Khah; Lungretheih le Vansang hram in a um mi hna nih hi pa hi rak thei peng uh!!

Chikhat Te Cu Vun NI Ta Hna Usih!! Lungretheih Le Vansang Au In A Um Mi Hna Nih Hi Pa Hi Rak Thei Dih Uh!!
=======================================
Hi pa hi Shao Ling Li a si i, kum 30 hrawng lio ah American ah VISA a sok i Embassy ah minung paohpoah he an i thei dih hna caah hnawn a tong. Canada ram ah i thial, um dingin soknak catlap 15 a tial than ko nain a zapiin an hnawn piak dih than hoi.

China ti lei ralkap (Chinese Navy) ah i tel ve dingin soknak caa a tial than nain an hnawn piak than hoi. Software company pakhat ah a mah telin minung 124 hna nih rian an sok i minung 122 nih rian an hmuh cohlan hna i minung pa 2 an hnawn hna.

Hnawn a tong mi minung pa 2 hna laak ah Pakhat cu a mah aa tel hoi. Shao Ling Li cu lungdong lo tein China police luh dingin files pawl cu submitted a tuah than. Cu submitted mi rian a sok mi hna cu a mah telin minung 21 an si hna i, minung 20 nih rian an hmuh, an cohlan hna pinah a mah lawng an hnawn hoi.

Lungdong le lungzur loin e-marketing lei ah luh ding in aa zuam tthan i Amazon bantukin Software pakhat ser dingin aa zuam ko nain chawlehnak ah hmanawk phaisa a ngeih lo caah a nupi thilri Sui le Bank ah phaisa a cawi i, Kum caan saupi a rauh hnu ah Shao Ling Li cu Website hlawhtlinnak a hmuh lo caah a tu cu thonginn chungah a phan cang. Crd- Arkar Min Htet

Note- Cu ruangah lungretheih le vansan in kan um lio caan ah , hi pa hi rak thei peng hna usih. A mah tluk in mi vanchia cu an har ngaingai lai. A lungsau bak hih Thonginn tiang bak a phan ko. Mi vanchia taktak bak a si nan ti cio ve ko lo maw? na hmuh ning le na ruah ning comment ah rak tial ve.

Relchap,Gangaw peng Min khua mipi thilri cu SAC ralkap nih nithum chung an fir, Magway ramṭhen, Gangaw peng Min khua mipi umnak inn cu SAC ralkap nih ni 3 chung pehtlaiin an bauh i thilri an fir tiah tualchung mi nih an chim. A luancia September 24 thok in SAC ralkap le palik phufonh nih Min khuami hna ngeihmi manfak thilri, cycle le phone hna cu an i kalpi.

“Nihin September 26, ah an firmi thilri hna cu cazin khomhsuat lio a si, fiang tein kan thei kho rihlo” tiah khuami pakhat nih a chim. SAC ralkap hna nih mipi ngeihmi cycle 2 cu September 24 ah an lak, September 25 ah phone 2, phaisa bawm le Facang, Chiti hna cu an lak tiah a chimchap.

Cun SAC ralkap nih Gangaw pengkomh chung Htilin peng ah mipi thilpuan dawr in thilri hna le motor workshop in an thilri hna cu an lakpiak hna tiah theih a si.

SAC ralkap nih Magway ramṭhen, Gangaw pengkomh le Pakokku pengkomh ah rallam an sial caah khuami 3000 hrawng cu ralzaam dirhmun an phan i, ral a zaam mi hna an umnak inn cu SAC ralkap nih an khanghpiak hna, man fak thilri an fir tiah theih a si.

Wetlet peng Yuatarkyi khua ah umhmun khuarmi SAC ralkap drone hmang in doh an tong, 3 an thi 5 nih hliam an tuar. Sagaing ramṭhen, Wetlet peng Yuatarkyi (ရွာသာကြီး) khua ah umhmun khuarmi SAC ralkap hna cu September 25, chunhnu suimilam 2:00 ah tualchung hriamtlai phufonh nih drone hmang in voithum tiang kan doh hna tiah Adventure- A.S.D nih cathanh an chuah.

