Khah!! Dr. Sa Sa nih a si kho rih lo tuk mi bia a chim hoi cang hih!!

Dr. Sa Sa Nih SAC Ralhrang Pawl An Sung Cang, A Ti!!
======================
Sahrang Min Aung Hlaing le a hnu zultu a mah komh pawl cu an sung cang tiah, Dr Sa Sa nih a chim. September ni 23 ah tuah mi CDF-Tonzang caah phaisa kawl piak nak online Fundraising ah a tu bantuk in Dr. Sa Sa nih a chim nak hi a si.

“Min Aung Hlaing le a mah komh pawl cu an sung cang. An caan, tam an ngei ti lo (An caan tam a tang ti lo). An ni a liam cang. A kung a thi cang mi thingkung an si cang. A rauh hlan ah an hnah pawl cu an tla (til) dih cang lai. An duh le duh lo zong ah, cu cu an mah i an hmai lei cu a si.” tiah a chim.

A tu ah Sagaing ramthen le Magway ramthen ah Lam-mah-kyi hna i 80% leng cu mipi ralkap phu hna nih an uk khawh cang i SAC ralhrang an kal lam cu uk khawh loin cung lei in kahdohnak an tuah, ti zongin a chim chap.

Relchap, (Gangaw peng ah SAC ralkap nih an khangmi khua 8 ah pengkulh zatlang ukhruainak phu nih sing 80 bawmhnak an pek hna, Magway ramṭhen, Gangaw pengchung ah SAC ralkap nih inn an khangmi khua 8 in ralzaam mipi hna caah tiin,Gangaw pengkulh zatlang ukhruainak phu nih nizaan September 24 chun suimilam 11:00 hrawngah bawmhnak an va pek hna tiah theih a si.

Thaehlaw(ထယ်လှော်) khua, Mauk(မောက်) khua, Mauk Lin(မောက်လင်း) khua, Kyaw(ကျော်) khua, Shwetaung(ရွှေတောင်) khua, Myinza(မြင်းဇာ) khua Lapuh(လာပို့)khua le Yuasi(ရွာစည်) khua in ralzaam hna caah sing 80ks leng kan bawmhchanh tiah Gangaw pengkulh zatlang ukhruainak phu in chim phuannak nawl ngeitu nih a chim.

“Khuachung inn khanghpiak an tonnak kong pehtlaiin anmah he aa pehtlaimi vuanci zungah theihternak kan tuah, kan hmuhmi phaisa in bawmhnak kan pek hi a si. A voikhatnak mei khanghpiak a tongmi khua 4 cu chungkhar pakhat ah 35,000ks cio bawmhchanh an si, bawmchantu dang an um rih caah 10,000ks cio chap ṭhan an si.

Cun a dang khuali cu chungkhar pakhat ah 30,000ks cio bawmhchanh an si” tiah a chim. Cu lengah Chiti cuai 67 le Facang zong bawmhnak pekmi an um tiah a chimchap. A tutiang ah cu ka khua hna in cun ralzaam dirhmun a phanmi dihlak 3,000 tluk hrawng an si i, eidin le umnak thilpuan kongkau ah harnak an tong ngai tiah theih a si.

Khuapau dohthlennak chungah Demoso PDF chungtel 39 nunnak a liam cang, Khuapau dohthlennak chungah Demoso tualchung hriamtlai phu PDF in minung 39 nunnak a liam cang tiah theih a si. Karenri ramkulh, Demoso peng tualchung hriamtlai phu DMO-Local PDF le SAC ralkap kar ah kahdohnak voi 156 a chuak i, kaphnih kar kahdoh a chuah hramthok in August thla tiangah tualchung hriamtlai phu chungtel minung 35 nunnak a liam cang tiah theih a si.

Cun September 9 in September 25 tiang ni 16 chungah tualchung hriamtlai phu minung 4 an nunnak a liam ṭhan caah, nunnak liammi dihlak hi 39 an si. Nunnak liammi tualchung hriamtlai phu hna chungkhar nih an tuar i an ngaihchiat bantuk in, kan in tuarpi ve hna, SAC ralkap an hram a cahkhawhnak ding caah nunnak petu mipi ralkap dihlak upatnak kan in pek hna tiah Demoso peng hriamtlai phu DMO – Local PDF nih cathanh an chuah.

