Malaysia cozah nih phungning lo in um mi ramdang mi hna phungning tein riantuan khawhnak ding, Mah thawngpang hi a lar tuk

Tu lio Malaysia cozah nih phungning lo in um mi ramdang mi hna phungning tein riantuan khawhnak ding khua kan khan lai an ti mi kong he pehtlai in mipi nih thei a herh lai tiah ka ruah caah ka rak tial. Mah thawngpang hi a lar tuk caah tuzing ah ramkhel lei le covo lei rian a tuan mi cheukhat upa hna he biaruahnak kan ngei. Bia kan i ruahmi chung in mipi nih thei ding caah aa tlak tiah kan ruah mi cheukhat cu a tang lei ah Ka rak tial.

Sianginn dih lak March 2021 tiang khar an si I kan hnu lio ah cozah nih mipi Bawmhnak tiah an thanh mi kha an ram thimnak ca I chiah mi tangka an si, tu lio harnak caah bawmh duh ruang ah pek mi taktak a si lo. Mah kong hi kan zoh tik ah aa pehtlaih mi thil tampi a um. Tahchunnak ah JASA caah RM 81 Million cozah nih a hman,tu lio PM kut tang ah special project caah billion khat le Ministry of Finance caah RM 13.631 billion hna hman ding an tuah.

Mah tiin an tuah mi thil hi ramkhel lei in zoh a si ah cun mah thil hi hmai kum sianginn on than hlan January si lo ah February ah cun election zong a ra kho mi a si caah cozah nih minthat nak caah an tuah mi thil a si kho tiah zumh a si. Mah dih ah mah tangka pawl cu zeitik ah cozah nih a chuah lai I mipi nih zeitik ah an ngah te lai. A ho pawl ca dah thatnak a chuahpi lai ti mi zong hi ruat ngai hau mi si.

Khat lei ah kan thei chih ding mi cu ramdang mi le ralzaam hna kong ah hin cun Malaysia nih a duh lo ngai mi thil a si. Mah ruang ah ramdang mi le ralzaam huatnak kong hna na tuahto mi kan hmuh peng mi a si.
Mah caah cun cozah nih phunning lo ramdang mi thatnak caah khua a ruat taktak hnga maw ti mi hi bia hal ding a um.

An chim ning ah cun phunning lo um mi ramdang mi phunning tein cohlannak le an ram ah kuat than kho nak ding khuakhan kan i tim an ti. Mah tiin phungning lo ramdang mi hna phungning tein cohlan le riantuan ter kho hna seh law a tu a cozah hi a mipi nih an duh ti lai lo ti cu a fiang.

Cozah le PM nih mah tiin a mipi nih duh lo ding mi thil cu a tuah lai lo tiah a fiang zei caah ti cun a ra lai ding mi election ah tei a duh ve lai. Na tein ramdang mi hna a ram ah tlun ter dih than mi nih cun minthatnak a ngah ter kho men lai.

Mah khuakhannak zong hi a i timh cuahmah lio long a si I khat lei ah remkhel lei mifim hna nih zong an ngiat cuahmah ve lio a si. Mah bantuk in cozah nih ramdang mi caah khuakhannak ti mi kong hi voi tamtuk kan rak thei cang ko nain Zeitik hmant ah a tuah taktak kho bal lo.

A hlei in a biapi mi cu mah khuakhannak chung ah hin ralzaam pawl a i tel ve lo ti hi thei a herh.
Mah caah cun ruahnak cheuh ka duh mi cu a tu hnu hmai lei ah zei thil dah a rak cang lai ti mi tu hi kan hngak hau ko. Ka lawm. Credit: James Bawi Thang Bik

Leave a Reply

Your email address will not be published. Required fields are marked *