Non CDMers Pawl Cu Ralhrang Nih Raldoh Cawnnak An Pek Thluahmah Cang Hna!
=========
Non CDMers pawl cu ralhrang nih hriamnam tlaih, raltuk thiamnak training pek in pyitusit si ding ah order pek an si nak kong cu Aug 18 ah Irrawaddy Times sin in theih a si. Mah CDMers pawl cu, a bik in kahdoh a fah khun nak hmunhma lei a um mi Non CDMers pawl cu, chun he zaan he tiah meithal an pek hna, lamton kip ah an duty ter hna, an i phazo deuh lo nak hmun ahcun ralram tiang kalter an si ko lai tiah an ti.
Chinram khualipi Hakha passport zung riantuantu hna zong hriamnam pek an si ve cang. Hakha khua zung dang tu cu hriamnam pek an si ti mi thawngpang theih a si rih lo. SAC ralhrang nih Non-CDM pawl cu ဗဟိုဝန်ထမ်းတက္ကသိုလ် (Civil Service Academy) training ah, Raldohnak le meithal hmanthiamnak te pawl an cawnpiak cang.
Nihin Non-CDM chung in a herh ahcun hriamtlai in raltu ding an si tiah thawngthanhnak a tuah tiah cozah rianṭuan chung in theih a si. Myanmar ram chung ah Civil Service Academy hi hmun 2 ah a um. Phaung Kyi ဗဟိုဝန်ထမ်းတက္ကသိုလ်(Lower Myanmar) le Mandalay peng, Zee Ping Gyi (Upper Myanmar) ah training kainak hmun an si.
Nihin Kachin ramkulh le Shan ramkulh ahcun Myanmar ram pumpi ah nifati in kahdohnak a um cang i SAC ralkap an thazang a der ngai ruang ah Non-CDM pawl raltu ding in min cazin lak in cheukhat cu ralkap training an kai ter cuahmah lio hna a si tiah People’s Spring News nih a chim.
Gangaw Peng Min Khua Palik Sakhan Cu ABSDF Ṭangṭi Phu Hna Nih An Kah. Magway ramṭhen, Gangaw peng, Min khua palik sakhan cu 2023, August 15 ah All Burma Students’ Democratic Front(ABSDF) ṭangṭi phu hna nih luhhnawh in kan kah caah SAC ralhrang nih pound 300 tluk a rit mi bomb a thlak, tiah ABSDF phu nih nihin August 21 ah cathanh an chuah.
Kahdohnak a chuah lio ah SAC ralhrang nih raltuknak vanlawng in pound 300 tluk a rit mi bomb 5 a rak thlak pinah Gangaw khuapi umhmun khuarmi SAC ralhrang pawl nih duhpaoh in an kah bawmh hna i thazaang 100 hrawng nih bawmh ding in an rat hnawh hna caah mipi ralkap lei hnulei kan tolh ṭhan, tiah an langhter. Cu kahdohnak ah SAC ralhrang kuttang palik 5 an thi i mipi ralkap ṭangṭi phu in minung 5 nih hliamhma an tuar, tiah an langhter chih.
Kahdohnak cu All Burma Students’ Democratic Front(ABSDF) No.12 Battalion, Gangaw pengkomh PDF Battalion 1, Battalion 7, Battalion 11, Battalion 12, Battalion 14, Minbo pengkomh PDF Battalion, Gangaw peng Pah-kah-phah le Htilin peng Pah-kah-phah hna fonh in an si, tiah cathanh an chuahmi in kan theih.
Naypyidaw meeting ah ralhrang bawi nih an ceihkhan mi cu a linsa ngaingai! Theihpinak Um Loin Ramdang Tangka An I Tlaih Ahcun Dantat An Si Lai Tiah Central Bank Nih An Thanh. License um loin ramdang tangka nan i tlaih ahcun ramdang tangka hmannak upadi in dan kan in tat hna lai, tiah SAC kuttang Central Bank nih nizan August 20 ah an thanh.
2014 September 30 ah an rak chuahmi ramdang tangka hmannak upadi ṭhen 15 nak ah dollar 10,000 asiloah ramdang tangka na ngeih i naa tlaih ahcun thla 6 chung lawng hman khawhnak nawl a um. Thla ruk hnu i na hman lo a si ahcun ramdang tangka hmannak nawl a ngeimi sinah zuar le Bank cazin chung ah rawn ding a si lai tiin a um, tiah SAC Central Bank nih cun an langhter.
