Kawl ralkap nih CNF/A nan bawmh hna tiah khua bawitlang an rak tlaihtimh hna ruangah

Kai Ngaih Kho Tuk. Kawl ralkap nih CNF/A nan bawmh hna tiah khua bawitlang an rak tlaihtimh hna ruangah Sangau (Mizoram) kan chungkhar in kan rak zam i, kan khuasak chungah β€œan ttam, maien, anthur tbk” ttukttak inn kip sin le vai ralkap sin ka rak zuar lio hna ka philh lo dakaw.

Thantleng kan rak um lio i, rawl chumh awk rak um lo i, midang facang kan rak cawi tawn lio zong ka philh lo dakaw – kan coka a chiat tuk i, ruahpi sur paoh ah rawl ei thiam loin kan rak um lio zong ka philh lo dakaw. Christmas lai i, kawom rawh awk hmanh kan rak ngeih lo lio ka philh lo dakaw.

Hakha kan peem i, midang dinti hal in kan rak um lio zong ka philh lo dakaw. Thilthuam ttha deuh hmanh, tuni Denmark kai hruk ah ka siarem lo caan ah um dakaw. Tuni tiang second-hand kai hruk zong ah kai lawm peng rih dakaw.
New Delhi lio i, zan bazar ah kala (vai) nih hlonh ding timi kawpihnah ka rak char i, thawk tuk in tihang le meh in kan rak ei lio zong ka philh lo dakaw.

Lairam tangriat tiang sianginn ka rak kai chung i, cuusin le asawng ka rak kai khawh lo lio zong ka philh lo dakaw (dawtu nih free in cuusin an rak ka cawntermi zong ka philh lo dakaw). Tuni eidin chambau lo bantukin kan ummi hi Jesuh thawng, UN le Denmark cozah thawng in si timi zong kai fiang tuk ko dakaw. β€œCa ka rak thiam lo ruang i, sianginn le cuusin zong kai lo lawlaw ko” an rak ka ti lio zong ka philh lo dakaw. Tuni ahcun Jesuh thawng in cauk panga a minte khin ka chuah ve cang. Ka cauk reltu cungah kai lawm tuk. Cun, ka cauk kong biaruahnak a ka ngei dingmi Henry Nawlthangbik Hlawnceu cungah kai lawm tuk dakaw.

Mah vial kha si rih seh’ Ka nunnak ah ka zahpi lomi cu: Pathian cu Jesuh tian ka zumhmi, ka chungkhar le ka siningte hi si ko. Phorhlawt ding ai ngei lo. Ai phorhlaw ngam ding zong ka si fawn lo. Chambaunak le dernak kan ngei cio hna tihi ka zumh. Cun, vawlei minung vialte hi hohmanh nih lungtlinter dih khawh si lo. Note: Ai manhmi nih rak kan telpi ve te uhlaw. (Dec. 27, 2020), Van Nun Lian