Kawlram caah U.S hi rinhchan awk a ṭha lo. Ram dang zong rinhchan awk an ṭha lo

Atanṭim tiang lawng asilai phaan a um. Kawlram caah U.S hi rinhchan awk a ṭha lo. Ram dang zong rinhchan awk an ṭha lo. U.N zong rinhchan awk a ṭha lo. Statement an chuahmi tiang lawng asi ko lai. Cu pinlei ah zeipipa an tuah kho lai lo. Aruang cu Ralkap nih ralṭhatein hi tluk an tuah ngamnak hi a hnulei ah dirpitu China 🇨🇳 le Russia 🇷🇺 an um caah asi. Hi thil a chuah ngamnak hi an mah ram hninh ruangah asi.

Ralkap cu a lungkhong tukmi an si. 1988 le 2007 kum hmanhah thisen tamtuk a luang nain U.S siseh ram dang siseh zeihmanh an tuah kho lo. CNF/A zonghi rinhchan awk tlak in an um lo. Ralkap he ihawikom dingin le idaw dingin minthumi an si. Cucaah civil disobedience, umkheng tum le lamzawh hi teinak kan hmuh hlan tiang kalpi aherh. A kan tlaih zongah ngol lo tein kum dih thiang zong kan tuah aherh.

Cucaah ram chung um mipi nih ram dawtnak taktak thinlung le hmailei fale kong ruahnak thinlung taktak he adih tiang thazaang chuah hi aherh bik ko. Kan ibochan ko hna. Kan doh vekvek ahcun taksa in kan tuar hau ko. Chawva in kan tuar hau ko. Pawcawmnak in kan tuar hau ko. Fimnak zong kan sungh hau ko. Cun thisen le nunnak zong hi a luang i a sungh ahau kho. Ram chungmi nan biapituk! Kaam lo chuncha bangin dir caan asi.

Ramdang ummi zong nih kanmah le ti khawh tawk cio in adih dongh tiang duhlonak langter hna usih! CNLD, USDP, NLD, CNP, Hakha, Falam tibantuk iti caan asilo. Lungrual hi kan thazaang hrampi asi. Thlacam hi kan teinak hriamnaam asi. Kan kawlram caah thazaang chuah hna usih! Thlacam in Bawipa sin ah Mitthli he ṭap hna usih! Bawipa kut ah a ummi asi.

Nifatin Kawlram caah thlacam ta loin it hna hlah usihlaw. Bawipa nih kan Belkheng thawng, kan aunak aw, kan thinlung mitthli le kan thlacamnak aw kan theihpiak hram ko seh. Kawlram i a chuakmi le a ṭhangmi kan ca ahcun Ralkap kut ah Kawlram a phak ṭhan cu thinlung a kekkuai ko. Abikin next generation kan fale ca kong ruah hrim ahhin ngaihchia tuk asi.

Lam thar aa hun i kan zulh lai ka ti cuahmah lio ah ruah lo piin bomh nih kan chungkhaar in puah tluk asi. Bawipa sin ah thlacam daithlan hna hlah usih! Bawipa nih kan thlacamnak aw a theih ahcun kan caah ni ceu dawh a tlaang ṭhan ko lai. Credit: James Van Nei Lian