Kawlram mipi nan thinphang hlah u

Kawlram mipi nan thinphang hlah u. Ramdang um pawl zongnih hehtiah thla kan in campiak hna i social media hmang in le a phun2 in kan in dirpi ve ko hna/kan in bawmh ko hna/kan in ttangpi hna. Kan thinlung cu nan sinah a um peng ko. Yahweh Pathian nih teinak a kan pek hrimhrim lai.

Atutan buainak le sandahpiahnak ah ka lungtling lobik mi pawl cu Trump profet le evangelist pawl, le tlangcung hriamtlai pawl hi an si. US thimnak lio vial ahcun Trump caah hehtiah bia nan chim i thla nan cam, nan ttang ning hi ti awk nan ttha lo. Atu ahcun Trum profet pawl le evangelist pawl daitthup in nan um ko hna. Thahreng chai cheih daih in nan dai ve ko. Kawlram hriamtlai vialte cu ram le miphun tthatnak caah hriamtlaih a si ko i hriamtlai phu hi 100 leng nawn cu an um men lai ka ti Kawlram chungah. Atuhi a biapi bik can a si ko.

Statement chuah le sandahpiah mi pawl hnahnawh hna hlah u ti vial lawngcu a za ti lo. Zamnak hmun kan in kawlpiak hna ti lawng zong a za fawn lo. Mifim le cathiam an tampi ve ko i hmual a nei bakmi cawlcanghnak pakhat khat tal cu an tuah ve hrim a hau cang. Phaisa Phaisa ti lawng cu a si kho ti lo. Mipi ca tthatnak tuah le rampi ca tthatnak tuah nih phaisa hal hi zul colh lengmang ve seh law a ttha tuk hnga ka ti. Atu bantuk can lio ahhin zeiti phun dah kan cawlcangh ve ah a tthat lai ti cu an theih tuk ve ko lai. Fak piin an cawlcangh ve a hau cang. Hmual a neimi cawlcanghnak tlangcung hriamtlai phu pawl sin in kan herh ve cang.

Kawlram ummi pawl zanlai le zanttim mifir mitthalo vengnak ah tiah chai le kuanti tam nawn in rak i cawk u. Cun tanbo a ttha bakmi rak i zalh fawn u. Mifir ttemttawnnak ah nylon hrihrual rak i damh fawn u. Tisa so i chiah peng u law misual a rat sual ahcun tisa so bak in teih ko hna u. A lamkip in timhtuahnak rak nei ve u. A hramthok lawng a si rih hi. Daithlang ding a si ti lo hi. Zaangfahnak le zawnruahnak a neimi an si lo khi, thongtla an chuahmi hna pawl khi. Hriphrio tein rak um u. Lungfim tein um rak i zuam hna u. Credit: Saya Van Tum