Khuachia Rap Ah I Foih Hlah U!

KHUACHIA RAP AH I FOIH HLAH U
======
Inn le lo an kangh i, Thantlang inn a kangh i nan thin a pawh i miphun runvengtu hna cung i nan phunzai i nan lung aa hmuh lo ding kha i tinh in, biakinn le inn te hna mipi te hna kha an tuk an kah mi hna hi an si.

Nan phunzai i nan i mawhchiat ahcun, an saduhthah a si. A rawk ding le a kaang ding cu zeiti țha, minung nunnak hmanh pei an liam hna cu! Khuachia nihcun a hrawh khawh chung hrawh kha aa zuam ko lai.

Cucaah, mah le mah mawhchiat loin, Khuachia dohnak tu ah faak chinchinin tha chuah rih ko u. Harnak phen i Thluachuah, a harmi phen i lunglawmhnak hmu dingin, phunzai lo tein, kan tonmi kip cungah, BAWIPA sin lawmhnak bia chim pah buin, “Naisai lo,” tiin, nan lung țhawnter chinchin ko u.

Dohtu thlarau aa chok; Chinmi lakah dohnak thlarau pakhat cu aa chawh tikah mi zeimaw hna nih lam an rak phah piak len tawn! Dohnak bia a chimmi hna cu hmun kipah an vahpi ve tawn! Dohnak thlarau le a hman khawhmi minung si cu mi vanchia taktak an si! Cu bantuk mi hna caah thluachuah hmuh cu a har ko lai.

THLACAMNAK IN KHAM A HERHMI HRUAITU; Ramchung ramleng in, Chinmi hruaitu cheukhat i an kalpi ning hi an hlawhtling sual selaw, Chinmi kan ram fate cu tihin an cheu dih lai! Chin state, Senthang state, Zophei state, Lautu state, Mara state, Falam state, Tidim state, Zomi state, Matupi state, Mindat state, Palewa state tibantuk khin an țhencheu dih ko hnga!

Țhencheu awk a tlak lomi miphun, țhencheu awk a tlak lomi ram hi, zeicahdah țhencheunak khua cu kan khaan lengmang rih lai e! Miphun fate le miphun tlawmte hi kan holh le kan aw cawi tete zong va dang pah ko hna hmanh selaw, i fonh chinchin le i funtom chinchin ding kan si hna lai lo maw? Cucu hruaitu a fimmi nihcun an dirpi lai i, anmah zawn lawng aa ruatmi hruaitu hna nihcun a dirpi lai lo. Cu bantuk hruaitu hna cu thlacamnak in kham ding an si lai. BAWIPA nih kan khampiak ko hna seh.

Kan i fonh chinchin i kan i funtom chinchin khawhnak ding a si ahcun, hruaitu si lo zong ngamh hna usih. Zeicahtiah, Chin miphun mitlawmte hruaitu caah, BAWIPA PATHIAN nih a thim cangmi hna an um ko. PATHIAN nih kan miphun hruaitu caah a thim cangmi hna hruainak tangah um i anmah bawmtu si khi, zeitluk indah teinak le a dawhmi nunzia a si!

Kan ram fate le kan miphun mitlawmte hruaitu caah hin, hruaitu zeizat tam ko dah kan herh hna lai? Hruaitu tam kan in herh hna lo, BAWIPA nih a thim cangmi hna sin i, va fonh le bawmtu si hi kan herh mi cu a si.

JESUH MIN in ralrin peknak: BAWIPA PATHIAN nih a thimmi Miphun, hruaitu dingah ahodah na si? BAWIPA PATHIAN nih an thimmi na si maw? Na si lo ahcun, rak i din ko cang. Zeicahdah BAWIPA nih an țhumh theng cu na hngah lai? KHRIH Lamkaltu, Tluang Lian (Martar)