Khuami um hna hlah seh law rawl lo in kan thi lai!

Khuami um hna hlah seh law rawl lo in kan thi lai!
===========
“CDM kan tuah pin ah kan zam rih. IDP bawmhnak a um lo. A rengah Thantlang kan um lio hrim ah Covid committee zong kha nan ka neng! Lockdown nan ti, stay at home nan ti le zei rian taktak hmanh kan tuan thiam bak lo hme cu! Covid bawmhnak tangka hleimi um ahcun kan bawm hna seh!

CDM tuahmi 50000 an kan bawmh lonak zong hi thla hnih thum pi si cang. IDP min cazin hi voi thum li an kan lak le bawmh ttung lo ah hnahnok lehlam si,” tiah a ti. Nanmawh bak lo e!Fawi hrim lo ee ka hei ti. Kan zaamnak khua nih bawmh lo cun rawl lo in pei kan thih lai hi tiah a peh.

Minung 10,000 leng umnak Thantlang khua kan zaam dih. Kan zaam lai lo tiah ai ruatmi zong nih kan celh lo le kan zaam ko. Kan pasal kho hrim lo. Kan inn kan lo pi kan chuak tak dih. Thantlang khua thin le lung, a kan cawmtu le Thantlang peng pumpi nih kan tlatkai mi ciam cikcek in a kang dih. Kan thin le kan lung hlang lakin an sawh ai!
Mizo ram ah, Thantlang peng khuate cheukhat ah mah le hoih ning cio in kan ithek dih hna. Sii-ai cawk ding a um lo.

Tirawl cawk ding a um lo. Thil puan cawk ding a um lo. Saimahrang lo in a zaammi ca ko ahhin a har. Motor cycle in chungkhar duh herh vialte phurh awk tha hlah kaw kan mi pum he lawng bak kan chuak. A rau ziah mah, a har ziah mah. Chungkhar khuasaknak ah duh herh nih a tam, hmuhnak le kan ngei lo. Bawmhnak le a um fawn lo. Hi ti hin zeitinhme kan si te lai tiah a ka ti. Aw Pathian nih rawl lo in kan chia hna lai lo a ti kan minung hawi an nun ahcun kan nung ve ko lai cu tiah ka hei hnemh.

Kum can saupi lo thlawh thingphurh lonak hmun ah cozah rian te ai ot cang mi, pension lak zong cu deng cang mi, ram dang bawmtu zong ngei ve lomi, lo thlawh in paw kan icawm kho hnga hme maw? Kan lung nih a hngalh hmanh ah kan thazaang nih a celh ttung lo, sau pi cu mi khualkhua ah kan zaam kho bal lai lo ah a ti ko.

Ram chung ram leng riantuantu zong hi kan in cawm hna lai, zeizei an ti a taktak ah tuanvo an la kho taktak ttung lo a van ti ko. Ka lau nawn! Si lo tu lio cu aw, kan itthek tuk hna le an kan tawlrel kho deuh rih lo. IDP pawl tawlreltu an um ko. An riantuan ning a tthawng kho rih lo le si , mi dang khua cu an bawmh pah ko cang hna tiah ka hei hnemh. Kan zaamnak khua um hna hlah seh law rawl lo in dawh kan thih lai hih tiah a nolh than.

Aw si, hi bantuk lio caan ahcun tuanvo ngeitu hna hi an buai tuk an lungre thei tuk ve ko lai, zei hmanh hi, ho cio kan caah fawi lo ee, ka hei ti. CDM bawmhnak kong zong dai dup, IDP kong zong dai dup um cu a si ve hrim lo! Tuanvo ngeitu pawl hi an khulfum maw si an dai thlan hme si! Kan mawh bak lo ti vial khin ka hei hnemh!

Atu bantukin zalon tein chimphuan zong cu democracy cu si cu! Democracy kan hmuh cun mu sumphomh in dawh kan phomh te hna lai cu ka van ti cu a mithmai a van tlang kho deuh! Kan zamnak khua nih bawmh lo cun rawl lo in pei kan thih lai hi tiah a nolh than! Credit: Ca Cung Bik