Kyvi khuapi kah dingin a rak zuangmi Russia jet fighter

Ukraine cu a lak khawh zong ah a sung diam cang ti khawh a si.
==========
Tutan Ukraine- Russia War cu hlan lio, 1967 lio, Muslim ram, ram 5 nih Israel an rak tuk lio ka lawhter ngai.
Egypt, Syria, Jordon, Iraq, Saudi Arabia nih Chin ram tia hrawng a simi, ram fate cu an rak dum nain an rak tei lo. Arab ram nih an rak iruah ning ahcun, zing rawl ei hlan ah tei colh phun dingin an rak iruah, asinain an tei kho lo. Ni 6 tiang an tuk i, an tei lo caah, an kir.

Russia nihhin Ukraine cu 24 hours chung ah lak viar dingin aa ruah. Asinain tuhi ni 5 hlei a rauh cang nain an khuapi a la kho rih lo. Russia tanks pawl lampi ah datsi a dih i, a kal kho ti lomi video a lang. 2014 lio i Crimea a lak bantuk in, fawi tuk in tei ding hi rak iruah dawh a si. Asinain Ukraine Mipi thazaang cu fawite in a pah kho ti lo.

Tutan Ukraine Mipi thazaang hi an hruaitu, Ukraine President Zalensky nih inspiration a pek tuk hna caah a si tiah an chim cio. A ral a tha. A nupi nih 100 ah in a dirpi. Meithal itlaih in front line ah a nunnak a pek. Kyvi khuapi kah dingin a rak zuangmi Russia jet fighter cu Ukraine jet-fighter Pilot pakhat nih a dawi hna i, 6 a tlak hna an ti. A cheu nihcun 10 a thlak an ti. A cheu nihcun Pathian kut aa tel an ti. Cucaah, “Ghost of Kyvi” tiah social media ah an vahpi cio.

Ukraine le Russia War nih Putin cu Vawlei cung ah huat bikmi, a sual bikmi dirhmun a phakter i, Ukraine President Zalensky cu Vawlei pumpi nih uarmi dirhmun ah a cawisang chin chin. Ukraine President Zalensky hi Jewish miphun a si pinah, West he pehtlaih a duhmi a si. Ukraine Mipi nih an uar/ duhning a sang tuk.

Cucaah, Putin nih a huat. Drug edict tiah a ti i, a cheu nihcun, Ukraine President thlak hrim hrim hi a duh caah a si tiah a zummi an um. Russia ram Mipi cu an thin a phang chin lengmang. USD $1 Russia Phaisa 70 a si tawnmi kha, 100 lei a kai colh an ti.

A bik in Google Adsense le Facebook Adsense an phih ahcun, Russia Mipi tamtuk harnak kan tong lai tiah an thinphannak an langhter. Putin nih ngol a timh lo. Ukraine ah Ralkap tam chin chin in a kuat hna. Ukraine cu a lak khawh zong ah a sung diam cang ti khawh a si. Ukraine a tei kha a caah sullam ngei dawh a si ti lo.

Tulio Vawlei cung ah mirum bik Elon Musk nih Ukraine cu free Internet a pek hna pinah, Ralzam hna caah free – super charging station cu Poland ah sak piak dingin a chim. Poland nih Ukraine refugees cu warmly welcome an rak tuah hna. Ukraine- Russia ral nih Europe le US alliance lungrualnak a chuahter chinchin. A thar in western power reboots a tuah tluk a si.

RUSSIA cu a rauh hlan ah recession/ chawleh pamnak a phan kho tiah an ruah. Vawlei leng ah chuah tluk a si cang.
Russia Phaisa cu 30% tluk a tla colh cang ti a si. Cun, Russia stock exchange hi ni hnih chung an khar cang i, New York stock exchange ah Russia product paoh phih a si cang.

Russia energy/ oil le gas cawk ti lo ding in khuakhannak an ngei cio cang ti a si. Technology lei zong nih an chuahtak thluahmah cang. Google ads, YouTube tiang nih an phih. Facebook ads nih an phih rih. Delta computer le intel nih an phih fawn.

Transportation lei in, FedEx le UPS le airline tampi nih an chuah tak, Sport lei FIFA le tiang nih an phih i, Movie lei Disney tiang nih an phih cang. Russia ah Netflix zoh awk a um ti lai lo. Talent show ah Russia cohlang a si ti lai lo ti a si rih. Banks an khar khan i, Phaisa ikuatnak vialte in an phih khanh. A dang tampi a um a rih.

Tutan Russia cungah sanctions an tuah ning cu tuksum a si ko. Russia ram an Sandahpiah an karh. Ukraine ram le fawite in a la kho zawk ti fawn lo. Cucaah, “ka thi lawlaw ah Vawleipi thih pi ko ning tiah Nuke hna a hmeh sual hnga maw” a timi an um. Zeitindah thil aa thlen lai, zoh rih ko hna usih!