SAC ralkap hna nih, Yuatarkyi(ရွာသာကြီး) khua cu September 25 zinglei ah rallam sial in an luhhnawh, khuachung inn an khangh, hriamngan zong an duhnak hmunpoh an kah tiah tualchung hriamtlai phu nih cun an chim.

Cun khuami minung 70 hrawng an tlaih hna, minung 3 an thah hna caah a tubantuk in kan kahdoh hna hi a si tiah Adventure phu nih an chim. Drone hmang in kan kahdoh hna caah SAC ralkap 3 an thi 5 nih hliamhma an tuar tiah kan theih tiin Adventure phu in ṭuanvo ngeitu pakhat nih a chim. Wetlet peng Yuatarkyi(ရွာသာကြီး) khua cu inn 1000 hrawng an umnak khuangan a si i, SAC ralkap nih rallam an sial caah khuami minung 4000 hrawng an zaam, bawmhchanh an herh ngai tiah theih a si.

Tamu khua inn a khangtu SAC ralkap bomb puah an ton caah 20 hrawng an thi, Sagaing ramṭhen, Tamu khua luhnak ah a ummi khuami hna inn khanghpiak hnu ah Kalay lei ah kee in a kalmi SAC ralkap hna cu Freedom Rangers Tamu (FRT) le tualchung hriamtlai phufonh nih pa-de-ta bomb lung 4 puahhnawh in an doh hna caah a thimi 20 renglo le hliamhma tuarmi an tam tiah theih a si.

“Nihin September 26, chunhnu suimilam 2:00 hrawngah Htantapin(ထန်းတပင်) le Manmaw(မန်မော်) kar ah pa-de-ta bomb lung 4 puahhnawh in kahdoh an tong, SAC ralkap an rallam sialnak cu an lai fang in ṭhencheu an tong i a thimi an tam” tualchung hriamtlai phu nih an thanh.

” Kanmah lei nih zaan 4 hrawngah riak in le i thup in kan bawh hna i kan kahdoh hna, SAC ralkap hna cu van lei i hlorh tiang in puahhnawh an tong, kan theihkhawh tawk thawngpang ah a thimi an tam i, kut le kee bul an tam tiah kan theih” tiin hriamtlai phu nih an chim.

Putin Nih Ralkap Thar Khawh Ding Nawl A Chuahmi Ruang Ah Duhlonak A langhtertu Minung 2000 Renglo Tlaih An Tong! Russia President Putin nih ralkap thar singthum kawh dingin nawl a chuahmi ruangah duhlonak a langhter tu minung 2000 renglo tlaih an tong, tiah theih a si. Nizaan september 25 nikhat lawng ah Dagestan duhlonak a langhter tu minung 100 renglo cu palik nih an tlaih tiah, nuhrin covo lei tawlrel tu hna nih cun an chim.

Aluancia ni tlawmpal chungah Russia ram khuapi hmun tampi ah ralkap thar laknak nawl chuahmi kong ah duhlonak a langhter tu minung an tam caah suimilam 24 chung ah palik minung 700 renglo an tukvuak hna i an tlaih hna caah, kan thinphang ngai tiah, Russia nuhrin covo lei tawlrel tu phu OVD-Info nih an chim. Putin nih Ralkap thar lak ding nawl chuah hnu in Russia mino tampi hna cu ram inn pa Georgia le Finland ram hna ah an zam hna tiah, theih a si.

Myaing ah pyosawhṭi le SAC ralkap bomb puahhnawh in kahdoh an tong, captain pakhat le ṭat-kyat-kyi pakhat tiin minung 2 an thi, Magway ramṭhen, Myaing peng Kyaukkhuat (ကျောက်ခွက်) khua in a chuakmi SAC ralkap le pyosawhṭi phu hna cu nihin September 26 chun suimulam 11:50 hrawng ah bomb le hriamngan hmang in kahdoh an tong tiah theih a si.

