Titanic Lawng A Rawkmi Zoh Ding In A Kalmi Tichunglut Lawng A Tlau
==============
Atlantic rili tawne ah a ummi Titanic lawng a rawkmi va zoh ding in a kalmi Titan tichunglut(Submersible) lawng cu June 18 ah a tlau, tiah theih a si. Atlantic rili tawne metre 3,800 leng ah a ummi Titanic lawng va zoh ding in minung pakhat nih dollar sing 2 le cheu hrawng an liam, tiah theih a si.
Titanic lawng zoh ding in a kalmi hna hi British billionaire Hamish Harding, Pakistani mirum Shahzada Dawood le a fapa Suleman lengah France mi Explorer Paul Henri Nargeolet(Kum 77), an si i, lawng khalhtu le a ngeitupa a si mi Stockton Rush nih a zulh hna, tiah theih a si.
Titan lawng cu rili tang ah suimilam 96 chung a um khomi a si i, aa citmi minung 5 cu June 22 zinglei tiang a umpi khawh hna lai, tiah ruah a si. Titanic lawng a umnak hi suimilam 2 chung hrawng khual lam a si. Atu hi US le Canada coast guart hna nih Titan lawng cu an kawl cuahmah, tiah US Coast Guard in capt. Jamie Frederick nih a chim.
Thailand ah Myanmar rammi ID card a tuahpiaktu Thai Officer pathum cu nawlngeitu nih chekhlatnak an tuah hna, tiah BBC nih a ṭial. Thai Baht sing 30 eihmuar in Myanmar rammi 700 hrawng ID card a tuahpiaktu, Mesauk NRC zung in Thai Officer pathum cu nawlngeitu hna nih chekhlatnak an tuah hna, tiah theih a si.
Thai Officer pathum nih Myanmar mi 700 ID card an tuahpiakmi hna hi Karenni ramkulh ah SAC ralkap a doh cuahmahtu, ralhrial mi, PDF, le tlangcung hriamtlai he pehtlaihnak a ngeimi an si, tiah Thailand NRC zung nih cun an langhter.
SAC nih hramhram uknak an lak 2021 in 2023 tiang ah rian ngei lo mi cu zatuak 3.52 tluk in an karh, tiah SAC kuttang um Ministry of Labor nih 2022-2023 chung rian ngei cazin an langhter i, rian ngei lo mi hi minung nuai 2 tluk deng an um, tiah theih a si.
SAC nih uknak a lak hnu 2023 kum chung ah rian ngei lo mi hi zatuak 3.69 tluk an si i, NLD cozah chan lio 2020 ah cun rian ngei lo mi hi zatuak 0.17 an si. Rian ngeilo mi hi zatuak 3.52 an karh, tinak a si. SAC ralkap nih hramhram in nawlngeihnak an lak kum 2021 ah cun rian ngei lo hi zatuak 1.33 an si i, 2022 kum ahcun zatuak 2.53 an si, tukum 2023 ah cun zatuak 3.69 tiang a phanh caah rian ngei lo an tambik kum zong a si.
Ramchung ah rian ṭuan ding a har caah pawcawmnak ruah ah ramleng chuak zong an tam. 2020 in 2023 tiang rianṭuan ding in ramleng a chuak mi hi zatuak 1.35 an karh, tiah theih a si. Ramleng chuak mi hna chung ah hin a tam bik hi kum 15 in kum 19 kar an si i, kum 40 in kum 44 kar hi cu a tlawm lei an si, cu chung ah a tam deuh cu pa an si, tiah The Irrawaddy nih a ṭial.