Kha! Hrial ka duh nain ka hrial kho lo. Pastor ka si lem lo le ramkhel kong chim le tial hrial va timh kha a rak herh lem lo.

Kha! Hrial ka duh nain ka hrial kho lo. Pastor ka si lem lo le ramkhel kong chim le tial hrial va timh kha a rak herh lem lo.

2020 ‘Zu-et-e’ thimnak ah kan miphun hawi mitampi i an ‘pupu’ le ”Hranghlun Phu (GOP – Old Brand Party – Republican)’ hruaitu thenkhat le QAnon (muilangh lo profet deu bu) le zanmang manhthiam (conspiracy theorists) pawl nih Laimi tiang kan lung an kan tuaihmal, veilote ti dan in ‘tor le cheng mee firnak (mangmanh thiam bia, a tak ah a si taktak lomi, evidence hmuh lomi)’ bia khan a hun i thok.

‘Zu-et-e dimawkasi’ cu zumhtlak in ka ruah ve caah, an pupu le Hranghlun phu thenkhat le zanmang manh thiam pawl khua zoh ning khel zong in, thawngpang media le Twitter le Facebook tiang an thawngpang cu, dawi a nuam khin ka theih caah ka dawi lengmang ve. Ka rel deuhdeuh, an pupu le Hranghlun phu tthenkhat le zanmang manghthiam pawl le profet deu phu pawl bia khi biavaivuan sawhsawh, mizapi lungmolhternak a si kai fiang deuhdeuh.

‘Tor le cheng mee firnak’ si lo in, cikpak minung ‘barawh zat lo’ te khi ram phung buar in mee na pek ti tiang biaceih zung i taza va cuai lawng khi a si. An pupu le Hranghlun phu nih voi 50 deng taza cuainak an kalpimi ah pakhatte hmanh chimtlak teinak an hmuh lonak taza cuai kha ka chimmi hi a si lo.

An buai biknak Zu-et ramkulh 6 ah zanmang bia a simi ‘tor le cheng mee firnak’ tuanphung (myth) cu ramkulh cozah nawlngeitu pawl nih a dawi lengmang le Zu-et ram haotu pa caah mee pahnih tbk. a thlatu ‘putar pathum (Hranghlun phu minung)’ an va poh hna le biaceih inn ah taza cuainak ca an luhpi cang. Dimawkaretik phu minung zong anmah bantuk hin, biaceih zung ah taza cuaimi kutdong khiah zat lo an um ve. Taza cuai kip hi, phung an buar hrimhrim ti biakhiahnak a si rih lo le biaceih bawi nih bia a khiah rih lo caah phungbuar in mee an thlak hrimhrim e tiah ‘Mifir e, a cu e, a kha e,’ tiah khawment tial phung a si rih lo, lung a fim kirker ko ahcun. Cucu a si ko le mang bia an dawinak ah a lingtelet in thil an hmuhnak kong ka hun tial cuh. Credit: Salai B Chan Khar