Minung thazaang 100 simi SAC ralkap phu hna cu Myaing peng, Kyatsuaint(ကြက်ဆူအိုင့်) khuapawng ah bomb lunghnih puahhnawh an si, cu bomb puahnak ahcun ralbawi captain pakhat le ṭat-kyat-kyi pakhat tiin SAC ralkap lei minung 2 an thi tiah Myaing tualchung hriamtlai phu in Bu Latya nih a chim.

“SAC ralkap hna nih Kyatsuaint(ကြက်ဆူအိုင့်) khua inn 4 an khangh, mei khanghnak tuahkhawh in a chuakmi SAC ralkap hna cu hriamngan le bomb kan puahhnawh hna i ralbawi captain pakhat le ṭat-kyat-kyi pakhat tiin SAC ralkap lei minung 2 an thihnak hi a si, pakhat cu vawlei ah an phumtak i pakhat cu an khangh, ruah a surtuk caah mi zei deuh dah an phum cu kan zohkho rih lo” tiah a chim.

Mahtupi pengah kahdohnak a chuah caah Hpanaing le Ngalaeng khuami 1500 leng ralzaam dirhmun an phan, Chin ramkulh, Matupi peng Matupi-Hakha motor lampi Hpanaing le Ngalaeng khua kar ah SAC ralkap le Chin tualchung hriamtlai phu karah nihin September 26, zinglei ah kahdohnak a chuah caah tualchung mi 1500 leng ralzaam dirhmun an phan tiah tualchung mi nih an chim.

Hpanaing le Ngalaeng khuapawng ah kahdohnak a chuahpah lengmang caah khuami hna cu ramtang ah atu le tu tiawk in an i dor tawn tiah khuami pakhat nih a chim. ” Hpanaing le Ngalaeng khua ah SAC ralkap nih rallam an sial caan ah chikhat cu ramtang ah kan zaam, rallam sialnak an tuah tilo ti kan theih cun khuachung ah kan kir. Hpanaing khua cu khuami 900 leng an umnak khua a si i, Ngalang khua cu khuami 600 renglo an umnak khua pakhat a si” tiah tualchung mi nih an chim.

Matupi in SAC ralkap minung thazaang 50 hrawng cu Hakha peng lei an kal Hpanaing le Ngalaeng khua kar September 24 in kahdohnak a rak chuak cang. SAC ralkap nih hramhram nawlngeihnak an lak hnu Chin ramkulh ah SAC ralkap le tualchung hriamtlai phu kar kahdohnak ruang ah khua 300 leng in khuami hna cu ralzaam dirhmun an phan tiah theih a si.

SAC ralkap pakhat le palik pakhat nih Chin Defense Force -Kanpetlet Sin Ah An Hriamthil He CDM An Tuah, Chin ramkulh, Kanpetlet peng ah rianṭuantu SAC ralkap Nay Thu Aung le palik Van Ding cu CDF-Kanpetlet sin ah i fonh kan duh tiah thawng thanhnak an tuah caah, kan lak hna tiah CDF-Kanpetlet nih nihin September 26 ah cathanh an chuah.

Rikhiahnak kan tuahmi upat peknak phaisa kan pek hna hnu ah an duhnak hmun, a humhimnak hmun ah kan kalter hna tiah an thanhmi ah an langhter. CDF-Kanpetlet sinah aa fonhmi ralkap le palik nih cun G3 pakhat, MA2 pahnih, G3 kuanbawm 2, Ma2 kuanbawm 4, G3 kuan zun 28, MA kuan zun 346 le kuan kham angki zun khat an i put tiah an thanhmi ah cun an langhter chih. CDF-Kanpetlet sin ah fonh a duhmi zeibantuk ralkap paoh lunglawm tein kan in don ko hna tiah Chin Defense Force -Kanpetlet nih September 26 ah cathanh an chuah.

