Kawl ralkap le palik kut in rammi nunnak zeizatdah a liam rih lai

Thindomh A Si Cang, Kawl ralkap le palik kut in rammi nunnak zeizatdah a liam rih lai. Nunnak pakhat liam hmanh a tam lei a si cang ti lio ah. Do-au mibu cung ah kutthlak le tlaihkhih muisam len aa timpah cang rua, nihin in. Thin a lin deuhdeuh lai, zaangen in palik le ralkap he i tukdennak risk a sang deuhdeuh lai. Cucu thindomh (critical concerns) dirhmun a si cang lai. Dimawkaretik uknak dothlen hi a man a fak tuk timi kha hnathlam ah a thangthan. Chungkhar tlingte in aa nuam dekmak komi nun kha mitha rual nih an hrawh. Nun a liam sual ding kha phan lo awk a ttha hrim lo. Tlerhnak caah kai tinh lo, nun pakhatte hmanh ka uinak kong kha ka moral principle in langhter ka duh bia tu a si.

Cucaah, mahte nih lung i thlehnak in, a man a fak tukmi dothlennak ah an luh cio ding kha a dikmi a si, thih le nun kar, fai le nam kar, thilchia le tilet karlak ah mah nun ui lo in, ram le miphun caah nun derthawm ah va chiah khi a si. Cucaah, ramleng um nih i tel forh nakin anmahte biakhiah cung ah dirpi kha a dik deuh ah ka ruah. Fimthiamnak, chaw le va le hmur le kaa hmang in va dirpi tiang khi hmualngei cem i kan tuah khawhmi a si ko lo hlah i? Thaizing ka zenh, kiptuh ka tih, zei dirhmun ah dah kan semnak ram a phak te hnga. Thlaza camnak hi ka tuah khawh tawk a si.

Relchap, Kawl Ralkap Nih Uknak An La Thai Lai Maw? 2020 Myanmar thimnak ah tor le cheng mee diklo thlakmi a um tiah evidence tling um lo in Kawl ralkapbu nih lam an rak i sial. Ralkap lei ttang mibu thenkhat an hung au, 2020 Myanmar thimnak mee diklo timi kong cun. Min Aung Hlaing hruaimi ralkapbu nih ‘tor le cheng mee diklo’ timi le an mibu auhnak kha 2008 Phunghram hman khawhnak ah an i hman huar. Anmah sermi Phunghram kha anmah sermi puhnak bia le an mibu aunak he anmah siarem zawng in an pehtonh huar. A si khona lopi khin, 2008 Phunghram Section 417 le 418 sullam he an hun pehtonh hramhram. Section 417 i ‘rampi fehfuannak le nawlngeihnak’ a hnorsuan khotu ‘tapung thawhnak, zaangen tuknak le a dinglomi hramhram thil’ timi he khan ‘tor le cheng mee diklo’ le an ‘mibu’ auhnak kha an pehtonh huar. ‘Mibu auhnak’ khi voi ‘tampi’ a cang tiah ralkap nih an hun ti. Mah cucu, rampi buai khin sullam an hun i lak. Cozah nawlngeitu nih ‘tor le cheng mee diklo’ kong buainak an remhfel lo le ti khin ralkap nih thian an i cheh.

An zenhmi hna Suu Kyi, rampi President, Minister pawl le ramkhel hruaitu pawl an hun tlaih hna, an duh zawng in thil an kalpi khawh naklai. Cun, Phunghram Section 418 i aa tialmi rampi ‘President nih (rampi buai tonsapup thanh tik ah) ralkap Commander-in-Chief (Min Aung Hlaing) sin ah cozah nawlngeihnak, phungser (legislative) nawlngeihnak le phung (judiciary) nawlngeihnak’ a ap lai,’ timi zawn ah, Vice-President I Mint Shwe (ralkap minung) tu tuanvo an pek. Mint Shwe nih cu nawlngeihnak 3 cu Min Aung Hlaing sin ah a ap huar. Hihi anmah sermi Phunghram an kalpi lonak si dawh a lo tuk.

A cunglei an thilti nih ‘hramhram in/ puarhrang uknak lak (coup)’ sullam khen dawh a si ko. Asinain anmah ralkap nih ‘coup’ kan tuah an tinak hmuh awk a um lo, 2008 Phunghram ning in cawlcang khin an i chim. Hi nih hin, 2008 Phunghram ning in, ralkap nih thimnak an tuah lai i, rammi thimmi cozah sin ah uknak 3 kha an khirh than te hna lai maw tiah biahal tuah lo awk a ttha lo. Phunghram Section 429 ah ralkap Council nih ‘thla 6 chung ah Phunghram ning in general election’ a tuah lai, a ti. Zeidang ramchung buainak pipuam um lo ahcun, ‘cu general election’ cu, an tuah awk a si hnga. Asinain an tuah taktak ding le lo ding cu, chim ngam a si lo. ‘Ram a buai rih’ tiin thla 6 chung ralkap nih kan ukchap lai ti khawh lengmang khi a si ko rua.

Atu cu, Min Aung Hlaing kut ah uknak nawl 3 a um ko cang le Phunghram Section 420 ning in, rammi covo pakhat maw, pakhat nak tam dek, ralkap nih an hrawh chung khawh, asiloah, an chak in an rengh khawh. Khungkheng! tiah ram mibu thawh zau i, ralkap duhlonak au ding khi, ralkap duh zawng tak a si ziar sual lai tiah phang a um. Cuti rammi an au ahcun pei ralkap nih an ttih lai le uknak an thlah lai cu tiah hmuhning dang a um kho. Asinain rampi buai vima i, cu chuankhan cun, ralkap nih uknak tlaih peng lai kha a si kho mi a si lonak a um rua lo. Credit; Salai B Chan Khar