Lautu ram Mara ah chiah ding cu Mara Politician kip, Mara Mifim le Biaknak lei Upa vialte i an chunmang asi!

Mara Army hi ZRA Bantuk Ansi Sual Hnga Maw?
=========
Mara nih Mara ca le Mara biaknak an ngeih cang. Mara Cozah le Mara Ralkap lawng a herh cang. Mara Ralkap hi an derhnak kum (10) asi cang. AA nih tidan an pe hna, Rakhine ram ah an um. India le Kawlram Mara fonh in derh mi asi. Mara Autonomous hi an hmuihtinh asi. Thantlang, Matupi le Paletwa ummi Mara, Zophei, Lautu, Zotung, Senthang vialte fonh dih in Mara cozah derh kha an mission asi. Lautu le Zophei hi cu Mara a sit an si tiah Mara ram le Mara Map ah khumh asi cang. Maths ningin cun Given asi.

Senthang le Zotung hi cu an kan ngamh setsai deuh lo. Zophei hi an tih pah hna. Lautu belte hi kan Unau nan si tiah an lem hna i Mara siter dih an duh hna. Mara Missionary Lorance map ning in Mara ram asi an ti. Congthia ah Lungbungh ding in an ra nain ZPBA upa nih an duh lo caah an hlawh a tlin lo (Pastor Thlabiklian sin in theih mi). Last Bullet caah Lautu ram Mara ah chiah ding cu Mara Politician kip, Mara Mifim le Biaknak lei Upa vialte i an chunmang asi. Mara mino kip, MTP le MSA/MSO zong nih an duh hrinhran ve. Hlawhtlin tertu ah, Mara Khualipi bik cu, Hnaring asi tiah, Dr. Sa Sa cu an chimh ter.

Lautu kip nih an uar tuk. Lautu cu Mara asiko tiah tazik cumh awk ah MP Hi Phei cu Hnaring ara i, Global Mara Culture Shows an tuah. Ahnubik ah India le Kawlram Mara fonh in State derh hi Great Planning asi. Chinram ah State pahnih a um lai. ZRA State le Falam State he cu Chinram ah State (4) um dawh in thil a kal. Cu vialte Mara Vision le Mission tlinter awk ah Mara Army derh asi. MAH le Rallokap doh awk ah asilo. NLD le Amay Suh bawmh ding zong asi fawn lo. An duh mi pek kho tu he aa hawikom ding mi an si. Hi Mara Chunmang hi CNF/CNA nih a duh lo i a hnatlakpi lo sual ahcun ZRA bantukin CNA he i kah khawh bak asi.

CDF Lautu nih Great Mara planning kha an cohlan khawh lo caah, an sual an kawl hna. CDF Lautu cu CNA minung an si caah an duhlo khunnak hi asi bik. Philipine ah Siang inn kan kai ti mi, Lautu lei ka hawipa chimh nak cun; Lautu nih Mara ram hi zapei tia, kan chut bal hna lo. Mara tu nih, Lautu ram le Lautu Miphun vialte Chut dih an timh tu hi asi tiah a ka ti.

Makui ramthen ka um nak ah Lautu ka hawipa nih phone a ka chonh i CDF Lautu Derhmun cu hitin a ka chimh. CDF Lautu cu 2020 May thla ah CNA nih Derhmi asi. Lautu minung an silo. CNA minung ansi. CNA he senthuh mi an si. Matupi, Hakha le Thantlang peng Lautu mino hna fonh in derh mi asi. Lautu Miphun umnak Rakhine, Mindat – Kanpelet, Kalay – Kabaw, Gangaw – Thilin zong ah CDF derh kan duh nain thazang le can nih a pe tilo.

Lautu ram kauhter ding ah asilo. MAH le Rallokap doh ding ah derh mi asi caah Lautu khua vialte (Hakha, Thantlang le Matupi peng Lautu khua 17) lawng ah CDF Lautu cu derh asi. Zotung, Senthang, Zophei le Mara khua ah CDF Lautu an um bak lo i hmai lei zong ah a um fawn lailo. CNA nih Tidan pek lio ah Lautu min in arak kai khawh mi Lautu Khual vialte ah CDF Lautu derh asi.