Ayeyawady tiva ah phaisa khawltu SAC ralkap kahdoh an tong, ralbawi pakhat telh in minung 5 an thi, Sagaing ramṭhen, Watlat peng Shingmaka(ရှိမ်းမကား) palik sakhan in SAC ralkap hna cu Ayeyawady tiva ah mipi hna sinah hramhram phaisa an kholh lio ah kahdoh an tong i ralbawi pakhat telhin SAC ralkap 5 an thi tiah theih a si.

Cu SAC ralkap hna cu Tawkyi Muaipuai(တောကြီးမြွေပွေး) phu le Shwebo pengkomh battalion 17 hna nih nihin September 26, zinglei suimilam 6:00 hrawngah an kahdoh hna hi a si tiah theih a si. Kahdohnak chungah SAC ralkap bo khat Aye Win Htun, Kyaw Win Htun, Si Thu Maung telh in palik le ralkap 5 an thi i, hliamhma tuarmi zong an um tiah theih a si.

KNLA Le Ṭangṭi Phu Nih SAC Ralkap Motor Bomb An Puahhnawh Caah A Tlawm Bik Ralkap 4 An Thi, Mon ramkulh, Tathone(သထုံ) pengah SAC ralkap motor cu KNLA ṭangṭi phu hna nih bomb an puahhnawh caah SAC ralkap a tlawm bik 4 an thi i hliamhma pumi an tam, tiah theih a si. A luancia September 22 zaan sml 8:30 ah Tathone in Bilin lei a kalmi SAC ralkap motor cu, Karenlay Seih(ကရင်လေးဆိပ်) khua pawngah KNLA Battalion 2 le PDF Companny 3 hna i bawm in bomb lung 2 in an puahhnawh caah motor 2 a rawk dih. SAC ralkap 4 an thi i 3 hliamhma an pu, tiah theih a si.

September 24 zaan sml 9:08 ah SAC ralkap motor run cu Tathone peng Kamasai(ကမာစိုင်) khua pawngah KNLA le ṭangṭi phu hna nih bomb lung 3 in an puahhnawh ṭhan hna caah SAC ralkap motor 4 a rawk. Ralkap a thimi le aa hliammi an um ko nain fiang in theih a si lo. Zan sml 10:00 hrawng ah mizaw phorhnak motor 5 nih, SAC ralkap a thimi le aa hliammi cu a lak hna, tiah PDF ralkap pakhat nih a chim.

N.Korea Nih Missile A Hneksak Hnu In US le S.Korea Raltuk Cawnnak An Ngei, September 25, ah North Korea nih Missile hneksaknak a tuah hnu in, US le South Korea ralkap hna nih kumnga hnu ah a voikhatnak raltuk cawnnak cu Korea rili ah nihin september 26 ah tuah a thok tiah, theih a si. US cu South Korea i a biapi bikmi a ram humhimnak ah a hawikom ram a si i, Nuclear hriamnam a ngeimi N.Korea kut in S.Korea a vengtu ding ah US nih S.Korea ah a ralkap 28500 a chiah hna.

S.Korea President hlun Moon Jae-in chan in N.Korea le S.Korea palai i pehtlaihnak cu caan saupi a cah hnu ah, US raltuk cawn tinak tam deuh kan tuah lai tiah, President thar Yoon Suk-yeol nih cun a chim. North Korea tlerhkhonhnak cu lehrulhnak ah US le South korea ralkap hna cu raltuk cawn tinak kan ngeihnak hi a si tiah, S.Korea ralkap nih cun an thanh. South Korea chaklei rili ah tuahmi nili chung raltuk cawn tinak ahcun, raltuknak tilawng 20,Raltuknak vanlawng le submarine tilawng hna je cawnnak kan ngei tiah, an cathanh chung ah an langhter.

