KIA Le PDF Hriamtlai Phu Hna Nih Ralhrang Minung 40 An Thah Hna!

Breaking News; KIA Le PDF Hriamtlai Phu Hna Nih Ralhrang Minung 40 An Thah Hna!
===========
Sagaing ramthen, Pinlehbu hmunram ah KIA le PDF hriamtlai phu fonh in ralhrangbu karlakah nihnih chung kahdohnak a chuah i, ralhrang lei minung 40 an thi hlei ah, hriamnam tampi zong an chuh khawh hna, tiah thawngpang tha tuk theih a si.

KIA Hriamtlai phu le PDF hriamtlai phu hna nih ralhrang an thah hna nak kong le hriamnam pawl an lakmi kong he pehtlai in NUG cozah nih nihin ni ah thawngthanhnak an tuah hi a si.

Sagaing ramthen, Pinlehbu pengkulh chungah ralhrang thazaang 100 le KIA hriamtlai phu nih an control nak Kawlin, Wahtu, Pinlenbu PDF hna cu nihin September 24, 2021 ni suimilam 11:50 in kahdohnak a chuah i, ralhrang lei minung 25 an thi, hliamhma an pumi zong an tam ngai, tiah thawngtheih a si.

Cun, PDF hriamtlai phu lei in minung 5 hliamhma an pu i, thinphang ding a um lo, tiah NUG cozah lei humhimnak vuanci nih thawngthanhnak an tuah hi a si. Hi kahdohnak kong he pehtlai in ralhrang lei hriamnam RPG 1, 60 Mama 1, hriamnam hme pawl an lak khawh, tiah theih a si.

September 22, 2021 ni Pinlenbu pengkulh chungah hlei cung pakhat zongah ralhrangbu le Kawlin, Wahtu, Pinlenbu PDF hriamtlai karlak ah kahdohnak a chuak cang. Ralhrang lei in minung 15 an thi i, Bokyi 1 le hriamnam pawl an laknak kong cu NUG Cozah nih nihin ni ah thawngthanhnak an tuah.

September 22, 2021 ni Moemyint hlei cungah kahdohnak ah thilri tampi zong an lak khawh. Meithal hi 2 an lak khawh rih. Ralhrang pawl cu an zam i, Moemyint hlei cung in meithal pawl cu an hlawh i, an zam, tiah Kawlin PDF hriamtlai phu nih an chim.

Pinlenbu pengkulh chungah ralhrang lei mithi min cazin cu September 22, 2021 ni le ni 24 kahdohnak ah minung 40 an thi, tiah thawngpang tha tuk theih a si.

Lunglawmhnak; Thantlang khua September 18, 2021 kahdohnak a cangmi ah a khalhmi turuun innlo kangmi meiphalh ding a kal lio lampi ah Sahramg 666 nih meithal in an kah I a nunnak a liammi kan Pastor Cung Biak Hum i a taan takmi chungkhar nih CDF-Thantlang ca ah $2,000 an kan hlut.

Mah lawng a si lo! Thantlang kahdohnak ruangah ralzaam dirhmun ah a dirmi Thantlang mipi ca ah $1,000 zong Pastors Fellowship sin ah an bawmh fawn.

Pastor Cung Biak Hum le a taantakmi chungkhar nan cungah kan I lawm tuk hringhran. Nu farual hmailei nan khuasak tintuknak ah kan Biakmi Pathian nih in umpi in lam in hruai hna sehlaw a thluachuah nan chungkhar cungah ruah bang surter ko seh!

Pastor Cung Biak Hum, nan nunnak na pekmi hi Thantlang ca lawng ah a si lo bantukin Chinram ca lawng zongah a si lo. Vawlei pumpi ah dinfelnak, federal le democracy a um khawh nakding ca ah a si. CNA/CDF nih na phu an hlam hrimhrim lai. Cu lawng si loin na thihpimi Dinfelnak, Federal le Democracy zong Kawlram nih a hmuh tiang an sining dihlak pek in an zuam lai.

