Khual cazin report pek lengmang a hau than cang, zaan tim zong ah ‘khual cazin kan check lai’ tiah

Khual cazin report pek lengmang a hau than cang, zaan tim zong ah ‘khual cazin kan check lai’ tiah innchung luh hnawh in tlerh khawh nak nawl an ngei than cang tinak a si. Biaceih zung nawl peknak an ngei lo zong ah suimilam 24 cung hren khawh a si than cang fawn. An rem lomi cu an duh ning in tlaih le hren khawh a si cang tinak a si. A poi ko. Zaan tim ah minung tlaih ding mifir palek pawl an vak lengmang, Yangon ah cun inn sang mino nih zaan ah ral an ven cang. Hakha zong ah ral vengtu mino phu ser in zaan ah standby um kho ve u law hna ngam deuh ngai lai.

CDM ah aa telmi cozah riantuantu vialte rak kir cang u, rian rak tuan than cang u law tiah uknak firtu Min Aung Hlaing nih zaangfah a nawl cang hna. CDM hmual a ngeih ning result a chuak colh tinak a si.

Relchap, President Joe Biden nih ralkap renghnak kong a chimmi cu lung a hmui ngai. A chimmi hna: 1) US nih Kawlram cozah tangka billion pakhat kan chiahpiakmi hna ralkap sinah ningcang loin kan kalter lai lo. 2) Ralkap business a siah an neihniam chungkhar an siah dantatnak kan khinh colh hna lai. 3) Tu zarh chungah aho hna dah First Round dantatnak kan pek hna lai timi kan fianter lai. ,4) Kawlram cozah thathnemnak a chuahtertu pehtlaihnak kan ngeihmi kan phih lai, asinain Health, civil bu le Kawlram mipi caah thathnemnak a petu a simi paoh cu kan pezulh ko lai.m5) A dangdang dantatnak khinh chap hna ding zong in timh cia kan si.

6) Internation kan hawile pawl he kan tuan ti lai. Suu Kyi a siah President a siah a dangdang an siah thlah colh hna u. Mipi duhnak nan upat hna awk a si. 7) A donghnak a chimmi hi zei tal sawhmi a ngei hnga maw tiah theih than kan duh ngai: Ralkap inn pi kal ding in lengah motor nih a ka hngah ko; ka kal hlan ah hi bia chim ta kan duh tiah a donghter. Kawlram kong ah ralkap inn pi upa pawl he ceihmai tinak an ngei lai tiah ka beisei ngai. Credit: Luther Tin Hre

President Joe Biden Nih Kawl Ralbawi Cungah Order A Chuah Taktak Cang. President Joe Biden nih tuzan ah Kawl ralkap cungah sanction tuah dingin order a chuah taktak cang. Zei bantuk phunglam in dah an tuah hna lai timi zong a langhter dih cang. President Joe Biden zong nih Kawl ralkap nih uknak hramhram in an lakmi cu a lungtlin kho hrimhrim lo. A ran nak in Kawl ralkap nih nan tlaihmi hna Daw Aung San Suu Kyi le President U Win Myint le Democratic Leaders pawl thlah dih hna uh tiah a langhter chih.

President Joe Biden nih Kawl ralkap leaders pawl, ralkap nih an ngeihmi associates pawl, ralkap nih an ngeihmi chawleithalnak pawl le a dangdang pawl cu sanctions tuah ding ah order a chuah hi a si. President Joe Biden nih Kawl ralkap nih uknak hramhram in an lakmi cungah a ran nak in sanction lak ding cu tuzan thawk in a nun cang caah tihnung tuk a si cang. US cozah nawlngeihtu hna nih anmah le department cio in tuanvo an lak lai i, ralkap cungah hremnak an tuahmah cang hna lai ti khawh a si.

Vawleicung ramkip nih US cozah pi nih Kawl ralkap hruaitu pawl le an tuah sernak hi a sawhsawh hna lai maw timi hi ngiat cio mi thawngpang pakhat a si bantukin tutan ah President Joe Biden nih order a vun chuah taktak tikah lung a hmui tuk hringhran. President Joe Biden nih hi nak in fak deuh hmanh in tuah hna sehlaw a tha tuk ko hnga. Kawlram chung duhlonak a langhtermi ca zongah thazaang a thawn deuh hrimhrim cang lai. A poi bikmi cu Russian le China ram hi vawleicung ah a poi bikmi an si cang. Kawl ralkap uknak lakmi a dirkamhmi ram cu anmah ram hnih lawng an tang cang ti khawh a si. Cucaah, zei tik hmanh China le Russian ram hi cu vawleicung ram pumpi zong nih an huat khun te hna lai ti khawh a si.