Ukraine Tuknak Ah Nuclear Hmang Lo Ding In US Nih Russia Ralrin A Pek! Ukraine cu Nuclear hriamnam in na tuk a si cun Russia nih a fakmi harsatnak na ton lai tiah, US President Biden National Security Advisor Jake Sullivan nih cun a chim. President Putin nih Nuclear hriamnam hmang ding in nawl a pek hna ahcun President Biden nih cun a rannak in lehrulhnak ka tuah lai tiah, Russia tuanvo ngeitu hna cu kan chimh cang hna tiah, a chim chap.

Russia nih Nuclear a hman si ahcun US nih lehrulhnak kan tuah dingmi fiang tein kan chimh ko cang caah Putin nih a theih fian ko lai tiah kan ruah tiah,National Security Advisor nih cun a chim. Thla 7 a rau cangmi Ukraine raltuknak cu Russia ralkap cu Ukraine ralkap nih an van nawr deuh hna caah President Putin nih cun Ukraine do ding in ralkap thar singthum kawh ding in nawl a chuah, Ukraine tuknak ding ah Nuclear hriamnam hman khawh kan si tiah, Putin nih cun kan hnuzarh ah a chim hnu in a tubantuk in US nih lehrulhnak a van tuah hi a si.

Tilian Harnak A Tongmi World Bank Nih Billion 2 Renglo Bawmhnak A Pek Lai! Pakistan ram ah dongcat loin ruah a sur caah tilian a chuak i minung thong tampi nih harnak an ton caah World Bank nih US dollars 2 billion renglo bawmhnak kan pek lai tiah, an thanh i tu tiang bawmhnak a pekmi chung ah a tambik a si.

Pakistan ram tukum tilian ruangah minung 1600 renglo an thi i minung 13000 hrawng hliam an tuar, minung a sing renglo nih inn lo an chuahtak i inn singkhat reng lo le mawtaw lam tampi cu tilian nih a rawk tiah, theih a si.

South Asia World Bank Chairman Martin Raiser cu Pakistan ram ah a tlawn hnu in a tubantuk in bawmhnak pek dingin biakhiahnak a vun tuah hi a si. “Tilian ruang ah inn lo a rawkmi hna le harnak a tuarmi hna kan in tuarpi hna, harnak a tuarmi hna bawmhchanhnak dingah ramkomh cozah le ramkulh cozah hna he i bawm in kan tawlrel cuahmah tiah, Martin Raiser nih a chim.

Tilian a fahbiknak Pakistan thlanglei Dadu hmunhma hna ah Martin Raiser cu a va tlawng i Ramkulh Chief Minister le Ramkomh Minister hna he zong tonnak an ngei, tilian ruang harnak a tongmi hna cu thlam an sak piakmi ah an um i ngat-phia(ငှက်ဖျား) zawknak a um caah minung 300 renglo an thi cang tiah, National Natural Disaster Management nih an thanh.

Motor Rawk A Remh Liomi SAC Ralkap Cu PDF Nih An Kah Hna Caah Ralkap 8 An Thah Hna, Meithal Le Thilri Tam Ngai An Lak, Sagaing ramṭhen, Chaung U peng Monywa-Mandalay lam ah bomb puahhnawh a tongmi thilri chantu motor cu, SAC ralkap nih an remh cuahmah lioah kan kah hna i, ralkap 8 an thi. Meithal le thilri tam ngai kan lak, tiah Chaung U PDF nih cathanh an chuah.

Nizaan September 25 ah Sagaing in Monywa lei a kalmi SAC i riahcaw le thilri chantu SAC ralkap motor cu, Chaung U PDF Companny 4 nih Chaung U le Khinmun(ခင်မွန်) khua karah bomb kan puahhnawh hna i, motor 1 a rawk tiah Chaung U PDF nih an langhter.