Myawady-Wawlay kahdohnak in SAC ralkap chungtel ṭat-kyat pakhat CDM a tuah, KNU brigade 6 hmunram, Myawady-Wawlay lampi kahdohnak hmun in SAC ralkap chungtel ṭat-kyat pakhat nih CDM cawlcanghnak a tuah tiah The Vpice Of Spring nih nihin September 25 ah an langhter.

KNLA, Cobra Column le SAC ralkap kar pehtlai in kahdoh a chuahnak Myawady-Wawlay lampi ah rallam sialtu SAC ralkap khah-mah-yiah(104) battalion in ṭat-kyat Myo Aung cu September 24 ah mipi lei ah ṭang in CDM cawlcanghnak a tuah tiah an langhter.

CDM a tuahtu ṭat-kyat Myo Aung nih ” thihthih nun nun in CDM ka tuah, midang SAC ralkap hna zong CDM tuah duhmi an um len ko. CDM tuahduhnak lungthin cu an ngei ko nain, caan nih a pek rih hna lo caah an tuah khawh rih lo bia a si” tiah a chim. Myawady-Wawlay lampi kahdohnak cu a fakngai i, SAC ralkap lei a tjimi le hliamhma tuar an tam leng ah, SAC ralkap sinak cu chuahtak in mipi lei ah a ṭangmi ralkap an karh tiah theih a si.

Mon ramkulh ah nikhat chungah SAC mawtaw voihnih bomb puah hnawh an tong, 20 leng an thi, Mon ramkulh Thaton peng le Thanbyuzayat peng ah nizaan September ni 24 nikhat chungah SAC ralkap mawtaw voihnih bomb kan puah hnawh hna i 20 leng an thi tiah Taungnyo PDF nih cathanh an chuah.

Thanpyuzayat peng in Yee peng ah a kalmi SAC mawtaw 10 cu kan bawh hna i bomb kan puah hnawh hna caah SAC ralkap 20 leng an thi, SAC ralkap nih duh paoh in hriamngan an puah ruangah tualchungmi nu pakhat hriamngan kuan khen nak in a nunnak a liam tiah an cathanh ah cun an langhter. A luancia september ni 23 lio zongah Thaton pengah KNLA le tualchung PDF phu fonh hna nih SAC mawtaw bomb an puah hnawh hna i 4 a rawk nain a thimi zat cu fiang tein theih a si lo tiah tualchung hriamtlaiphu hna nih an chim.

Khuachung inn khangtu SAC ralkap kahdoh an tong, 19 an thi, Sagaing ramṭhen, KhinOo peng Inpat(အင်းပတ်) khua inn khangtu SAC ralkap minung thazaang 100 hrawng cu tualchung hriamtlai phu nih kan kahdoh hna tiah Daung Sittae(ဒေါင်းစစ်သည်) Local PDF KhinOo in ṭuanvo ngeitu nih media ah a chim.

SAC ralkap hna nih September 24 zinglei ah meithal puah pah in Inpat khuachung khuami umnak inn cu an khanghpiak hna caah tualchung hriamtlai phufonh phu 20 leng nih drone le hriamngan, hriamhme hmang in an kahdoh hna caah SAC ralkap 19 hrawng an thi tiah a chim.

“Zinglei suimilam 6:00 hrawng ah SAC ralkap minung thazaang tampi nih meithal puah pah in Inpat khuachung ah an lut, inn 8 an khangh, mipi ngeihmi thilri an hrawhpiak hna, an duhmi an i lak lio ah tualchung hriamtlai phufonh phu 20 leng nih luhhnawh in an kahdoh ve hna, kaphnih kar i kahdohnak suimilam pakhat tluk hrawng a rau” tiah tualchung hriamtlai phufonh in ṭuanvo ngeitu nih a chim.

Cu ralkap hna cu YeeOo khua in a rami an si i, kaphnih kar kahdohnak ngol a si hnu ah minung thazaang zat ceo cu YeeOo lei ah an kir ṭhan i, cheukhat cu YeeOo pengkomh sakhan ah an lut tiah Daung Sittae Local PDF KhinOo in ṭuanvo ngeitu nih a chim.

