Malaysia Thonginn/ Camp Ah Hngakchia Hi Zat An Um Cu Zaangfah Tuk An Si.

26 October 2020 cazin ning ah Malaysia thonginn/camp ah hngakchia 756 an um. Mah hna chung in kawlram mi hngakchia 405 an si. Mah 405 chung ah zokhen tu nu le pa tel lo in an mah tein a dang tein an hren mi hngakchia 326 an si. Mah 326 chung in pa 253 an si I nu 73 an si.

Mah report hi Home Minister nih Parliement ah fehternak a tuah mi a si i Nuhrin covo lei cawlcang tu le NGO pawl nih cun 2,000 leng an um lai tiah an zum.

Mah tiin camp ah a phan mi hngakchia hna cu phungning lo in um mi an si ruang ah an tlaih mi hna an si. Lung a fak ko. Mi dang fa le sianginn ah can an hman lio ah mah hna cu zei hngal lo in thonginn/camp ah an can an hman. Pathian tu nih himnak pek ko hna seh!

Relchap; Malaysia ICC (ACR, CRC, FRO, DAI le ZAM) lei nih a tu lio Covid-19 Pandemic chung cu report kan ngah a tam lei ah a tel mi cu tlaihkhih kong hi a si men lai tiah ka ruah. Mah ruang ah 10 Nov 2020 ni ah ICC nih Registration le tlaihkhih kong ah UNHCR sin ah biahalnak le nawlnak ca (statement) kan kuat mi cu nizan (11-11-2020) ah UNHCR nih Reuters News sin ah email kuat in indirect in Tlaihkhih kong ah leh nak a ra tuah mi cu a ho poah nih hmu dih( ACR Facebook page ah zoh ding)a si cang bantuk in, a tu lio Malaysia cozah an rak kai le cangka Aug 2019 thawk in UNHCR cu camp/ thong ah ralzaam pawl va ton khawhnak cu a pek ti lo caah UNHCR card le catlap a tlaih mi zong, thonginn le camp an phan hnu cun UNHCR nih chuah kho an si ti lo. A tu zong hi UNHCR card le catlap a tlaih bu in camp/thonginn ah a um mi an tampi.

Cheukhat cu an ram ah an kuat than mi te hna zong an um pah cang. Mah ti ning in Cozah lei nih thonginn le camp te hna ah UNHCR luh a siang lo mi nih ralzam hna harnak tampi an kan pek. Mah caah cun UNHCR card le catlap I tlaih zong ah daithlang tuk in um ding a si lo. A bik in MCO/ CMCO chung ti bantuk caan lio ah cun cozah nih nawl chuah mi kha tha tein zulh ah a tha. MCO/CMCO nawl bur ruang ah tlaih mi pawl hna cu zeitin hmant in bawm khawh an si lo (card ngei le ngei lo tiin papek a si hlei lo).

Kan ICC statement chung in tlaihkhih kong cu an kan leh cang I a tu cu Registration kong he peh tlaih in bia fiang leh nak an tuah rih lo caah ICC nih cu kan hngak ve lio si ko. ICC nih UN usin ah ca kan kuat mi hi tlamtling khoh nak caah Mipi nih zong Thlacam rak kan bawmh hram peng rih ko uh. Credit: James Bawi Thang Bik

Leave a Reply

Your email address will not be published. Required fields are marked *