SAC ralkap nih motor 2 an remh lioah Chaung U PDF Companny (1), (4 ) le Chaung U Pah Kah Phah in ralkap 4 nih kan va kah hna i, Khinmu ah hram bunhmi Nah Mah Khah in SAC ralkap 1 telh in ralkap 6 kan thah hna pinah SAC ralkap 2 a nung in kan tlaih hna, tiah Chaung U PDF nih an thanh.

Tlaih a tongmi SAC ralkap 1 cu lam tanṭim ah a thi i, a dang ralkap 1 cu sii thlopbulnak an tuahpiak tiah theih a si. Ralkap 2 sinin BA-72(G1) zun 1, MA-3 zun 1, BA-94(Uzhi) zun 1, 7.62 kuan 20, 5.56 kuan 26, 9mm kuan 15, nam 1, Mytel Kepay 1 le walkitalki 1 cu PDF nih an lak.

India-Myanmar Ramri Ah Rithaisii Tlang Sing 5 Leng He Nu Pakhat An Tlaih, India -Myanmar ramri Mizoram ramkulh, Champhai pengkomh Melbauh khua ah lungthin molhternak(methamphetamine) sii tlang sing 5 leng cu, Mizoram palik le Assam Rifle hna i bawm in an tlaih, tiah theih a si.

Zokhawthar ah umhmun khuarmi palik le Assam Rifle nih a hlankan in thawng an theih caah India-Myanmar ramri in a kalmi motor hna cu Melbauh khua ah checkhlatnak an tuah hna i, lungthin molhternak sii tlang sing 5 leng cu September 23 ah nu pakhat sinin an tlaih, tiah theih a si. Rithaisii an tlaihmi cu rupees sing 1,600 leng man a si i, Mizoram ramkulh chungah rithaisii kan tlaihmi vialte lakah a tam bik a si, tiah an langhter.

Rithaisii he an tlaihmi nu cu Zokhawthar palik sakhan ah September 24 ah an ap i, taza an cuai tiah theih a si. A luancia September 22 lio zong ah Champhai pengkomh Tuipui khua ah Mizorma palik nih, thilphor motor pakhat cu checkhlatnak an tuah i, lungthin molhternka sii tlang sing 1 leng he India rammi pa pathum an rak tlaih cang hna.

Myinmu Peng Ah Rallam A Sialmi SAC Ralkap Cu PDF Ṭangṭi Phu Nih Bonb An Puahhnawh Hna Caah Ralkap 2 An Thi, Sagaing ramṭhen, Myinmu peng ah nizaan September 25 chun ah SAC ralkap riahcaw le thilri chantu ke 12 ngei motor 6 cu, PDF nih bomb kan puahhnawh hna caah motor pakhat a rawk dih. Anmah bawmh dingin a kalmi SAC ralkap pawl cu bomb kan puahhnawh ṭhan hna caah SAC ralkap 2 an thi, 5 hliamhma an pu tiah CDSOM nih cathanh an chuah.

Sagaing in Monywa lei a kalmi SAC ralkap ke 12 ngei motor 6 cu, Myinmu peng Kwepintaw(ဂွေးပင်တော) le Bumin Kyikin(ဘိုးမင်းကြီးကင်း) khua karah CDSOM le ṭangṭi phu hna nih, nizaan September 25 chun sml 12:20 ah bomb lung 10 in an puahhnawh hna caah motor pakhat cu a rawk, tiah theih a si.

Tutan kahdohnak ah CDSOM thalpak phu, CDSOM nichuah lei 012 le 007 phu, Myaung Women Battalion-M2W, Black Eagle Defence Force – MMU PDF၊ Myinmu Civil Revolution Force – CRF Myinmu၊ People’s Defence Force Myinmu -MMU le Myinmu Electric Guerrilla phu hna i bawm in an kah hna, tiah theih a si.

