Kum 800 Hnu Ah Christmas Arfi A Lang Tthan Lai

Kum 800 hnu ah Christmas arfi a lang tthan lai
====================================
Kum 2020 cu vawlei tuanbia ah philh khawh ti lo ding mi asi. Thinphannak le ngaihchiatnak he a khat mi kum 2020 cu a dih lai te ah van lei in khuaruahhar Pathian thilser pakhat Christmas arfi langhnak he a dih lai.
Chritmas arfi cu zeidah asi?

Solar system timi ahhin Nika kha vawlei pakua nih anmah le an lam cio in an hel (pic 2 khi zoh). Cu Nika a hel tu vawlei pakua lak ahcun Jupiter le Saturn hi a ngan bik an si. Cu vawlei pakua (planets) pawl cu pakhat le pakhat hi meng millions in ai hlat mi an si i kum tampi dan ah itong dengmang in an um tawn. Jupiter le Saturn zong hi kum 20 dan lengmang ah lam neih tein itong dengmang in an um tawn. Nain Christmas thla thengmang ah an itong bal lo pin ah tukum bantuk lamneih taktak i an iton cu a hnu bik March 4, 1226 (Middle Ages) lio ah a rak si. Tukum summer khawh khan Jupiter le Saturn hi duhsah tein an ineih thluahmah, cutin an ineih deuhdeuh i Dec 21 ahkhin planets pahnih ai phir mi bantuk in an um lai ti asi. Cuti planets pahnih ihnur dengmang tiang in an iton tik ah arfi ceu sawhsawh nak tthawng deuh le ceu deuh in phundang ngai in a ceu mi a chuak i vawlei hin fiang tein hmuh khawh asi ti asi. Cu planets pahnih (Jupiter le Saturn) Dec 16-25 kar ah an iton i arfi ceu ngan piin a lang ding mi kha astronomers pawl nih Christmas arfi siloah Bethlehem arfi tiah an kawh mi cu asi.

Zeiruang ah Christmas arfi tiah an kawh hnga? Bible scholars tampi nih Jesuh Khrih cu BC 4 le BC 6 kar ah a chuak lai tiah an ruah. Jupiter le Saturn hi lamneih tein BC 7 ah an rak itong bal i Jupiter, Venus le arfi phunkhat Regulus hi BC 2 ah an rak itong ti asi. Cucaah Jesuh chuah lio i mifim pathum hna lam a hruaitu arfi kha tubantuk planets pahnih ai tong i arfi ceu nganpi ah ai chuah mi bantuk hi asi ko lai tiah an ruah i Bethlehem arfi tiah an kawh nak asi. Kan Bible ah mifim pathum nih an zulh mi arfi cu Bethlehem a phak in a dir (stopped over) tiin kan hmuh i Chinese le Korea ancient writers pawl ttial ning he ai khat ngai fawn, B.C 5 ah ai phundang ngai mi arfi (comet or NOVA) cu hmuh asi i hmun/khua pakhat cung ah a rak dir «hanging over» tiin an ttial ve ti asi.

Tlaangkomnak: Astronomers tampi nih BC 2 lio i planets ai tong mi in a chuak mi arfi ceu kha naute Jesuh ton awk ah mifim pathum lamhruai tu kha a si ko lai an ti i cheukhat astronomers nih Herod siangpahrang kha BC 4 ah thih dawh asi i BC 2 ah ai tong mi planets kha Bethlehem arfi cu asi kho deuh hnga lo tiin argument an tuah ve. Kan Pathian cu arfi, thlapa, nika le vawlei (planets) vialte a sertu asi caah planets pakhat le pakhat zong a herh a ti tik ah a ton ter khawh ko hna i arfi ceu a phunphun zong a chuah ter khawh ko hna. Vawleipi harnak le ngaihchiatnak nih a khuh lio caan theng te ah tubantuk thil a can ter mi hi sermi thil vialte a control tu asi nak le zeizongte hi a mah timhlamh mi caan chung ah a kal ter ko i hmailei ah ruahchannak a um ko ti a langhnak asi.
Ref: phys.org (10.12.20), NRK (10.12.20), Fox News (10.12.20). Sangukceu Zinhlawng