CDF Mara hi August 2020 lawng ah a um mi asi. CDF Lautu nakin thla (4) an hnu deuh. CDF Mara um hlanpi in, CNA hruainak in Hanring Rallokap Sakhan cu CDF Lautu nih an lak in Lautu peng cu CNA nih an uk hmasat bik ram asi. Lautu khua vialte ah Khanttat an tuah dih, khur an cawh dih, Sentari an cawng dih i Rallokap lut khawh lo ding in, CDF Lautu nih camps le Sakhan an tuah dih cang.

Mara ka hawipa phone ka chawnh colh ve. A ka ti mi cu hitin asi. Mara mipi kan himnak ding ah tiah Mara Pastorte hruainak in Rallokap he i kah lo ding in biachahnak an ngeih. Eidin Tirawl zalhnak cu India asi caah Rallokap sakhan umnak, Lailenpi le Sabawngte lam lawng asi. Mindat lei zong hriam an i zalhnak lam asi caah, Mara upa nih, Mara ram ah Rallokap kah kan duh hrim lo. Lailenpi pa pakhat he fonh kan i chawnh i a ka timi cu; Dr. Sa Sa nih Zathang lawng lawng India ah a thial hna.

A awfit zung zong India ah a thial i thla hlawh zong a pe hna. An paw a cawm rih hna. A tang mi cu sifah retheih lawng te kan si. Tlikzam nak zong kan theih lo. Lailenpi le Sabawngte Rallokap nan kah ahcun kannih vial kan thih dih lai, Zathang pawl lawng an luat lai cu tah. Midang bawifa cu ram le mipi caah nunnak an pe, Dr. Sa Sa le Zathang pawl cu an kan zam tak. Cucaah Rallokap kah hi kan duhlo a ka ti ve. Phundang bak asi ve. A chimh caah asiko. Zumh a har ngai.

Mara ka hawipa nih a ti rih mi cu: CDF Lautu sual an phawt nak khua Chopy khua (Khua min ka palh kho, Mara holh in a ka chimh mi asi) ah hin Lautu Miphun lawng te an si. Mara khua asilo. Lautu khua asi. Mara ram asiko na tein, kan pipu nih Lautu Bawi Pu Thawng Lin an rak pek mi asi. Ralkut in Mara a chanh hna caah. Lautu nih khua an sa nak hi kum (80) deng asi cang. Okesuh zong an hmuh. Lautu khua asi ve mi Paite khua (Amin ka palh kho) he okesuh khat an si. CDF Mara um hlan pi in, cu khua ah cun CDF Lautu nih Sakhan thabik an tuah in an um cang. Anmah tu hi Lailenpi le Sabawngte rallokap a tei tu ding an si tiah a hmun um Mara nih kan uar hna.

A peh rih mi cu; hi khua ah CDF Lautu an um hi buainak hram asilo. Mara um Rallokap Sakhan tuk ding in, kan in bawmh hna lai tiah, CDF Lautu nih an sawm hna. CDF Mara nih an duh lo. Lautu nih nan ralchia, MAH doh awk ah maw? MAH he i hawikom ding ah? Nan derhmun lung fiang asilo timi kha an i faksak caah, an i nuata caah, CDF Lautu cung ah an lung tluang lo i, an sual nak kawl mi hna tu asi.

Mara upa nih cantha lakzau in an planning tlinter awk ah Lautu CDF cu sual an kawl cang hna. India le Kawlram he, Politicians, Biaknak Upa, MTP, MSA, MSO, Khuanupa, vialte fonh in CDF Lautu cu, a sual an kawl cang. Kan i kah hna lai an ti. A hlan i mipi sin a langh ballomi Mara Army zong an hung pawt colh ve. Bia pakhat a leng mi cu CDF Lautu le CDF Thantlang kah awk ah a timi hna an um. Bia vaivuan si hram seh.

Nawlnak: Kei hi Mara ka si lo i Lautu zong ka si fawn lo. Unau kan si an ti caah, Lautu le Mara nan bia bantukin, Unau bantuk i chawnhbiak uh law, MAH doh ti uh, Chin Ralkapbu asi mi CNA/CDF caah ZRA bantuk asilomi Mara Army le CDF Mara si hram seh, timi saduhthahnak he ka tial mi asi. Dr. Sa Sa le Salai Htei Ni tal hi, an hmai zah fon uh, upat uh tiah kan nawl fawn hna. Aho a palh i a ho a dinfel ti kawlnak capar asilo. Ka hawi le he phone call nak bia asi. Zumh khawh asi i zumhlo khawh asi. Lanhtak khawh zong asi. We are one in Chin hi SPH sihram seh. Credit: Joseph R. Thang