Kyaw Kyaw Thihnak Kong Cathanh (Statement)

Kyaw Kyaw Thihnak Kong Cathanh (Statement)
———————————————
December 28, 2020 ah Sangau Khua (Mizoram, India) i a kan liamtakmi kan miphun hawi unau Kyaw Kyaw a thihnak kong he pehtlai in Senthang Organization (SOUSA) of USA le Senthang Churches USA (SCUSA) nih kan ngaihchiatnak le lungfahnak, kan lungput le ruahnak cu cathanh (Statement) in kan rak langhter.

1. Sangau khua cu kan Lai khualipi pakhat a si bantuk in, a luan ciami caan ah Laimi harnak a tongmi tampi zong a rak kilven hna lawng siloin an rak zohkhenh hna i an rak dirkamh hna caah an cungah lunglawmhnak tampi kan ngei.

2. Atu bantuk in Pu Kyaw Kyaw a kan thihtak tik zongah Sangau khuami le nungak tlangval hna nih anmah thlanmual thlengte ah tlamtling tein ruak vuinak an ngeih caah lunglamwhnak chimhcawklo kan ngei.

3. Khua le ram kilvennak caah tiva ah bom puah lo ding tiah phung an sermi cung zongah upatnak kan pek hna khua le ram an dawt caah a si i miphun thanchonak rian an tuan a si tiah kan ruah.

4. Sihmanhsehlaw Pu Kyaw Kyaw a thihnak kong he pehtlaih in Sangau -1 YLA President Pu Ram Cung le a hawile minung paruk hna i an lungput le tuahsernak cungah kan ngeih a chia i kan lung a fak ngaingai. Kan ngeihchiatnak le kan lungfaknak a ruang cu:

(i) Tiva ah bom a puah i zulhphung an buarmi cu phungning tein biaceihnak ngeihpiak hmasa hnuah a herh ahcun a herh ningin dantatnak le cawiliamter ngeih ding a si ko. Asinain, Kyaw Kyaw cu a dam lo tiah theih asi ko bu ah ngada lak dingin ni a tlai hnu khuasik lakah ti chungah an pilter i nga an lakter. Hlawm loin a hmun ah an kaltak.

(ii) Sangau-1 YLA President a simi Pu Ram Cung nih Kyaw Kyaw a umnak inn ngeitu Pu Fela sinah a chimmi cu, “Kyaw Kyaw cu tlawmpal kan hrem, fung in voihnih cio kan tuk i na va zoh ah a tha lai” tiah a chim ti a si. President he minung pasarih an si caah a tlawmbik voi hleili nak tlawmlo an tuk tinak a si. Hi kong cu tha tein ruah tikah sualnak ngantuk an tuah i minung nuhrin covo an buar (Human Right Violation) a si tiah kan pom.

(iii) A thih hnu ah mipi sinah Sangau-1 YLA upa nih “Postmortem tuah kan ngamh ko” tiah an ti. A sining taktak ahcun a ruak an vuai hlan ah rak tuah dingmi thil a si cang. Cu pin ah sibawi le tuanvo ngeitu palik (Doctor le Local Law Enforcement) nih fehternak (Certification) um lo in anmah ruahnak sawhsawh in Kyaw Kyaw cu lung zawtnak (Heart Attack) ruangah a thi tiah an timi cu zumh awk le cohlan awk ah a har ngaingai mi a si.

5. Hmailei ah hi bantuk thil kan ton ti nakhga lo le hi thil kong ah daihnak le remnak a chuah khawhnak ding caah YLA nih tuah hna seh ti kan duhmi cu;

(i) Pu Kyaw Kyaw nih a kaltaknmi hringtu a nu le a chungkhar sinah, “kan palh ko” tiah kan Laiphung tein ngaihthiamnak an hal hna ding a si tiah kan ruah.

6. Kan ngaihchiatnak le kan lungfaknak hi, “YLA chungtel dihlak le Sangau khuami dihlak cungah a si lo,” Pu Kyaw Kyaw a hremtu le fung in a tuu-tu hna cung lawngah a si. Lai hritlai unau khat kan si bantuk in hi bantuk thil kan ton tikah pengtlang le a khua ti bantuk in huatnak le i remlonak um hram hlah seh tihi kan saduhthahnak a si fawn.

7. Pathian nih kan umpi in lam kan hruai hram sehlaw Sangau-1 YLA President le a hawile minung paruk le Pu Kyaw Kyaw nih a kaltakmi a nu le a chungkhar hna karlak ah daihnak le remnak um hram ko seh timi cu kan saduhthahnak a si.

Hi cathanh (Statement) cu Senthang Organization of USA le Senthang Churches USA nih Pu Kyaw Kyaw thihnak kong he pehtlai in kan ngaihchiatnak le lungfaknak, kan lungput le ruahnak langhternak caah kan chuahmi a si.