Khuachung ah kah ti lo ding siseh tiah CNF upa kan chimh dih hna

Thantlang chuah tak dih uh tiah nawlpek ngaingai a um lo
===========
Thantlang khuapi chung kahdohnak a chuah hnu khuami a tam deuh cu an zaam i a taang mi khua hngak khuami hna zong ni 3 chung ah zaam dih ding tu in Thantlang CDF lei nih CNA nawl an hal mi tu a si tiah kan theih.

Hi kong he pehtlai in Thantlang khuami upa pakhat nih, “A biahram ngai hi cu chuah tak dih uh ti cu a si lem lo. Nizaan ruak fim khawh khan khuami a taang mi pastor le khuami hna zong meeting kan thu i, khuachung ah voi hnih an i kap cang le hliam a tuar mi 20 hrawng an si in khan CNA lei kan chimh hna.

Khuachung ah kah ti lo ding siseh tiah CNF upa kan chimh dih hna. Anmah lei zong nih an kan cohlan. A zaammi zong rak kir dih hna seh an kan ti. Ni 10 hmanh a rau lo, September 18 ah an i kap than. Hi kahnak ah kan Pastor pakhat zong a nunnak a liam. Kahdohnak a chuah than tik ah CDF lei kan chawnh hna.

CDF nih an kan leh mi cu, “Asi, atu thil sining kan zoh tik ah an dirhmun hi a dik lo. I kah rih ding dirhmun a si tik ah khuami zong kan in thloh ngam ti hna lo, nan duh cun chuak cang ko uh,” an kan ti. Hi an chimmi hi speaker on in kan dihlak in kan ngaih,” tiah a chim.

Cun, “Thantlang CDF lei nih CNA sin ah khuami dihlak nih ni 3 chung ah chuah khawh dih ding in caan kan in halpiak hna lai an kan ti. CNA lei nih chuak dih uh ni 3 chung ah kan i kap la tiah nawl an kan chuah hnawh mi zong a si lo. Thil sining le an dirhmun kan vun zoh tik ah, ngol ding a si lo ca ah kanmah zong nih ni 3 chung ah chuak dih ding in kan i timhnak hi a si. Mizapi sin ahcun nawl an chuah tiin a leeng ko lai,” tiah a cunglei khua upa nih a chimchap.

Thantlang kahdohnak ruang ah khua mi an zaam, khuahngak zong zaam dih ding in thawng an thanh. Chin Ramkulh, Thantlang khuapi chung ah hmunhma a laa i khuami hna ralphaw ah a hmangtu SAC ralkap le tangti unau CNA le CDF hna he September 7 hnu kahdohnak a chuak i, khuami thonghra leeng an zaam cang lawng si loin a taang mi zong khua chuah tak ding in nawl an chuah tiah thawng kan theih.

An zaamnak kong he pehtlai in khuami pakhat nih, “Kan zaam lai lo tiah kan rak I timh mi bak a si ko nain, kan dirhmun nih a pek ti lo ca ah kan zaam a hau cang ko. Meithal le bomb an duh ning poh in an kan hman hnawh tik ah hliam a tuar mi inn a rawk mi tampi a um. Kan dirhmun hi rak kan theihthiampiak ve hram uh. Nunnak cu a sunglawi tuk mi a si, kan inn le lo tu cu a rawh than zong ah kawlhawl khawh than a si. Cu a si ca ah nunnak him nakding hmun ah kan zaam ve hi a si,” tiah The Hakha Post ah a chim.

Cun, atu khuahngak ah a taang mi khuami cheukhat hna zong zaam dih ding in thawngthanhnak le tlangaunak an ngei tiah theih a si. Zaam dih ding timi kong ah, “Nihin September 20 thok in Thantlang cu kan chuah tak dih ko cang lai e. A dam lomi le tarnu tarpa kan fimtawl khawh in kan zam ve cang lai.

Thantlang khua mei niih a kangh lo nakding tu thla rak cam cio ko u tiah,” Thantlang khuanu khuapa Chairman Pu Lawm Bik nih a Facebook cahmai ah a langhter. NUG nih D-Day a thanh September 7 hnu Thantlang khuapi chung ah kahdohnak le tlerhkhawnnak nifatin zaan fatin a chuak. SAC ralkap lei kut in khuami hliam a tuar mi le nunnak a liammi zong tampi an um cang. Credit: The Hakha Post