Laimi tampi cu Trump nan ttanhtuk ruangah nan Khrihfa nun le ziaza a rawk dih cang hi.

Atutan US thimnak kong cu atutiang a buai huammi kan um rih ko. Keizong mah kongttial hi ngol ka tim cang nan hihnu voihnih thum hrawng cun tthialtthan ka tim ve. Harvard Bulletin ah Biakam hlun professor pa nih “Apocalypse Now” timi kong a ttialmi zong ka manh deuh tikah ka rak leh te lai ka ti, Trump le conservative khrihfa kong zong tlawmpal a telhchih. Laimi chung koko ahcun Biden le Trump a ttanhmi lak ahhin Trump a ttanhtu pawl nan biachim le nan holhrel hi a fak deuh i Khrihfa ziaza le lungput, le cawnpiaknak he zong a kaih bak lo/a kalh bak. Mah ruangah fawh Laimi tampi Trump a tanhmi pawl cu Muslim ralhrang he nan i lo kan ti tawnnak hna a si cu. Ttanh zia nan thiam lo i biaknak nan ri cu.

Bawi Zisuh a thattu, Farasi pawl le tlangbawi pawl zongkha biaknak an rit ruangah fawh Bawi Zisuh cu an thah ko cu. Christmas thlachung hna i Trump ttanh ruang i hehtiah bia ttha lo le biachia kha hmang len cu Bawi Zisuh a thattu nan lo ve sual lai ti ka phang. Keimah zongnih ka rak chim belmi cu thildik le thil hman kan ttanhnak ahcun i sik hi a tha ko ka rak ti i mah cu “sikttha” a si ka ti. Asinan Laimi cu nan theih huaha lomi kongah hehtiah nan i si i biattha lo nan hmang len, nan luan tuk. Thildik le thilhman zong nan thei kho fawn lo i nan i siknak ah bia ttha lo tamtuk nan hmang. Biden a ttanhtu pawl nih Trump zong biafak piin kan ti lo i nanmah a ttanhtu pawl zong biachia kha le bia ttha loin kan in ti fawn hna lo. Laimi tampi cu Trump nan ttanhtuk ruangah nan Khrihfa nun le ziaza a rawk dih cang hi. Laimi tamdeuh Trump a ttanhtu pawl biacah kan duhmi hna cu Nineveh khuapi bang, buri puan i aih u law nithum le zanthum in rawl-ulh in thlacamnak tuah u.

Trump nan ttanh ruang i bia ttha lo le holh chiakha nan hmanmi le nan i siknak, le a dik lo a hmang lo in thawngpang nan ttialmi le mi nan huat hna ning vialte ruangah rawl-ulh in sualchirnak caah nithum chung thlacamnak nan tuah a hau. Ka chimmi hi a hman le hman lo cu rak i chek ko u. Rawl-ulh thlacamnak nan tuah tik zongah Indianapolis hrawng i a ummi nan pastor te cheukhat rak i sawmchih hna u law a ttha lai. Anmah zong an i tel ve hrim2 a hau lai. Kannih Biden a ttanhtu pawl cu fimkaan tein kan um i kan theihmi chungte lawng in kan ttial, a hman kan timi pawl kan hmuh hnu ah. Bible nih a kan cawnpiak bantuk in Biden a ttanhtu pawl cu rul bantuk in kan fim i tthuro bantukin kan nun a nem cu (Matthai 10:16). Trump a ttanhtu pawl nan poinak cu Biden a ttanhtu pohpoh hi nan ral hmuh in nan kan hmuh dih cu. Credit: Van Tum