Lamzawh le CDM ka doh bal lo, thazaang ka pek zungzal

Lamzawh le CDM ka doh bal lo, thazaang ka pek zungzal. Atu zong ka tanpi peng ko. Nain, lamzawh le CDM lawng in cun ralkap uknak kan thlak kho lai lo timi 100% a fiang tiah ka zumh i zapi theih in ka tial. Mah hi tampi ruahnak a si ve, nain huat i huah an tih cio ruang ah an chim ngam cio lo.

Ralkap cu sachia bantuk an si, hmurka in ‘kan in duh hna lo, kan uk hlah u’ timi cu zei pacik ah an rel lai lo. Sachia cu hmurka men in a za ti lo caah meithal hmang in an thutdan chuh than a hau. Hiti ka chim tikah lamzawh le CDM a herh lo ka tinak si lo, meithal dothlennak a bawmtu an si ve.

Tlangmi cu miphun ralkap kan ngei dih cang, ready kan si, keimah pumpak zong. Nain, tlangmi lawng nih meithal in kan doh ahcun kan tei kho lai lo, Kawlmi hrimhrim nih meithal in an thuat ve a haumi a si. Kawlmi zong nih meithal in an thuat ngam ve tung lo ahcun ralkap cozah tei khawh nak lam a um lo, CDM le lamzawh sandah piah cu fachuaksual Min Aung Hlaing uico rual nih zei an rel ti lo cu ta.

Aho dah kan ral taktak timi kan i fian a hau. An thil tuahmi a that caan ah ka thangthat hna, ruahnak cheuh a herh caan ah ka cheuh hna. Anmah tluk in ralkap cozah ka doh len ve ko. Ralkap nih kan tlaih hna sehlaw anmah nikhat thong an tlak lio ah kei cu kum 1 thong a tla ding dirhmun khi ka si. An khuakhan mi sullam um deuh lo tiah ka ruahmi a um caan ah cun hmai zoh lo tein ka sawh piak tawn ko hna, ka soisel tawn ko hna. Mah ti zalawng tein i sawh piak lawng ah ‘check and balance’ a um lai i organization ningcang tein hruai khawh a si lai.

Mah ti zalawng tein chimrel khawhnak ‘free speech’ hi democracy a muru bik cu a si. Cu a rem lomi cu dictator(aana-sin) kan ti hna. Ka catialmi ruang ah a hlan tein aka hua tawntu Hakha lamzawh hruaitu cheukhat nih tuni kha tlerh le thihphaih in warning an ka pek. ‘Na nun himnak tiang an hnorsuan khawh’ tibantuk biafang tiang an hman. ‘Ziah free speech caah dothlennak a tuah cuahmahmi nih ralkap bantuk in minung pakhat menmen thihphaih le tlerh len ko cu’ ka ti i ka lungtha pah lo.

Hakha nih puitling deuhmi hruaitu kan herh hringhran timi ruahnak aka ngeihter. Khah, kan ral taktak a simi ralkap dohnak tu ah thazaang chuah chin ko u sih. Keimah luala thihphaihnak ah nan caan nan pekmi cu a paam tuk. Mipi lei in lungtlin lonak an chimmi zong emotional thin hunnak i lak in ral ah ser colh loin ‘check and balance’ tuahnak tu ah hman khawh i zuam hram u, kan ral taktak ahodah si timi philh hlah u sih. Credit: Salai Lungthli Tum