KIO Headquarters Kiang Kahdohnak, Kawl Ralhrang Tlaih Tongmi Chung In A Thimi An Um!
========
KIA Headquarter kiang Kahdohnak a tuah duh lomi Battalion Commander hna chung in hrem biahalnak ah commander ralbawi a thi, non-CDM pawl raltu ding min cazin an lak cuahmah lio tiah theih a si. KIA Headquarter pawng Nam San Yang khua ah kahdohnak a tuah duh lomi Battalion Commander hna chung in hrem biahalnak ah ralbawi pakhat a thi tiah Kachin Local news pakhat nih a chim tiah People Spring news nih a langhter.
KIA headquarter pawng Nam San Yang khua kahdohnak hi July thla hramthok in kahdohnak a chuak cang tiah theih a si. SAC ralkap lei in kahdohnak a tuah duh lo mi commander LIB 88 kuttang um battalion 12, Battalion 13, Battalion 411, Battalion 37, Battalion 387 ralbawi hna cu Northern Command lei in an rak tlaih hna.
“Raldoh dingin Lamsial an fial hna. Kal duh lo in hnu lei an kir caah nawl ngai lo case in tlaih an ton. Tlaih a tonmi battalion commander hna chungin Battalion 13 commander cu a luan cia ni 4 ah Bamaw hrambunh Military Operations Commands MOC 20-အမှတ် (၂၁) စစ်ဆင်ရေးကွပ်ကဲမှုဌာနချုပ်(စကခ-၂၁) hrem biahalnak ah a thi tiah thawng kan theih” tiah Kachin wave nih a chim.
July 3 ni in Nam Sam Yang kahdohnak ah SAC lei Keralkap bu Battalion 13, 17, 103, 236, 83, 77, 318, 385 phu 8 an rak si natein battalion adangdang an hun chap than tiah theih a si. July 13 ni ah Kachin Northern Commanders Major General Ko Ko Maung, Deputy Commander major General Ko Ko Maung, Deputy Commander Brigadier Aung Myo Oo, Colonel Aung Kyi Lin (Border Affairs Minister), Hpakant Camp Commander le Officers-2 cu Nay Pyi Taw lei in an rak tlaih cang hna.
Nihin Kachin ramkulh in Myanmar ram pumpi ah nifatiin kahdohnak a um i SAC ralkap an thazaang a der ngai ruang ah Non-CDM pawl raltu ding in min cazin an lak cuahmah lio a si tiah People Spring news nih a chim.
Karenni Kahdohnak ah Ralhrang Battalion Lutlai Telh in A thimi an tam. Karenni kahdohnak ah Kalaw hrambumh Battalion 3 Commander Lt. Colonel, Deputy Commander telh in Mi-16 le Battalion 112 Ralbawi le a ralkap 14 an dihlak ralhrang 30 an thi tiah theih a si.
Karenni kahdohnak August zarh hnihnak ah Kalaw hrambumh Battalion 3 Commander Lt. Colonel, Deputy Commander telh in ralkap 16, Battalion 112 ralbawi le a ralkap 14 an dihlak ralhrang 30 an thi tiah SAC Eastern Command nih a chim tiah Khit Tit Media nih a langhter.
Kalaw hrambunh Battalion 3 commander, Deputy Commander 2 le an ralkap 14 fonh in mi 16 an thi. Cun, Kalaw hrambunh thiamthiam battalion 112 ah ralbawi telh in ralkap 14 an thi ve. A thimi ralkap 30 le battalion cu LIB 55 kuttang um an si hna.
Shan ramkulh a ummi SAC ralkap pawl cu Karenni ramkulh chungah operation an hun tuah. SAC lei nih an tlik tak mi sakhan hna lak than ding in Keralkap, Tilawng ralkap, Vanralkap phu fonh in Karenni ram lei ah an rak kai ngai tiah theih a si.
Latt Khat Tlang Sakhaan Kahdohnak Ah Major 1, Captain 1 Telh In 15 An Thi, Hriam Tampi An Lak Khawh. Karen ram, Myawaddy peng, Latt Khat tlang ah Operation a tuah mi SAC ralkap pawl kahdohnak ah Major pakhat, Captain pakhat telh in 15 an thi, hriam tampi an lak khawh tiah Cobra Column nih a thanh.
August 15 zinglei 3:00am thawk in Myawaddy lei in Latt Khat tlang lei ah SAC ralkap nih hriamngan an kah lengmang i vanlei bawmhnak he a rak kai mi SAC ralkap pawl cu Cobra Column phufonh nih an kah hna i Major pakhat, Captain pakhat telh in 15 an thi, 20 an i hliam tiah theih a si. Kahdohnak chung ah SAC ralkap nih hriamngan voi 300 leng, kahdohnak Jet vanlawng in voi 3, Mi-35 Helicopter in voi 3 tiah kahdoh a bawmh hna tiah Cobra Column nih an langhter.
Kahdohnak chung in SAC ralkap pawl nih an hman mi 60MM Commando hriamngan zuun 1, MA Sniper zuun 1, M16 zuun 1, MA kuan 53, MA2 kuanbawm a pum mi 2, M16 kuanbawm 2, 5.56 kuan 5,200, 7.62 NATO kuan 2,650, MA Sniper kuanbawm 1, 60MM bom 36, RPG bom 9, RPG zen 8, 40MM bom 57, Machine Gun zuun 2 le pehtlaihnak seh 2 hna an lak khawh tiah theih a si. SAC ralkap nih hriamngan voi tamtuk an kah ruang ah Tower tung le biaknak lei inn a rawh leng ah dothlennak phu chung in minung 2 an nunnak a liam i 5 an i hliam tiah Cobra Column nih a thanh. Credit: The Chinland Post