Khualtlawng Diary: Thantlang ka chuahtaknak thla hnih a si cang!

Khualtlawng Diary
==========
Thantlang ka chuahtaknak thla hnih a si cang. Hawikom le Khrihfabu ka ngai hna. Tlawnkai khawh caan um hram seh, tiah thla ka cam. Ka chungle nih khualtlawnnak ah Ks. 500,000 an ka sanction piak. Ks.300,000 in Datsi kai cawk.

“Helo, nan khua ah a ummi ralzaam ka hawile kha tlawn ka duh hna caah a ngah hnga maw? Covid Committee nih khua chung luh le riah an ka sianh hnga maw?” tiah Pastor pa ka hei hal. “A ngah ko, an ti” a ka ti caah Ruakhua tlawn ding in kai thawh.

“Tikir B ah a zaammi na nu Thlia (Pi Rem Thlia) nih ka ngaituk cang an ti, an hlam peng” tiah an ka chimh lengmang caah Tikir B ah chikhatte va pialpah kai tim. Gate hngak nih, “Tu lio cu mi zei khual hmanh khua chung luh ngah lo” a ka ti caah Sia hnar chaih bang kai let colh. Atu tiang ka siaherh peng.

Hriangkhan lei ah ka khuallam ka peh. Lampi ah ka tonmi paoh nih, “Tikir ah kan kal lai” an ka ti dih. Luh a ngah lonak Kong ka hei chimh ve hna. Hriangkhan riah a ngah lo ahcun Hmunlipi ah riah ding in kai tim. A ngah ko, an ti caah Hriangkhan ah ka riak.

Ka nu Cuai Cuai nu sinah thil kai thum. Ka dinlonak a sau ngai cangmi Premier ka din hnu in kai chawk. A paw fak pah lengmang an timi Lungtial sang ka hawipa ka hei bih pah. Zanriah ei khawh in chungkhar pumh kan ngei. Innpa nih an kan pumhpi caah sangpumh tluk in minung kan tam. Thantlang a phanmi ah kai ruat. Peng Peng te inn ah ka riak.

TBC Mino upa Pu Rual Peng (BI) le Pa Van Lal (MK) nih Puri an ka dangh. Cun, kumkhua in upa deuh tiah ka ruahmi: Pu Zung Mang te nupa (Al Hai nu le pa) le Pu Hre Nawn (Tawk Tial pa) ka va leng hna. Thantlang, Market sang ummi Hmunlipi pa nupi thitnak ah thaithawh ka ei. Cun, ka khuallam ka peh than.

Hmunlipi ka phan. Pu Tial Lian te inn ah Coffee ka ding. TBC Mino upa Nu Siang Hnem Thluai (LT) nih, “Kei zong Biakinn pumh ka ngai tuk ve cang” a ti caah a ka zulh. Hawi ka ngeih caah ka hnangam dom.

Ralzaam dirhmun in Ruakhua ah a um ve mi Rev. Hial Ling nih a kan don i an inn ah kan tlung. An kan zohkhenh ning le an kan tuammuai ning cu chimpit in a tha. Kan ilawm tuk.

Zingka ah kan Khrihfa Upa Pu Tin Tlung (SP) le kan Mino upa Thang Duh Lian (SP) te an umnak sianginn bo lei ah Saya Ling he kan kai. Hawikom le theihhngalh lawngte an rak um. Lawi pah ah midang umnak zong kan pial pah. Cun, chunhnu pumh dih ah thlanglei sianginn ah a ummi zong kan hei bih hna.

Khua chung mi le ralzaam hi kan izat an ti. An tam bak ko. Iton lonak a sau ahcun ai hngal lomi zong kan ingai dih. An ka hmuh cun an ilawm tuk. “Kan in ngaituk hna” an ti dih.

Ka tlun pah ah Lulpilung ah ka riak. TABC sang ummi Pu Ni Dun te chungkhar nih, “Kan khua na phak tung i kan inn rawl ei ta lo cu…” an ti i thaithawh ka hrawng hna. Ei khawh in ka tlung. Dam le tluang in kan khua ka phan. Bawipa, kai lawm tuk. Saya Ling, kai lawm tuk. Mah Hnem, kai lawm tuk.