Matupi peng Thaeboi khua SAC ralkap sakhan ummi ralkap phu hna nih khuachung mipi rawl an fir, Chin ramkulh, Matupi peng Matupi-Paletwa motor lampi pawng Thaeboi khua hrambunh SAC ralkap sakhan ah umhmun khuarmi ralkap hna nih khuachung mipi ngeihmi rawl cu an fir i an ei tiah tualchung mi nih an chim.

“Khuami pakhat hmanh an um ti lo, khuami hna inn cu SAC ralkap nih anmah ngeihmi zoh in an i zoh, kan kal takmi facang zong SAC ralkap nih an rak ei” tiah hmundang ah a zaammi Thaeboi khuami pakhat nih a chim. Thaeboi khua SAC ralkap sakhan cu tualchung hriamtlai phu nih an kahdoh caah kaphnih kar kahdohnak a chuak i, khuami hna nih an umnak inn lo kaltak in hmundang ah ralzaam dirhmun in an zaam hna tiah theih a ai.

Thaeboi khuachung khuami hna nih an i khonmi facang hna cu an kaltak caah, cu facang hna cu khuapawng ah sakhan chiah in ummi SAC ralkap nih an ei hi a si. Thaeboi khua hrambunhmi SAC ralkap sakhan cu Matupi he meng 40 hrawng aa hlat i, Thaeboi khua cu 2014 ah cazin raklak ning ah cun minung 500 hrawng an umnak khua pakhat a si.

Ukraine Buainak Cu Palai Ton In Daihnak Kawl Dingah China Nih A Fial Hna! Russia le Ukraine ramhnih kar i tuknak cu a zual lei a panhnak hnga lo palai i ton in daihnak kawl dingah UN General Assembly biachimnak ah China ramleng minister Wang Yi nih cun a chim. Ukraine buainak cu hi nak in a zual lei a panhnak hnga lo ramhnih hna nih palai tonnak ngeih i daihnak kawl ding,

ramhnih chawlehnak zong tluang tein a kal khawhnak hnga ai pehtlaimi ram paoh nih daihnak kawlpi dingin i zuam cio dingah le Ukraine le Russia ramdaihnak ser khawhnak ding ahcun zeibantuk thil tuahmi poah thazang kan pek tiah, China ramleng minister nih cun a chim chap. UN meeting ah a kaimi China ramleng minister Wang Yi cu Ukraine ramleng minister Dmytro Kuleba he zong a dang tein tonnak an ngei i, mah hi Russia nih Ukraine a tuk hnu ah a voikhatnak bik China le Ukraine tonnak an ngeih a si.

Insein thonginn in ramkhel lei thongtla 250 hmundang ah an ṭhial hna, Yangon, Insein thonginn ah ramkhel leiin thong a tlami minung 250 cu nizaan, September 24 zinglei ah Bago ramṭhen Tharyawaddy thonginn ah an ṭhial hna tiah Yangon economic university siangngakchia(Yuatarkyi hmunram) phu nih nizaan September 24 ah cathanh an chuah.

Cu thongtla thialmi hna chungah cun pa 200 le Yangon economic university siangngakchia phu(Yuatarkyi hmunram) in phaisa tlaitu Ma Yin Myat Noe Oo telhin nu 50 hrawng an i tel tiah an langhter. Ma Yin Myat Noe Oo cu phungrelnak caang poh-mah 505(a) in sual puhnak pahnih caah Insein thonginn biaceih zung nih 2022, March thla ah rianhrang ṭuan le kun 6 thongthlak dingin biakhoahnak an rak tuahpiak.

A luancia August 14 ni zong ah khan Insein thonginn in ramkhel lei thongtla minung 105 cu Magway ramṭhen, Tayat thonginn ah a rak ṭhial cang hna. SAC ralkap nih hramhram uknak an lak hnu ah Insein thonginn in hmundang thonginn ah ramkhel lei thongtla an ṭhial hna hi a voili nak a si cang tiah Yangon economic university siangngakchia phu(Yuatarkyi hmunram) nih an langhtet. 2021, February 1 hnu in SAC ralkap uk dohnak ruangah tlaihkhih a tongmi hi minung 15,607 an si cang tiah AAPP nih September 23 ah cathanh an chuah.

