Malaysia Kal Nan i Thawhnak Nan Phaisa in Kan Ram caah Raldoh Ve Ulaw!
============
Malaysia kal nan i thawh nak nan phaisa in khan Kan ram caah ral do mi pawl caah zingkhat ca te meh cawk piak law pathian zong nih thluachuah an pek deuh hnga, Do cawi in hei kal rih, phaisa um lo caah kan har tuk kal hau ko tein, India ram ah fa le tu sianginn kai ter. Mi fanu fapa lawng hi ram caah i pe hna seh ti duh hlah uh.Na tuah khawh mi, ka tuah khawh mi a tampi.
Hakha ah um i a hleihluat in Hakha Myodaw dawr hna nan thut nak, Shan Lay i Karaoke nan kai nak, Hakha Town i Coffee nan din nak le The View Bar i nan ei nak, Shwe Myo Daw i Beer nan din nak kha kan ram zalen nak caah nunnak thấp in ral a do mi hna caah an phone phaisa te rak rawn piak lengmang law mawh kan in phorh ngam hna lai lo.
Yangon i Fustal nan kal nak, voikhat shopping nan kal nak mi phaisa in khan Chuncaw te a tuktek te rak kua hna uh law an i lawm tuk lai. An Sii ai cawk nak, hmanh dakaw tamtuk na bomh cang lai cuh. Kut bul mi, ke bul mi, a mit hmu ti lo mi, a hna chet cang mi, mipi ralkap tampi nunnak a khamh kho mi phaisa hi nan zaan khat zuu din nak ah nan man mi cu pam tuk lo ma?
Mah nih tuah mi um tung lo ah misoi le mi thangchiat lawng hi tthawng hlah uh. A ho caah hmanh ah ral an do lo nangmah ca keimah ca, na tefa ca ka tefa ca, na kal tak mi na nu le na chungkhar caah dakaw ral an doh hih. Na kal tak mi na chungkhat dawh ral an in ven piak hi. Mah lak ah khan tamtuk in rak aukhuang lengmang hlah uh zah zong hi theih pah tuah uh.
Uniform he hman an i tlak ah i thla hlah uh law nan ti hna an duh ah i thla ko hna hen se, a khi uico MAH le kawl pawl pawng na um na um ah ,na duh lo cun chuah tak law an mah bantuk in um ve ko. Kan ti sual tuk hna ahcun ka ngaithiam fawn hlah uh, Ka hmantlak hi cu ka dawh I ka tar bia si. Credit: Anna Ngunthamen
Naypitaw Pawngkam SAC Sakhaan Chuah Tak Mi Ralhrang Lei Commander Pawl Cu Min Aung Hlaing Nih A Mawhchiat Hna. Naypitaw pawngkam kahdohnak ah SAC ralkap nih an sakhaan chuahtak a hau mi dirhmun tiang an phak caah cu kong he pehtlai in Min Aung Hlaing nih an ralbawi commander pawl cu fak lak te a sik hna tiah Ayayarwaddy Times sin in theih a si.
SAC sakhaan laknak kong he pehtlai in an ralkap pawl daithlan ruang ah Naypitaw peng chung um battalion ralkap thazang a dernak, daithlan ruang ah a si ti in battalion tuanvo ngei commander ralbawi pawl cu Min Aung Hlaing nih a mawhchiat hna hi a si.
“Naypitaw peng chung ah kahdohnak a hun um tik ah tanglei ralbawi hna nih lih le hrokhrawl in report pek awk a ṭha ruam ti lo. Karenni ram le State dangdang kahdohnak ah, cunglei bawi sin report an pek tik ah an duhpoah in an tial, thawng an pek, ralram ahcun ralbawi hna nih an kuttang ralkap pawl cu duh paoh nawlpek in rian an fial hna” tiah ralkap lei thawngpe sin in theih a si.
A luancia August 10, Naypitaw SAC uknak tang ah a um mi Pyinmana peng LIB 411 kuttang Bomatantaung sakhaan cu PDF le ṭangrual mipi ralkap hna nih sakhaan an lak khawh i kahdohnak chung ah SAC ralkap tamlak te an thi. Hriamnam zong mipi ralkap nih an lak piak hna.
Mah kahdohnak kong he pehtlai in Battalion ralbawi pawl nih cunglei Military zungpi report an peknak ah PDF minung thazang tampi he an kan kah ruang ah sakhaan kan sung/an lak khawh mi a si tiah report an pek.
Sakhaan lak dih hnu ah SAC vanlawng nih vanlei in kahdohnak a tuah, Bomatantaung, Boma a cunglei, Boma a tang, Taungmyint yorma, Yeputaung, Yepulay khuate um mipi 2,000 leng nih khuachuak tak in pawngkam khua ah an zaam hna tiah theih a si.
Yangon Khua Ah Khualtlung Cazin An Check In Nuhrin Covo Buarnak SAC Nih An Tuah. Yangon khua ah August zarhhnihnak thawk in zaan ah mileng khualtlung cazin an check ngai cang, SAC le an ralkap hna nih nuhrin covo buar in an duh ning paoh mui le zaan lawng ah atu bantuk in mi inn le lo ah lut in check nak an tuah tiah Mizzima –News in Burmese sin in theih a si.
Khualtlung cazin check nak ah kum tling lo hngakchia le hringtu nupa telh in thonginn ah an kal pi hna. An thilri vialte an check dih, phone chung um mi hmantlak an zoh, innchung bizu thilthuam vialte cu an rak i ken mi CCTV record in zoh in an check nak an tuah.
“ khualtlung checknak ah khual cazin report peknak cazin le an minung zoh in check an tong. An zumh lo mi lunghringh mi cu an tlaih hna. Ram mi sinak covo buar in an tuah a si ko” tiah Yangon khua um mipi pakhat nih a chim. Yangon khuachung ah August 17-18 ni thawk in zaan ah khuachung sangkip ah ralkap thazang hmang in khualtlung min cazin an check i khuachung ah an vak tiah theih a si. Credit: The Chinland Post