Kawl ralkap ralhrang he ikah tak tikah ruah awk!

Kawl ralkap ralhrang he ikah tak tikah ruah awk!
===========
Ralhrang he ikah tikah ngaihthlem in kah, cun a bawmtu phu khat an rak phan hlan ah zam tak diam. Ithup diam a hau. A ruang cu ralhrang hna hi kanmah nakin minung le hriamnam thazaang tam deuh tuk a ngeimi asi. Raltuk tintan tha tein a kaimi an si, cun ralkap minung thazaang tam deuh tuk a ngeimi an si caah kan mah lei kam ah hmapumi le a hliammi hna an tam ahcun harsatnak tampi a um kho.

Mah nakin azual kho deuh ding cu ralhrang pawl ceilak an thih/ hma an put ahcun khuapi an kulh dih lai i a chung um ngakchia, tar le khuami hna caah ei le din le sii a pit kho caah a har chinchin kho. Cucaah khuapi siloah khua he a neih tuknak ah raltuknak tuah hi mipi caah harsatnak nganpi a chuah kho. Raltuk le ral kahnak hi khuachung le khua he a neih tuknak ahcun tuah lo ahcun a tha cem.

Khua he a hlatnak hmun ah ngaihthlem in kah, siloah an ratnak lam ah bom tarh hnawh hna, i ramtang ah zam le ithup than tibantuk ralkahning hman ah a thabik kho. Hmunkhat bak ah hmunhma lak i ral he ikah ahcun puai khat ah kan dih kho. An miakpi thazaang le an minung thazaang a tam deuh tuk caah kham khawh ding an si lo.

Mipi nih bochanmi ralkap siloah raldohtu kan si khawh nakding ahcun mipi nih kan zawn an ruah ko ti an theih a hau. Mipi umnak kiangkam cawlcang peng a haumi hriamtlai dothlennak ah a si khawh chungin mipi caah a harsa tuk ding thil paoh cu hrial hi caansau caah a palh kho lo.

Mipi an temtuar tuk siloah an retheih tuk asi ahcun caansau dothlennak a kal kho lai lo. Mipi pawl thadam deuh tein an um i dothlennak zong hma a kal ve ahcun teinak hmuh a fawi deuh kho men.

Lairam hram thawng a thang, na thei ve maw? Hawi le hna, Kan laitlang Thantlang le Hakha thawng kan theih mi nih Vawlei cung Ram kip um laimi vialte kan ngaih a kan chiatter dih. Lung a fak, ngaih a chia, thin a hung, kan lungthin a zaw dih cio. Miphun dang Mirang cu si hna seh law, lungthin damlonak (mental health in an thi dih hnga, silo le an zaw dih hnga).

Sihmanh seh law Laimi cu Pathian a zum mi le a bochan mi kan si caah Pathian nih lungtthawnnak a kan pek i a ing tuar zia kan thiam deuh. Ramtha le uknak tha hmuhnak ding caah cun man lo in a ngah lo, Minung nunnak tampi a liam lai, Inn le lo thattha le thilri ngeih chiah tampi kan sungh in an lo ko lai. Sihmanh seh law a donghnak ah cun teinak kan hmuhte hrimhrim lai.

Nunnak thap in nunnak a liam mi kan miphun u le nau hna, nan takpum cu thi hmanh seh law, kan Ram le kan miphun tuan bia ah zei tik hmanh ah philh nan um lai lo. Inn le lo, ngeih le chiah, thil le ri a sung mi vialte hna; nan lung rak zor hlah uh! Pathian nih a hlan nak tha in thlua a kan chuah tthan hrim lai.

“Chin miphun hna nih hin Pathian min au bu in kan ram le kan miphun caah rian a tuan kho ve mi, vawlei cung khuaza miphun vialte hna hmai ah, Pathian nih a thim mi miphun kan si ve i kan nauta ti lo; asinatein, Pathian kan i bochan a hau; Jesuh khrih kha Bawi ah kan chiah a hau i kan mah/miphun vialte kan lung a rual a hau”. Dr. Lian Hmung Sakhong. Kan biakmi Pathian bochan bu i kan doh mi ral hi nikhat-khat cu kan tei te hrimhrim lai.

Hi bantuk caan kan Ram le kan miphun a tlawm bik ah zatuak 90% kan doh cuahmah lio i mi lungthin zornak catial hmang le biachim a hmang mi cu kan Ram le Miphun dalan nan si. Milung thawhnak le tthawnnak bia le ca kan tial duh/khawh lo ah cun dai te i kan um ah a tha deuh. Tu Lio kan Boruak lio ah cun Pu, Kio Hmung Hla hi ngeih ka cim lo. Rak ngai cio hna u.

Hitluk Lairam a dawmi pa le kan Laipa Awtha pu Kio Hmung hi a tu lio Laimi kan dirhmun ah vauruang Zunthil tlangaunak hna in a au thei kho u si law kan miphun lung a suk tuk men hnga ti ka ruat. Lairam na ngaihchia in na lungrawk hlah, na fa le nih vawlei cung khuaza ram kip in kan in dirpi ko.