Palik motor le SAC ralkap motor hmaitonh in an i pah caah palik nu telh in palik 2 an thi, Training kai dingin Yamethin ah private motor he a kalmi palik phu motor pakhat cu Mandalay-Lashio lampi ah SAC ralkap motor pakhat he hmaitonh in an i pah caah palik nu pakhat telhin palik 2 an thi tiah theih a si.

Nizaan, September 24 ah Shan ramkulh Kyaukme(ကျောက်မဲ) pengkulh palik phu in nu palik Hnin Wat Yee Win le palik uktu Aung Cho Lyin nih zulhmi motor cu Mandalay-Lashio lampi Naungcho peng Bantboikone(ဘန့်ဘွေးကုန်း) khuapawng ah SAC ralkap motor he i pahnak a cang.

“Yamethin palik training school ah an kal, PDF ral an ṭih caah mi sawhsawh bantuk in a thli in an kal, lampi ah SAC ralkap he an i pah caah nu palik Hnin Wat Yee Win le palik Aung Cho Lyin an pahnih in an thi, an motor zong a sop dih” tiah Naungcho palik phu hna he naihniam in a ummi pakhat nih a chim.

Nu palik Hnin Wat Yee Win cu Yamethin palik sianginn ah training kai dingin kal aa timh caah palik bawi Aung Cho Lyin nih motor in a thlah lio ah a tubantuk thil an ton hi a si. Palik Hnin Wat Yee Win cu chungkhar he khuasa mi a si i, a pasal zong palik chungtel a si. Motor i pahnak a can lio ah motor chuugah ngakchia 2 zong an i tel tiah theih a si nain, an nun dam kong ah thil sining fiang tein theih a si rih lo.

Hpapun pengkomh chung kahdohnak ah SAC ralkap 5 an thi, motor pakhat kan hrawh tiah KNU brigade 5 nih thanh, KNU brigade 5 hmunram Hpapun pengkomh chung nizaan ah kahdohnak a chuakṭhan i SAC ralkap hna le an kuttang um ramri hngak BGF lei a thimi an um tiah KNU brigade 5 nih nihin September 25 ah cathanh an chuah.

September 24, Dweiloe(ဒွယ်လိုး) peng Wadoe(ဝါးဒူး) khua le Htupho(ထိုးဖို) khua karah SAC ralkap kuttang um BGF le brigade 5 kar kahdohnak a chuak i, SAC ralkap nih thil i chanhnak ah an hmanmi motor pakhat kan hrawhkhawh leng ah SAC ralkap 2 kan thah hna tiah an thanhmi ah an langhter.

September 23 ni zong ah SAC ralkap hna le brigade 5 kar Dweiloe peng le Mutraw Kaloe(မူတြော်ကလိုး) ah voi hnih tiang kahdohnak a chuak, SAC ralkap pakhat nih hliamhma a tuar tiah an thanhchih. KNU brigade 5 hmunram chung ah nitin ngawt in kahdohnak a chuak i, SAC ralkap lei a thimi an tam tiah theih a si.

Pyin Oo Lwin Tlawnding Ah Timhtuahnak A Ngei Nain A Khuallam A Humhimlo Caah Rikhiah Umlo In Ni An Thawn, Hramhram uknak latu SAC ralkap hruaitu Min Aung Hliang cu Pyin Oo Lwin ah tlawn dingin timhtuahnak a ngeihmi cu a khuallam humhimnak lungtlin a si lo caah rikhiah um loin a khualtlawn ni an thawn tiah ralkap lei thawngthanhnak tuahtu media cheukhat nih an langhter.

A luancia September 11 ah Min Aung Hlaing cu Russia in Myanmar a phanh hnu ah Pyin Oo Lwin tlawn aa timh hi a si. A khualtlawnnak ding lampi cu humhimnak caah hnangam a si lo caah khuaktlawn ding ni an thawnnak hi a si i, zeitik ah khualtlawn aa thawhlai theih a si rihlo tiah an langhter. Pyin Oo Lei pawng Naungcho lei ah TNLA, Mandalay PDF le SAC ralkap kar kahdohnak a chuak tiah theih a si. Crd-The Chin Post