Lg. Esther Far Chin Par (2021 Miss CYONA) nih laksawng a hmuhmi in CDF-Hakha caah motorcycle pakhat cawknak man $ 750.00 a hlut!

September 16, 2021: Lunglawmhnak
============
Miphun hawi hna, CDF-Hakha caah a thar in thazaang chuah in kut a kan samhpiaktu hna kan rak langhter ṭhan. Atu bantukin kan ram le miphun nih rai le ralhrang ruangah har a tuar tikah a khua le ram, peng le tlang tiang lawng hmanh siloin a sang le a veng tiang caah thawhbur thawh cio a si.

Cu vialte lak ah dawtnak lungthin tak he nun pek in rian a ṭuanmi kan naule (CDF-Hakha) caah a tanglei hna nih kut a kan samhpiak ṭhan. Kan i lawm tuk. Thil ṭha an tuahmi cungah dinnak a ṭanh i a Bia a let ballomi Pathian nih an khuasaknak le rianṭuannak ah thluachuahnak pe chin ko hna seh tiah thlaza kan campiak hna.

1. Rev. Tial Lian le chungkhar nih vok pakhat cawknak caah $ 300.00 a kan pek ṭhan. Hi kan nu le pa cu tuan zongah motorcycle cawknak caah $ 750.00 a rak kan pek cang. Bawipa tu nih lunun ngandamnak pe hna sehlaw kan miphun caah hmang chin ko hna seh.

2. Pu Tuan Hre le chungkhar nih motorcycle pakhat cawknak caah $ 750.00 a kan hlut. Lungtho tein dawtnak he a kan petu chungkhar cungah kan i lawm tuk. An rian ṭuannak zongah Bawipa nih thluachuahnak pe chin ko hna seh.

3. Pu Micheal Haupi le chungkhar zong nih motorcycle cawkank caah $ 750.00 a kan hlut ve. Annih chungkhar nih tuan zong ah CDF-Hakha caah thazaang tampi a rak chuah cangmi an si. Thil ṭha tuahnak ah khulrang tein kutsamh lengmangmi chungkhar cungah Pathian nih a biakam bangin thluachuahnak pe chin ko hna seh.

4. Min langhter a duh lomi chungkhar nih pehtlaihnak a rak kan ngei i nun pekmi kan miphun le ram caah rian a ṭuanmi kan naule caah kannih chungkhar nih $ 2,000.00 tein tel ve kan duh ko tiah a rak kan ti. An lungput hmutu Pathian nih a letza in thlua chuah hram ko hna seh tiah thlaza kan cam.

5. Lg. Esther Far Chin Par (2021 Miss CYONA) nih laksawng a hmuhmi te cu amah duhherh te hmanh ah hmang siang loin nunpek in kan ram caah rian a ṭuanmi kan naule (CDF-Hakha) nih a herh tukmi motorcycle pakhat cawknak caah tiin $ 750.00 a kan pek. Hmailei a lam thluan ah Bawipa nih a mithmai tlanter sehlaw kan miphun cawisangtu s ihram ko seh.

6. Sherman, TX khuasa kan mino hna nih motorcycle cawknak caah tiin kawlram ah Kyats sing 10 a kan kuatpiak. Kan mino hna cungah upatnak nganpi kan in pek hna. Bawipa nih thluachuah in pe chin ko hna seh.

CDF-Hakha rianṭuannak caah a bu in a pemi hna zong a hnu deuh ah kan rak langhter ṭhan te lai. Hi rianṭuannak ah thazaang chuah in tel a duhmi caah innkaa kan on lio a si. A herh bik lio caan te ah kan ti khawh tawk cio tein tel khawh i zuam hram hna u si tiah CDF-Hakha Support Team Of North America in kan in sawm hna. Lawmhnak tampi he, Hakha CDFSTNA.