MAH nih Amay Suh a um ti lailo caah amah sinah NCA phu an ra dih lai tiah aa ruah sual!

Paucan Dothlennak Nih Cawnpiakmi Mah Kutke To Nun
==========
Chanchuahtu Khrih cu, Christmas nih, hrin asi bantukin; Paucan Dothlennak nih Mah Kutke Tohnun a hrin ve. Kawlram Zalonnak cu Aung San nih a hrin i, amah he aa seh chih. Aung San nih aa thih pi caah Nihin tiang tlamtlin khawh ve lo. Panglong zong phumh chih asi i, Chinram le Chin Miphun zong, Kawl Sal ah kan tang lanh ve. Kawlram Democracy cu Amay Suh he aa sehchih. Amah a umlo bakin Democracy a tlau ve i, tu dirhhmun hi kan phan ve.

Adik mi, Kawlram Politic vialte cu Amay Suh ah aa hngat dih. Democracy icon cu Amay Suh ti asi. Federal Democracy le Tlangcungmi caah mah tein khuakhan Lairelnak Icon belte asi chih lomi Amay Suh asi. Tlangcung mi caah hlarem cu: “Ka chuak ka in kei cu, Mi vanchia ka rak si” ti asi ve.

Kawlram Politicians le Civil Luban kip nih, Amay Suh loin kal le tuan kan thiam lo. Cucu MAH nih a hngalh tuk palia caah, Amay Suh cu a tlaih colh. Thiamlo coter in cases (Ahmuh) phunzakip he taza a cuai. Kawlram ramkhel ah Amay Suh umlo kha a saduhthah asi. “Amay Suh a um tilo ahcun fawi tein Ka ukhruai khawh lai” tiah MAH nih aa ruah bak ko.

Mipi Sandah piahnak lawng asi lai, 8888 lio bantukin tiah MAH nih aa ruah sual. Aruah bang lomi, CDM, CRPH, NUG, UN le International ah Legitimacy i zuamnak (Mipi cozah cu Kanmah kan siko ti hmuhsak nak), a hnubik ah, GZ mino hna hriam dothlennak phu asimi, CDF, PDF tiang a hung pawt thluamah. NUG le Ramdang nih hriam le ngunsawm pelte hmanh bawmh loin, nihin tiang MAH an derhonh i Ralhrang Rallokap tampi an thah hna. MAH thluaknih a phan, phak khawh lomi thil vialte a tlung dih cikcek ko.

Hi thil vialte, a hramthawk, zoh than tikah, Amay Suh, NLD Upa minthang le Mipi cozah luban minthang hna, kutneh pelte hmanh, aa tel bak lo. Khuaruahar lehlam asi. A cungnungbik mi le a ropui bik mi cu; GZ hna Dothlennak CDF, PDF hi asi. Cucaah CDF, PDF a soisel tu, a thangchiat tu, a mual pho tu, vialte cu Politic aduh ko nain, a theihhngalh lo i, aa fiang baklo mi an si hna. I fak sak hna hlah seh. Kha bantuk minung hna kha cu, Politic he pehtlaih in, zawngte bang, an chiatha deh lawng a thiam rih mi ansi. Meihol he lente aa celh mi bawhte ansi.

8888 phu hi mah tein lamkal a thiam lomi an tam deuh caah ProDemocracy in an kal deuh. Dr. Lian Hmung Sakhong, Salai Khua Uk Lian le Salai Bawi Lian Mang te pawl hi ProDemocracy tama an si caah Amay Suh bochan in Ramkhel mi an si. NCA tan (21st Panglong Conference) ah khan Amay Suh hngat in an kal i an cawlcang. Cucaah Chinism ah dirkhawh loin phipheng le Cungniam cungsang an i cit ve kha asi.

CNF zong hi Federal Democracy le Mah tein khuakhan Lairelnak kha an Policy siko hmanh sehlaw, Amay Suh Bochan in, ProDemocracy Lampi in an kal deuh. Chinism nakin Suukyiology in an kal deuh. MAH nih Amay Suh a um ti lailo caah amah sinah NCA phu an ra dih lai tiah aa ruah sual. An kal dengmang ko nain, GZ le CDF an tih caah an cawl ngam thai lo. An fim caah asi. London a tli mi pa hi CNF kanpa le nakin a fim deuh lai ka zumhlo. Amah lawng GZ le CDF asingkhaw ngamtu asi.

Paucan Dothlennak zohthan tikah, Dr. Lian Hmung Sakhong telin, CNF Kanpu le hna nih, Amay Suh tel loin lamkal an thiam cang. Kawlram NLD party chungtel tam deuh le Kawl GZ nih Amay Suh loin lamkal an thiam ve cang. Amay Suh hi poipang sisual sehlaw, Ramhruai khawhtu, Mifimthiam mino tampi kan ngeih cang hna. Mipi cu hnangamnak in kan khah cikcek cang. Christmas le Kumthar hnangamnak cu MAH nih hrawk ko hmanh sehlaw, GZ mino le CDF, PDF ruangah a tlungmi hnangamnak cu, MAH nih hrawk kho mi ci, asi ti lo.

Hlanlio cu Amay Suh lawng ah aa ngat nain, tutan cu relcawklo mino mifimthiam hna ah aa ngat. Dr. Lian Hmung Sakhong sin lawng ah i hngat nak in, CDF ah i hngat nun kha, Chinmi nih kan thiam ve cang. Chin Miroling Pu Hrang Nawl i Kutke To nun kha kan thiam ve cang. Cucaah Paucan Dothlennak kan tei hrim hrim lai tiah ka zumh fawn. Poipang asi sual i, Paucan Dothlennak Chunmang a hlawhtlin lo sual zong ah, ka thin a phang tilo.

Zeitintiah, Dr. Lian Hmung Sakhong tampi an chuak cang. Pu Zing Cung tampi hrin an si cang. Chin Moses Pu Lian Uk tampi an um cang. Pu Kio Mang, Pu Hlur Hmung le Pu Thawng Za Khup a ai awh khawh tu ding Chin GZ relcawklo, Thetse zat thluachuah pek kan si cang. Chin mi nih Kutke To Nun kan thiam cang caah a rau hlan ah “Azidaw pung Aung Zaa me” “အရေးတော်ပုံမုချအောင်ရမည်”. Credit: Joseph R. Thang