Kawlram Dothlennak (Spring Revolution) kan kalning le Ramdang dothlennak pawl he aa khahnak le aa dangnak pawl

Kawlram Dothlennak (Spring Revolution) kan kalning le Ramdang dothlennak pawl he aa khahnak le aa dangnak pawl zohchunhnak-1.
=================
Pakhatnak ah a min a lomi Arab Spring Revolution he a lawhnak le a dangnak- Arab Spring hi 2010 December thla ah Tunisia in aa thawk i cozah nih eihmuar nak a tuahmi kha mipi nih lungfahnak le ram sifahnak doh in mipi an tho (lamkam thilzuar aa that – palek nih an neknak in mipi lungfahnak aa thawk). Arab Spring ah Tunisia, Egypt, Libya, and Yemen ram cozah a hram an bongh, an thlak hna cun Syria, Iraq, Libya, and Yemen ram pawl ah ramchung ral (civil war) a tho. Tunisia ram an buai thawng in Social media (Facebook) thawng in innpa ram Bahrain ah political prisoners ramkhel thongthla pawl chuahpiak ding in an buai cun Jordan; Kuwait le Yemen ah buai an thawk ve. Egypt ram khuapi Cairo’s Tahrir Square ah an ram kum 30 a rak uk cang mi an president Hosni Mubarak rian in i phuah ding ah an hal i an thlak khawh. Egypt zong ah Syria zong ah lamzawtu mipi faklak le thi lak in an kah hna. A tawinak in chim ahcun Arab thaalcaan dothlennak nih a langhter mi cu Lamzawtu Mipi lung a rualmi mipi thazaang a thawngnak a langhter lawng si lo in atu bantuk social media (Social Network Service-SNS) tiah auhmi thawng thanhnak le mipi zalonnak duhlonak langhter nak tha- power kha a langhter. Cu tin cun Arab Thaalcan dothlennak teinak an rak hmu.

Aa lawhnak pawl cu; 1. Ralkap nawlbuar-uktu (aanashin/dictator) a hram bong lak in donak – thlaknak/teinak, 2. Hruaitu um lo mi Mipi cawlcaanghnak (CDM nak in a power tha deuh), 3. Ralkap nih zaangfahnak ngeilo in Lu ah khah thahnak, 4. Ralkap kahnak a fak tuk ruang ah Mipi an thawng chinnak, 5. Khua le ram le sang (veng) pawl nih mah le hmunma cio ah- Mah le hmun cio ah Ralruang ser, Sang kip ah uktu le uknak i ser, Mah le Bu cio thawngter, Hriamtlai pawl he i pehtlaih, Lam zawh tik ah singthongsang i bupi in zawh (kah awk tha lo in tuah), 6. Palek zung le uknak zung rawh ding in i tinh.

A dangnak- A lawh lo nak; 1. Federal Ralkap, tlangcung hriamtlai he i fonh, 2. Commando pawl le Free Rangers khahthiam pawl hlan le ttanti, 3. Khua khat hnu khua khat uknak i lak, 4. Khua khat hnu khua khat lak dih in Capital khuahlippi naih (Khuachung mipi mino + Federal ralkap + Commando Free rangers pawl i fonh) Ramchung ral thoh.

Myanmar Ram Dothlennak (Spring Revolution) kan kalning le Ram dang dothlennak pawl he zoh chunhnak -2. Hlan lio Yugoslavia (The Balkans breakup) hi vawlei pi ral WWW II dih hnu ah Ethnics miphun pa 6 fonh in rak dirmi ram a si i an president Josip B. Tito nih Communist phung in a rak uk hna i Tito a thih le communism a rawh bak ah an ram cu a rak i thenthek dih.

1991 kum ah Slovenia le Croatia nih zalonnak – independence an rak thanh. Cu Croatia lila ah ral a tho than i Macedonia ram zalonnak a hrin. Cu hnu ah Bosnia le Herzegovina republic ram zalonnak a chuah. 2006 tiang Yugoslavia cu Serbia le Montenegero nih an rak ser nain Kosovo nih Serbia in ram zalonnak a rak thanh ve i cuti cun Yugoslavia cu a rak i then dih.

Kosovo hi Serbia ram chung ah a ummi a si i 1999 kum ah UN mission in NATO ralkap nih an rak cawnh an kilven i Serbia bom a tlak i ral fakpi a rak tho. Kosovo zong 2008 ah zalon mi ram ah aa chuah. Kosovo le Kawlram dothlennak aa lawh khawhnak kan zoh ahcun; 1. Rakhine ramthen hi a ruah hlan ah zalonnak donak a chuak lai, 2. Rakhine ram chung ah Rohingya pawl nih ethnic miphun pakhat sinak le ram an hal ve lai (Malay le Indonesia le mus ram pawl nih an bawmh lai), 3. Rohingya ralkap a dangte in an chuak kho men i Rakhine chaklei ram an hal khawh, 4. Rohingya le ARSA le AA hi an i do lai maw or an i fonh lai i zalonnak an do lai maw- zeitin dah zalonnak an hal te lai, 5. Cu ve ban ramthen State kip Tlangcung miphun paoh nih hlan lio Yugoslavia bantuk in zalonnak an thanh cio lai.

