Moebye Khuapi Kahdohnak Ah SAC Ralhrang 10 Leng An Thi
=========
Shan-Kaya ramri, Pekon peng, Moebye khuapi kahdohnak ah SAC ralhrang lei in 10 naak tlawm lo an thi. Mipi ralkap in minung 6 nih hliamhma an tuar, tiah Moebye PDF nih June 17 ah cathanh an chuah.
Nizan June 16, zinglei suimilam 6:00 tlik in SAC ralhrang le mipi ralkap MBPDF – B O1, MBPDF-BO2, Loikaw PDF, KNDF-BO1< KNDF- BO3, KA, URF fonh karlak ah kahdohnak fak ngai a chuak. Cu kadohnak ah SAC ralhrang 10 leng an thi i, ralhrang nih hriamngan thazaang tam ngai an hman caah mipi ralkap in 6 nih hliamhma an tuar, tiah an langhter. Moebye khuapi ah kahdohnak a fak ngai i, tuhnu zong a fak kho rihmi a si caah mipi hna nih nan umnak khua ah kir rih hlah uh, tiah Moebye PDF nih cathanh an chuahmi ah an langhter. Thlakhat chung ah SAC ralhrang nih Moebye khuapi um mipi hna cu ṭhihphaih in an duhpaoh hriamngan an kahmi ruang ah mipi 30 tluk deng an nunnak a liam, tiah cathanh an chuahmi ah an langhter chih. KIA Ralkap Le A Nupi Tlaihhrem In A Thattu Hna Cu KIO Nih Dantatnak An Tuah Lai; Kachin ramkulh, Mohnyin pengkomh, Hopin khuapi in nichuah lei um Kachin Independence Army (KIA) Brigade 8 humhaknak hmunram chung Battalion 41 ralhmai sakhan pakhat ah KIA ralkap pakhat an thah hnu ah a nupi zong tlaihhrem in a thattu pa cu KIO/KIA nih dantatnak tuah ding timhlamhnak an ngeih lio asi, tiah Kachin News nih nihin June 16 ah a langhter. Thah a tongmi nupa hna ruak cu June 13 ah an va laak hna cang hna. A thattu hna Kyaw Tun Oo (Kum 40) zong tlaihkhih asi cang, tiah a langhter chih. "A thattu hna cu tlaihkhih asi hnu ah hlathlainak an tuah liopi a si. Amah pumpak zong nih a sualnak cu aa phuan cang. Kawl lei in a rak kaimi a si i, motor a khalh pah in rian a ṭuan pahmi zong a si. A pawngkam ah Sui he pehtlai in rian a ṭuanmi minung tlawmpal an um i, an herh caan ah motor a khalhpiak hna. Mahka hmunram hi aa chawhtuknak hmun asi caah a theih dih nawn. A thahmi hna he zong pehtlaihnak an ngei kho" tiah KIA he neihniammi mipi pakhat nih Kachin News ah a chim. Thah a tongmi KIA ralkap hi a keng ah hreitlung in voi tam ngai a tuknak hma hmuh asi pinah a nupi zong a tlaihhrem hnu ah a paw le a ṭaang ah namte in a thih hlan lo sawhnak hma hmuh a sive, tiah a chim chih. Crd; Lungmili Post