Kyauktaw Ah Umhmun Khuarmi SAC Ralkap Nih Hriamngan An Kah Caah Kum 7 Ngakchia Pa Pakhat A Nunnak A Liam, Rakhine ramkulh, Kyauktaw peng Nagaya(နဂရာ) khua ah SAC ralkap nih nizaan September 25 zaan sml 11:00 hrawngah hriamngan an kah i, hriamngan kuan nih kum 7 ngakchiapa pakhat a khen caah a nunnak a liam, tiah khuami hna nih an chim. Nagaya khua in khalei ral a ummi Kyauktaw Sah Kah Khah 9 in SAC ralkap nih zanṭim ah hriamngan le hriamhme an kah tuk caah hriamngan kuan cu Nagaya khua chungah a tla i, ngakchiapa pakhat a nunnak a liam hi a si, tiah theih a si.

Min langhter a duh lomi pakhat nih, “Zaan sml 11:00 hrawng in SAC ralkap nih hriamngan an kah i, aa hngilh liomi ngakchiapa hna an inn a khen caah ngakchiapa te cu zaan sml 11:18 hrawng ah a nunnak a liam. Mi bawmchantu zong kan chawmh ko hna nain, kan ra ngam rih lai lo, tiah an kan ti. Sii-khan zongah kan kalpi ngam lo. Hriamngan kuan nih a khen hnu sml 3 hrawng ah a nunnak a liam,” tiah a chim.

A nunnak a liammi ngakchia pate cu Ko Naing a si i, nihin September 26 ah a ruak an vui lai. An inn zong a rawh dih pinah pa pakhat zong hliamhma a pu, tiah theih a si. A luancia September 20 lio zong ah SAC ralkap hriamngan kuan cu Nagaya khua chungah a rak tla i, minung 4 hliamhma an rak pu cang.

Matupi Khua Ah Sianginn Kaimi Siangakchia Pa Pawl Cu SAC Ralkap Nih Checkhlatnak An Tuah Hnu Lawngah An Luhter Hna, Chin ramkulh, Matupi khua chungah sianginn kaimi siangakchia pa pawl cu, nihin September 26 thok in tangnga riin a cunglei pa pawl cu, sianginn tualchung an luh hlan ah SAC ralkap nih checkhlatnak an tuah dih hna hnu lawng in sianginn chungah an lut kho, tiah theih a si.

“Tangnga in a cunglei pa paohpaoh cu an check hna. A bik in an zal, cauk, kunpabu(ကွန်ပါဗူး) le rawl an i rawnhnak thaminceih hna an checkpiak hna,” tiah Matupi khuami pakhat nih a chim. Matupi khua chungah SAC nih nawlngeihnak an lak hlan bantukin siangakchia an tam lo caah No.1 B.E.H.S sianginn le No.2 B.E.H.S sianginn lawng an hun khawh. Sianginn kaimi siangngakchia hna cu a leng ah chunchuah in rawl einak nawl an pe hna lo i, rawl an rawnhter hna, tiah theih a si.

Matupi khua ah Non CDM Zunguk bawi Assistant Director Win Aung Cu Thi Kai Zawtnak In A Thi, Chin ramkulh, Matupi khua chungah SAC kuttang rianṭuantu District Administration Department in Assistant director Win Aung(54) cu, September 24 zaan ah thi kai zawtnak in Matupi sii-inn ah a thi, tiah tualchung mi hna sinin theih a si.

Win Aung cu SAC nih nawlngeihnak an lak hnuin Matupi khua ah rian a ṭuantu a si i, thi kai zawtnak a ngeimi a si. A zawtnak cu kawl lei ah i zohter dingin timhtuahnak a ngei ko nain, CDF ralkap hna ṭih ruang le thah ding ṭih ruangah a kal kho lo i, atu bantukin a thihnak hi a si, tiah tualchung mi hna nih cun an chim. Matupi pengkomh zung (Htuai OH zung) ah Assistant Director dirhmun cu bawi changtu dirhmun in rianṭuan tu a si i SAC ralkap duh ningij thil kalpi ai zuam tu an si.

