lo. Mahbantuk ruang ah US a ummi an si ah Australia a um cangmi an si ah nikhat khat ah Citizenship (rammi sinak) an sok tik zong ah dawn khantu a si tawn ti ruah ngai a hau. Cucaah mi chimmi poh le mi tialmi poh zumh sual le tuah sual i ralring a hau ngai tawn. Ceumi Lian
Malaysia Ram Motor Lampi Cung Pumpak Vanlawng Tlaaknak In Minung 10 An Thi. Malaysia motor lampi cung pumpak Vanlawng cansualnak tongin a tla mi cu motor pakhat le Cycle he an i pah caah minung 10 an thi tiah ṭuanvo ngeitu hna nih an chim.
Hi cansualnak in Vanlawng cungah a citmi minung 8 le Cycle aa citmi minung 2 an thi. Cansualnak a tongmi vanlawng hi Langkawi in Kuala Lumpur khuapi thlanglei Aelangor ah kal aa timmi si tiah an langhter. Beech-390 bantuk asimi pumpak Vanlawng hi August 17, khan vawlei a tlak hlan ah vanlawng lam ah harsatnak tong in pehtlaihnak a tlau tiah ṭuanvo ngeitu hna nih an chim.
Zalei suimilam 2:47 ah pumpak vanlawng hi Subang vanlawng lam zohkhenh tu hna he chonhbiahnak an ngeih hnu zanlei suimilam 2:51 a a tlak hi si tiah an langhter. Vanlawng cansualnak in a thimi lak ah ramkhel minung pakhat a tal chih. A tutiang in ṭuanvo ngeitu hna nih Vanlawng casualnak kong he pehtlaiin hlathlainak an tuah tiah theih asi.
Manipur Meitei Misual Ralthuam Keng Nih Kuki Minung 3 An Kahthah Hna. August 18, zinglei suimilam 4:30 tluk ah Thouwai Kuki hna umnak Manipur Ukhrul peng cu Meitei misual hriamtlai phu nih a thli tein luhnawh an timh naak ah khua vengtu Kuki minung 3 hi an kahthah hna tiah palik chungin ṭuanvo ngeitu hna nih an chim.
Meitei misual hriamtlai phu nih an kahthah mi hna cu, Jamkhogin kum 26, Thangkhokai kum 35 le Hollenson kum 24 mi hna ansi midang hliamtuar mi hohmanh an umlo tiah Kuki Ukhrul ṭuanvo ngeitu palik N Vashum (SP), nih a langhter chih.
Pakistan Ah Khrihfa Biakinn Salvation Army Church Le Saint Paul Catholic Church Muslim Nih An Khangh. Pakistan i Punjab ramṭhen Jaranwala khua ah August 17, khan tualchung mipi thinhunnak in Khrihfa Biakinn 2 an khangh, Biakinn dang zong an rak pin ah Pathian rianṭuantu hna inn zong an khangh piak chih hna tiah theih asi.
Jaranwala khua Khrihfa chungkhar 150 tluk khuasaknak pawngah i Muslim Quran cauk thianghlim catlap cheukhat thleh le sawiselnak ca in ṭial asinak hmun ah hi buainak hi a thok mi asi. Muslim hruaitu ṭuanvo ngeitu pakhat nih kan biaknak zei ah an rello tiah chim in Muslim chungtel mipi a forh hna tiah an langhter chih.
Muslim cauk thiang Quran catlap thleh mi an hmuh ni thok in Muslim minung zeimawat nih Khrihfa Biakinn Salvation Army Church le Saint Pawl Catholic Church cu mei in an khangh tiah theih ais.
Hi kong he pehtlaiin, MAP Minorities Alliance Pakistan chairman Akmal Bhatti nih Muslim mipi hna cu Biaknak ṭihzah lo le sualnak ngeilo mipi harsatnak petu ansi tiah a chim.
Punjab police inspector Mohammed Naved nih, Jaranwala buainak tuahtu lak ah minung 100 tluk cu tlaihkhih ansi cang tiah a chim. Cu bantuk ṭhiam in biaknak kong he phunglam zohkhenh tu pawl nih Khrihfa Biakinn 2 hna cu buainak (Case) an ser piak ve hna tiah theih asi. Credit: Lungmili Media