Uknak Laak Hnu In SAC Ralkap Nih Chinram Ah Inn 1647 An Khangh Cang, Myanmar Ram Pum Ah Inn 70,000 Leng!
=========
Uknak latu SAC ralkap nih Chinram ah Inn 1647 an khangh cang. Myanmar ram pumpi ah mipi umnak inn an khangh mi chu a luancia May 31 tiang ah inn 70,000 leng a si cang, tiah Data for Myanmar nih an thanh.
Data for Myanmar nih February 28 i an thanh ning ah ram pumpi huap in SAC ralkap nih an khangh mi inn hi 60,456 a si i, March thla in May thla tiang ah inn 9,865 an khangh chap, tiah an langhter.
Uknak laak hnu in SAC ralkap nih an khangh mi dihlak hi inn 70,324 a si i, inn kaang mi lak ah hin mipi umnak, siizung, sianginn le biaknak he aa pehtlai mi inn an i tel. Cu chung ah Sagaing ramṭhen cu innkaang a tamnak bik a si, tiah an langhter chih.
Sagaing ramṭhen chung lawng ah hin inn 53,816 a kaang. A pahnihnak Magway ramṭhen ah inn 10,541 an khangh. Chinram chung zong ah uknak lak hnu in inn 1,647 an khangh cang, tiah data for Myanmar cazin ning in theih a si.
Cu pin ah Chinram telh in, Mandalay ramṭhen, Taningtharyi ramṭhen, Bago ramṭhen, Kaya ramkulh, Shan ramkulh le Karen ramkulh chung ah inn 4,000 leng an khang, tiah an thanhmi ah cun an langhter chih.
PDF He Pehtlaihnak An Ngei Ti Ruangah Kalaymyo Um Tualchungmi 5 SAC Ralkap Nih An Tlaih Hna! Sagaing ramṭhen, Kalaymyo ah June 1 in 12 karlak ah tualchung mi 5 cu SAC ralkap nih an tlaih hna, tiah mithmutu hna nih an chim.
Tlaih a tongmi hna cu Su Su Win, Thiri Lin, Mary San, Naing Htwe le Pawng Suan Khual hna an si i, an inn ah an tlaihmi hna le lampi chekhlatnak tuah lio ah an tlaihmi an si, tiah mithmutu hna nih cun an chim.
SAC ralkap nih cun, PDF he pehtlaihnak an ngei ti ruang ah le social media i ca an thlah mi kong he pehtlai in an tlaihmi an si, tiah tlaih a tongmi chungkhar hna he naihniam in a ummi hna nih an chim. Tlaih a tongmi minung 5 cu SAC ralkap sakhan Dah Kah Sah an an chiah hna, tiah theih a si.
Tualchung mi pakhat nih cun, “SAC ralkap nih lam kip ah mi chawkvai cu an bawh hna i chekhlatnak an tuah hna hnu ah an tlaih hna. An tlaih hnanak a ruang hi PDF he pehtlaihnak an ngei ti ruangah a si,” tiah a chim. Sagaing ramṭhen, Kalaymyo ah SAC ralkap le PDF kar kahdohnak a chuah tawn caah SAC ralkap nih tualchung mi mino hna cu an tlaih tawn hna, tiah theih a si. Crd;The Chin Post