ISIS Nih Russia Ram Hlasaknak (Concert) Hmun An Kah, 60 Leng An Thi, 150 Hrawng Hliam An Tuar. Russia ram Moscow khuapi pawng hlasaknak (concert) hmun cu ISIS nih March 22, ningani (Friday) zaan ah an kah i 60 leng an thih pin ah 150 hrawng hliam an tuar tiah theih a si.
Hlasaknak an tuahnak hmun cu Crocus City Hall ah a si i hla an sak lio ah ISIS hi a thli tein an lut i meithal in an kah hna, cun bomb zong an puah tiah Russia media hna nih an ṭial.
Hi thil a can ka ah cun misual hna hi ahodah an si ti theihhngalh a si lo nain tlawmpal a rauh hnuah ISIS nih kanmah tuah mi a si tiah an thanh colh. Cucu US Intelligence hna nih zong a dik ko tiah an fehter.
Moscow khuapi uktu (Mayor) Segei Sobyanin nih “hi thil hi a fak tuk mi ngaichiatnak (huge tragedy)” a si tiah a chim. Cun Russia president hlun le atulio i Security Council of Russian Federation ah hotu a si mi Dmitry Medvedev nih cun “hi thil hi Kiev cozah he aa pehtlai ti kan theih, cucaah Ukraine mi vialte cu kan hawl hna lai i kan hrawh dih hna lai, an cozah hruaitu hna zong” tiah a Telegram ah a taar.
Asinain Ukraine President Volodymyr Zelenskyy nih cun ISIS nih Russia hlasaknak hmun an kah mi ah Ukraine mi pakhat hmanh an i tel lo, an i pehtlai lo lo tiah lehnak a tuah ve. The Chin Post