Mingalardone Motor Pahsualnak Ah SAC Ralkap 3 An Thi I, 6 Hliamhma An Pu, Yangon ramṭhen, Mingalardone(မင်္ဂလာဒုံ) peng Kyeikkaleh(ကျိုက်ကလဲ့) pawng ah motor pahsualnak a um i, SAC ralkap 3 an thi, tiah tualchung mi hna sinin theih a si. Nizaan September 25 zan sml 10:00 hrawng ah Hiject motor le SAC ralkap citmi civil motor pakhat cu, hmaitonh in an i pah caah SAC ralkap 3 an thi i, 6 hliamhma an pu tiah theih a si.

“Motor pah nakin a thimi SAC ralkap 3 le hliamhma pumi 6 kong cu, ralkap nih thawngpang an langhter duh lo. Motor pahsualnak ah aa telmi SAC ralkap pawl cu an dihlak in uniform an i hruk lo, mi sawhsawh bantukin an um. An motor chungah meithahnak thilri le pehtlaihnak seh hna a um,” tiah tualchung mi pakhat nih a chim. Mingalardone peng, mi bawmchantu phu pakhat nih a thimi 3 cu SAC ralkap an si i, hliamhma pumi 6 hna cu checkhlatnak kan tuah cuahmah hna, tiah an langhter.

CDF Matupi Nih SAC Ralkap 4 An Thah Chap Hna, 8 Nak Tlawm Lo Hliamhma An Pu, Chin ramkulh, Matupi peng ah CDF Matupi le SAC ralkap kar kahdohnak a chuak ṭhan i, ralkap 4 kan thah hna, tiah Matupi CDF nih cathanh an chuah. Matupi le Ngalaeng khua karah nizaan September 25 zing sml 8:30 in 11:00 leng tiang kahdohnak a chuak i, SAC ralkap 4 an thi, 8 nak tlawm lo hliamhma an pu. Kanmah lei in Matupi CDF ralkap 1 hliamhma fak ngai a pu, tiah an langhter.

Matupi CDF le SAC ralkap pawl cu September 24 in kahdoh hram an thok i, Matupi khua ah hram a bunhmi SAC ralkap Khah Lah Yah 140 Battaliin in Matupi-Hakha lam ah hmunhma thianhhlimnak a tuahtu SAC ralkap pawl cu September 24 ah Matupi CDF nih kan rak kah hna caah SAC ralkap 3 an thi, tiah Matupi CDF nih cathanh an chuah.

Chin Ramkulh Construction Zung lutlai Pu Tha Peng le a Nupi An Zaam, Chin ramkulh, Hakha khualipi ah a um mi ramkulh construction zung lutlai Pu Tha Peng le a nupi cu SAC ralkap nih an tining le an rian fialmi a in khawh ti lo caah an zaam tiah theih a si.

August 31 ni zinglei suimilam 2 tluk i construction zung quarter chungum inn a kanghnak kong le riantuan tu an tlaunak kong he pehtlaiin tuanvo ngeitu na si tiah an ti caah Hakha palik zungah SAC ralkap lila nih Pu Tha Peng cu tazacuai an si, cu hnu tlawmpal ah a tubantukin an zaam hi a si tiah theih a si.

“Inn a kangh mi le vuanthan minung an tlau mi he pehtlaiin tuanvo ngeitu bik a simi CE Tha Peng cu palik nih taza an cuai, an auh i biahalnak an ngeih, cu lawng siloin Chin ramkulh chung hriamtlai CDF lila nih ralrin pek canbg mi a si, cuti cun a karlak ah ai tlum ti lo i an zaam,

CDM kan lut tiah cun an ti lo nain SAC ralkap cozah fialmi a tuah ti lo caah CDM bantuk a si ko ti khawh a si hnga” tiah Chin ramkulh SAC chungtel pakhat nih a chim tiah theih a si. Zung lutlai bik CE Tha Peng a um ti lo caah a changtu a simi DSE Kyaw Min Htun tuanvo pek in rian an tuan ter cuahmah lio a si. Crd-The Chin Post