Laitlang um laimi le USA um laimi karlak ah thawngpang tha taktak

Laitlang um laimi le USA um laimi karlak ah thawngpang tha taktak
Tutan America ka tlawnnak ah ka aupi cuahmah mi ka hla-meilah a si. ( Pakhat nu hlasak thiah bang a aw ngaihpiak lo in a bia tu in rak ka ngaihpiak ve u)Lailei nih ramleng lei mi tangka cah a hau ti lai lo. Ramleng lei nih lailei tangka kuat a hau ti lai lo. Tangka cah kong nuva le chungkhat buai a um ti lai lo. Lailei pastorte bawmh hal ah ramleng i thlah a hau ti lai lo. Cu biathli cu na thei ve cang maw?Cucu tutan khuakip ka tlawnnak khuami sin ah siseh, ka u ka nau, chungkhat hawikom le a rem ahcun biakinn pulpit cung tiang zong in ka aupi mi a si.
Cucu: Ramleng pawl nih khualei nan chungle kha tolre dum tuah van fial hna u. Tolre tuhnak dum naa ngeih/halh cang maw?” tiah phone van chawn hna u. A ngeih rih lo ahcun “A rannak in rak i tlaih zokzok” van ti hna u. Kaa tlaih cang” a ti ahcun “Acre zeizat hmun dah a si lai?” ti ulaw a bit tuk ahcun “A tlawm bik acre panga paruk in pahra kar rak i tlaih” hei ti hna u. Cun “A kulhnak thirhri hling kual (kaih) zeizat dah a hau lai” hei hal law amah nih an cah hlan ah hei cawkpiak law an inn leng ah hei thlakpiak.Cun a cii a tlawm bik sing hra man hrawng amah nih cah bak lo in hei cawkpiak law hei kua- lau seh.
 Cun a thlawhtuannak ah zeimaw zat (a herh ning in) amah nih an cah hlan ah hei kua ko-cukha ti lo tein, a caan a si rih lo khah. Zeimaw sual ah a kum vui ah a cii zeimaw zat hei cawkpiak than rih-a duh lo zong ah-va za cang ko seh ti rih hlah.
A kum thumnak ah zuar mi a ngei ve cang lai nain van i hne rih law thlaam special in sakpiak ta rih. Kum thum telawng dawh a si ko rih cuh. Thih hlan, chanchung simanking a si hih.
A kum linak ah “Tangka kuat hna nan herh maw? Nan harsa tuk maw?” tiah hei chawn law van i halter hmanh… Nehsawh le tihraam ah aa ruah lai! Zeica tiah khi pinlei cu a tlawmbik kum khat ah sing (ting) 100 in 500 karlak bank ah aa chiah cang lai.
Cun, na chungle na tuahpi hna pin ah khan, nagmah pumpak/chungkhar ca ah khualei ah a dang tein kaupi in hei tuah ve. Khuabawi nih hmun pek lo ding kong phang hlah. A langpar in na tuah khawh tuk lai. Na chungle nih an in zohkhenhpiak khawh lo sual a si zong le keimah van ka fial law ka rak in zohkhenhpiak khawh tuk lai. Zeicatiah a thlawhtuan le a zohkhenh a fawi bik mi pawcawmnak a si.
Cutin nangmah ca ah a dang tein na tuah ahcun ramleng ah Dollar ($) in na hmuh lai i ramchung ah Kyats (Ks.) in kehlei he orhlei he na hmuhchih lai. Micheu cu a langpar in ramleng nan hmuh minak tam lailei in nan hmuh lai.
 Cun ramleng khuami nih khualei a khua in tolre dum kaupi in tuah tuahter hna u. Tlangrian kum khat ni thum cio an chuah ahcun aa lim dih lai. Nan khuabawi hna a lung a varpah mi a si ahcun a maktuk lai! Khuapi fund tampi an ngei lai i an khua ah cozah lei bawi sathahnak khuapi leiba chamnak cu chim hlah, Khuabawi zung saknak le khua thanchonak ca zong ah ramleng tangka cahnak meeting an au ti lai lo.
Cun, Khrihfabu dum kaupi in a dang tein hun tuahter rih hna u. An duh lo zong ah kulhpiak ko hna u. An pastor nih “Khrihfabu rian a si lo…” tiin a ceihcumpi hna nan theih ko zong ah a cii tor in hei cawkpiak hna ulaw hei kuatchih hna u. A thlawhtuan cu Nu Bu le Mino nih an i tha lai lo. Cutin hram nan bunhpiak hna ahcun hi hnu kum li hnu ah cun an Khrihfa upa nih “Hawi khua/Khrihfabu pastor cu motor an cawkpiak dih hna, Pajero in civui le meeting an kai, cawk ve lo cu a si kho ti lo?” tiin motor cawknak van cah chim lo, anmah Khrihfabu lawng hmanh nih Thlanglei Chinram le Kawlrawn ah Missionary a tlawmbik pakhat fawi tuk in an thlah khawh lai.
Hiti ning tein a tuah kho mi ramleng: pumpak, chungkhar, khuami le Khrihfabu ca ah cun hi hnu kum 5 hnu cun ramleng tangka cah thawng daam bang daih hram aa thawk lai. Asinain a zum lo mi le a zumh ko zong ah a tuah duh lo mi le a tuah ko zong ah aa biatak lo mi hna ca tu ahcun ramleng tangka cah ti mi bia le hla “KA DAI LAI LO VAWLEI DONGH TIANG” ti mi sak cu a dai lai lo. (Pa Pui)

 

 

 

admin

Leave a Reply

Your email address will not be published. Required fields are marked *

error: Content is protected !!