Hlan lio Soviet Union; 1991 kum Christmas ni (Dec 25) hi Soviet Union puanglanng (alan/flag) a hnu bik a rak kai a si. Ukraine, Georgia, Belarus, Armenia, Azerbaijan, Kazakhstan, Kyrgyzstan, Moldova, Turkmenistan, Tajikistan and Uzbekistan ram pawl nih Soviet Union ram in zalonnak an thanh Ni a rak si. Latvia, Lithuania and Estonia zong nih republics dir ding in zalonak an thanh ve. Mikhail Gorbachev zong cu Christmas ni ah a rian aa rak i phuak.

Hlan lio Soviet Union le Kawlram dothlennak aa lawh khawhnak kan zoh ahcun; 1. Zalonnak an laknak a ruang pa 5
Political factor – ramkhel thil sining, Economic factor -sipuazi thil sining, Social Factor – Nunphun thil sining
Cun Afghan le Nuclear kong thil umtuning a rak si. Hi panga ruang ah zalonnak an lak a si i an model phun lawng si lo in Kawlram ah Panlong Hnatlaknak in ram zalon te in chuahkhawhnak secession right le self-determination le mahte lairel nawlngeih khawhnak covo hi a um cang. Ruah awk** Kawlram ah Ralkap a rawh ahcun ram fatete tampi hlan lio Yugoslavia le hlan lio Soviet Union bantuk in breakup tuah khawh a si.

Myanmar Ram Thaaalcan Dothlennak (Spring Revolution) kan kalning le Ram dang dothlennak pawl he zoh chunhnak – 3
Hong Kong Dothlennak. Hong Kong hi 1997 kum tiang British Mirang cozah nih kum 156 rak ukmi ram a si i Tuluk cozah sin ah 1997 kum ah a aap than tik ah “Ram khat, uknak phung hnih – one country, two systems” ti a si. 2019 June ah HK cozah nih Extradition bill timi “sual puhmi thonghtla” kha mainland China ah khir khawhnak upadi kha sianghngakchia le mipi nih an doh. Sep 2019 ah Hk cozah nih cu upadi cu an hrawh. Asinain an dai ti lo. Ruahmi cu Nitlaklei Western ram pawl nih Nichuahlei East ah kar an hlannak a si: (West-Indo Pacific thawngnak)

Hong Kong -Taiwan hi South China Sea (Rili) Shanghai hi East China Sea, North Korea hi Japan Sea, Myanmar, Bangladesh, India le Pakistan nih Indian ocean. Hi rili le ram pawl hi Trump nih “West Pacific power” strategy in US, India, Asia ram pawl, Japan le Australia ram pawl hi US nih China Raldai teinak le China superpower phihnak ah ramkhel a cawlcaanghnak a si. Cun China nih South China rili hi Vietnam, Malasia, Philippines , Indonesia le Brunei ram pawl in rili a cuh hna i South China Sea disputes buainak nganpi a chuahter. US fakpi aa thlah i HK, Taiwan le hi nichuahlei karhlannak ah ramkhel thazaang a chuah.

Cu lawng siloin nizaan nai ah US hruainak in QUAD timi bu dirh in US, India, Japan le Assy zong meeting an tuah.
Cucaah West-pacific lawng si lo in Malacca straits Rili lam hi China caah a biapi bik a si i an ram thil luhchuak vialte a kalnak lam a si (kum khat ah tinbaw 60,000 leng a luhchuak). India nih fawite in a phih khawh. A phih ahcun China ramchuak thil lawng si lo in ramchung hman ding zinan thawk in zei paoh a lam a phih dik lai caah Taluk nih Kawl ram hi “ka Unau -Phoh Phaw” tiah a auhnak a si Kawlram hi ke chiahnak luhchuah khawhnak le Kawlram a lai in tang i Rakhine ram in rili pemh khawhnak le Malacca rili lonh khawhnak lawng a lam a um caah zei tik chan paoh ah Kawlram a uk khawh a tei khawh ding in zungzal a bawmh peng lai. Zei cozah le zei bantuk uktu a kai zong ah a bawmh peng lai.

Kawlram a tlaih khawh lo ahcun China cu vawlei pi ah superpower a si kho lai lo i zeitik hmanh a thawng kho lai lo. China a nung khawhnak caah Myanmar a biapi tuk. Kawlram mipi dothlennak zong ah China do an thawk. China zong Ralkap lei ah a tang peng lai nain Ralkap an si kho ti lo an tla cang lai ati ahcun mipi lei zong a mer kho mi a si. Kawlram a iap/hnulei in uk (influence) khawhnak ah Zei lei poah in a tang lai. Indo Pacific raldai teinak ah Kawlram a herh. Cun vawlei ah superpower si khawhnak ah Kawlram 100 ah 100 a herh. Credit: Dr. Sui Hingz