Kum 10 Ngakchia Tel in minung sawsawh Ralhrang Nih An Kah Than Hna!

Ayadaw ah kum (10) ngakchia tel in minung pali PDF nan si tiin ralhraang nih an kahthah hna!
=========
Sagaing ramthen, Ayadaw peng, Bawkone khua pawng i duum a tuah mi Ko San Lin (37), Mg Kala (10), kum (26) hrawng mino pakhat le lam aa chawk mi U Phoe Taung (60) hna cu nihin January 26 zing ah PDF nan si tiin ralhraang nih an kahthah hna tiah Ayadaw peng thawngfiang thanhnak in kan theih.

Kah thah a tong mi hna pathum hi duum rian an tuan lio ah an kahthah hna hi a si i bicycle in lam aa chawk mi khuami pakhat zong an dirter i a lu ah an kah tiah kan theih. “Ralhraang nih an kahthah mi hna hi khuami duum tuah mi an si. PDF nan si ti in, a ruang um lo in an kahthah hna.

Lam aa chawk mi khuami pakhat zong an dirter i a lu ah an kahthah. Dalaan pawl nih cun PDF nih ralhraang pawl an kalnak lam ah bomb an hmanh ca ah an kahthah mi hna a si tiah an chim. Khuami pathum hi cu kan hngalh cang hna nain pakhat hi kan hngal kho rih lo. Kan hlathlai lio a si tiah Ayadaw peng thawngfiang thanhnak lei nawlngeitu pakhat nih a chim. Credit: The Hakha Post

Captain Salai San Thar Nih Ram Le Miphun Caah A Nunnak A Pek! Chinland Defense Force-Matupi Tatzin 2 Captain Salai San Thar nih nihin ni ah Matupi peng chung Zotung peng chungah ram le miphun caah a nunnak a pek, tiah thawngpang theih a si. Chinram le Chin miphun caah mino thatha tampi nih an nunnak an pek cang.

Atu lio hin thlanglei Matupi peng chung Mara le Zotung ramchung ah hin kahdohnak a fak ngaingai, tiah thawngpang theih a si. Chaklei ah Tidem le Kalay karlak kahdoh kong cu nizan ah ralhrang lei thazaang tampi in an luhhnawh hna caah mipi ralkap pawl cu hnu lei ah an i thawlh, tiah theih a si.

Chin ramkulh, thlanglei Matupi peng chung Zotung le Mara ram ah hin kahdohnak a dai ngai cang, tiah rak ruah a si nain, nihin ni ah Salai San Thar nih a nunnak a pek timi thawngpang chia theih cu theih a nuam lo taktak. Chin miphun kan mino tete an nunnak a liam thluahmah komi ruah ah ngaih a chia tuk hringhran ko. Tantak mi chungkhar cingla rualchan vialte Bawipa nih hnem ko hna seh.

CDM Ralkap 46 Caah Sing (50) Bak DMO-PDF Nih Bawmnak An Pek! Nawlngeihnak latu SAC ralhrang cu kaltak in CDM tuahtu ralkap (46) hna caah bawmnak phaisa sing (50) tluk kan pek tiah DMO-PDF nih cathanh an chuah. Bawmnak petu hna sinin kan hmuh/co mi phaisa hna cu DMO-PDF nih CDM tuahtu ralkap hna sinah kan pek tiah cathanh an chuahmi ahcun an langhter.

Mipi ralkap DMO-PDF centre lei hruainak in bawmnak phaisa hna cu January 5 ah khan CDM tuahtu ralkap 29 sinah, minung pakhat ah sing 108000 in bawmnak kan pek hna i, nihin January 23 ah CDM ralkap 17 hna cu minung pakhat ah sing 108000 in bawmnak kan pek than hna.

SAC ralhrang ralkap nih nawlngeihnak a laak hnuin cozah riantuannak department tam deuh nih cun CDM an tuah. CDM tuahtu hna cu anmah pumpak miatnak le hlawtnak kaltak in mipi sinah an i fonh pinah PDF sinah tampi an lut i, SAC ralhrang cu an kahdoh.

Mipi ralkap DMO-PDF sinah bawmnak petu hna he i fonhin an hmuhmi phaisa bawmnak hna cu CDM tuahtu ralkap hna caah pehzulh in bawmnak an pek hna. Ramchung ramleng ummi bawmnak petu hna i bawmnak thawngin CDM tuahtu ralkap hna caah eidin leiah bawmtu tha taktak a si i, pehzulh in bawmnak pe cio dingin zangfah kan in nawl hna tiah DMO-PDF nih cathanh an chuah hi a si.