Na dawt CNA/CDF nih teinak an hmuh tik ah Vanram tu in lunglawm te in na rak kan zoh te lai i, na nunnak a lakka in a liam lo zia na khalhmi Thantlang Peng mipi nih vawlei dongh tiang cinken in an phuan lai. GTRO-Media Team

Pastor Biak Kolh Hi Civil Minung A Si An Theih Ko Bu Ah SAC Ralhrang Nih An Kah Hramhram Mi A Si. Tuchun Thantlang Pastor Biak Kolh an kah ning cu kah lio i a ummi pawl nih an chimning ah lung a fak ngaingai. Ai telmi chim ning in ka van langhter lai: “Inn kaang phalh dingin chaklei sang in minung 6, thlanglei innkangh nak lei ah cycle in kan zuang hna. Thantlang Lansung phak lai Pu Al Cung (Van Bawi pa) inn hmai kan phak bak ah, Pu Khen Lai inn pawngin Ralkap nih an rak kan kah. Ralkap hi kan hmu cia hna lo.

An kan kah tikah kan lau i Leklak cycle in kir kan itim i kan cycle kan mer hna i kan cycle kan mernak ah kan tlu cio hna. Nain midang hi cycle in kal ti loin kan ke in kan pawngkam iphennak a tthatnak deuh le inn karlak in kan zam. Pastor Biak Kolh tu hi cycle in a ttho tthan i a tli tthan.

Cu tikah ralkap pawl nih an kah i a zak ah an khen i a tlu tthan. Cu a tlumi cu an rak fuh i a hmun ah a ttang bak ah voihnih in an kah tthan. Rak dawi in rak kap tthan hna hlah sehlaw, a nung zong a nung men ko hnga. Cu lawng si loin, a hngawng ah ai awihmi Suitthi kha an lakpiak. Cu pinah a kutdong hrolh zong kha a kut an tan i an lakpiak.

Hi ko hi lung a fak khun. Cun a kan kaput ralkap nihhin Civil mi kan si fiangte in an kan theih ko. A ho kan si zong ah Thantlang ahcun upa deuh le hruaitu deuh, amah Biak Kolh zong cu pastor si tikah an kan theihtuk ko. Nain, an kan kah hramhram mi bak a si tiah meiphalh ah zuan ai timi minung 6 chungin pakhat nih a chim.

Pastor Cung Biak Hum ruak JMBC khrihfabu pastor hna nih an laak khawh cang. 2021 September 18 zaanlei sang Thantlang khuapi chung ah meithal le bomb puah thawng theih hnu inn 10 leeng a kaangh lawng si loin TCBC khrihfabu Pastor Cung Biak Hum cu SAC mithat phu hna kut in a nunnak a liam tiah thawng kan theih.

Thantlang khuapi chung inn a kangh hi zaanlei suimilaam pathum fai in kangh hram aa thawk i, 6:00PM fai lawng ah mei an hmih khawh. Inn a kang mi mei phalh awk ah a kal mi hna cu SAC lei nih an kah hna i, hi an kah mi chung ah Pastor Cung Biak Hum an khen i lamkam ah a ruak in hmuh a si.

Hi kong he pehtlai in Thantlang khuami pakhat nih, “Inn a kang mi phalh awk ah a kal mi poh SAC nih an kan kah. Saupi inn a kaang mi hmih khawh loin kan um. An kan kahnak ruang ah TCBC khrihfabu pastor kuanfang nih a khen i a nunnak a liam. A dang hliam a tuar mi le a nunnak a liam mi an um le um lo kan thei kho rih lo,” tiah The Hakha Post ah a chim.

Pastor Cung Biak Hum hi nupi le fate pahnih he khua a sa mi a si i, tu thla a si lo hmanh ah hmaithla chung ah a pathumnak a ngei ding an si tiah kan theih. Tuzaan 6:30PM tluk ah JMBC khrihfabu upa le pastor hna nih a ruak tluang tein an va laak khawh tiah kan theih.