Ramdang tangka hmannak upadi section 9 ah license a ngeimi lawng nih ramdang tangka cawkzuarnak rian a ṭuan lai i license a ngeimi lawng nih ramdang tangka in khualtlawnnak lehhmah a zuar khawh, tiah Central Bank nih cun an langhter.
Central Bank Chairman Than Than Shwe nih August 19, Naypyidaw meetting ah ramdang tangka thlen ret kong he pehtlai in social media ah thil man kai dingin ca a ṭialtu hna le a chimtu hna cu dantat dingin a rak chim, tiah RFA nih a langhter.
Nihin August 21 zing suimilam 10:30 tiang ah dollar fang khat cawk man kyats 3,700 a si i dollar fang khat zuar man kyats 3,819 tiang a phan, tiah min langhter a duh lomi Yangon um, dollar cawkzuarnak tuahtu pakhat nih RFA ah a chim.
Tharsi Khua Cu SAC Ralkap Nih A Niruknak An Khangh Ṭhan. Sagaing ramṭhen, Kalay peng ummi Tharsi khua cu SAC ralkap nih a niruknak an khangh ṭhan i inn kaang meikhu cu Kalaymyo khua chung tiang a zaam, tiah tualchung mi hna nih an chim. Nihin August 21 ah SAC ralkap nih Tharsi khua cu a niruknak an khangh ṭhan i inn zeizat a kangh cu fiang in theih a si rih lo.
Tualchung mi pakhat nih chim ning ah, Tharsi khua le Taungphilar sang hi aa hlat ngai nain inn kaang meikhu cu Taungphilar sang tiang a phan. Tharsi khuami hna cu Taungphilar phungki biakinn ah an um, tiah theih a si. SAC ralkap le pyusawhti pawl cu Tharsi khua ah an um i PDF nih luhhnawh an timh ko hna nain SAC ralkap lei an tam tuk, tiah PDF lei nih an chim.
“Nizan August 20 zanlei suimilam 3:00 thawk in Tharsi khua cu kan chuahtaak cang. A ruang cu SAC ralkap le pyusawhti an tam tuk caah kan kianh hna. Zan zong ah kan va fuh ko hna nain an tam tuk i duh paoh in an kan kah caah naih khawh an si lo,” tiah PDF ralkap pakhat nih Khit Thit Media ah a chim. Thasi SAC ralkap nih an khangh hnu in khuami hna cu khua chuahtakin an zaam dih tiah theih a si.
Kalaymyo Ah Motor License A Ngei Lomi Pa Pakhat Cu SAC Ralkap Nih A Baan Ruh Kiak Lak An Velh! Kalaymyo, Bogyoke lam Taungphilar lam ah umhmun khuar in gate a cawngtu SAC ralkap nih August 19 ah pa pakhat cu motor license a ngeih lo ruangah a baan ruh kiak lak in an velh, tiah tualchung mi hna nih an chim.
Bogyoke lam ah aa chawkmi tualchung mi hna cu SAC ralkap nih motor license an chek hna i, a ngei lomi cu Kyats sing 5 -10 kar an hal hna. Kyutungpin sang um Khual Pu(kum 34) cu SAC ralkap nih motor license an chek i a ngeih lo ruangah a baan ruh kiak lak in an velh, tiah Zalen nih a ṭial. Tualchung mi pakhat nih a chim ning ah, Taungphilar lam gate hngaktu SAC ralkap hna nih phaisa an ngeih lo tikah tualchung mi hna cu a phunphun in phaisa an hal hna, tiah theih a si.
Kalaymyo Ah Driving License A Ngei Lomi Pa SAC Ralhrang Nih An Velh Caah A Baan Ruh A Kiak! Sagaing ramṭhen, Kalaymyo, Bogyoke lam, Taungphilar lam ah umhmun khuar in gate a hngaktu SAC ralhrang pawl nih August 19 ah pa pakhat cu driving license a ngeih lo ruangah an velh i, a baan ruk a kiak, tiah tualchung mi hna nih an chim.
Bogyoke lam cung ah aa chawkmi tualchung mipi hna cu SAC ralhrang nih driving license an chek hna i, a ngei lomi paoh cu tangka sing 5 in sing 10 kar an hal hna. Kyutungpin sang um Pa Khual Pu(kum 34) cu SAC ralhrang nih an check lio ah driving license a ngeih lo ruangah a baan ruh kiak lak in an velh hi asi, tiah kan theih.
Tualchung mi pakhat nih “Taungphilar lam gate hngaktu SAC ralhrang pawl nih tangka an ngeih lo tikah tualchung mi hna cu a phunphun in tangka an hal hna i an pek khawh hna lo ahcun an velh hna” tiah a chim. Credit: The Chin Post