Kawl Ralkap Hi Zumh An Um Hrimhrim Lo

Kawl Ralkap Hi Zumh An Um Hrimhrim Lo. Kawlram mipi nih thimmi cozah sinah ralkap nih nawlngeihnak cu hramhram loin an lak. President Win Myint le State Counsellor Suu Kyi zong nihin tiang an hren rih ko hna. Cun, a dangdang ramṭhen le ramkulh lutlai cheukhat zong an thlah rih hna lo. Tutan ralkap nih nawlngeihnak an laknak aruang ṭha tein an langhter ve. Abik in thimnak a phi chuak an cohlan khawh lo ruangah a si. Thimfung a dik lomi a um, ‘kan kherhlai piak u’ tiah thimnak tawlreltu le tulio cozah sinah halnak an tuah nain zei ngai ah an ruah piak rua hna lo. Mah thimfung zumhlonak cu caan ṭha ah i lak riangmang in nawlngeihnak cu zankhat ah an lak ko. Rampi phunghram ning in kan cawlcang tiah ralkap nih cun an ti ve.

2008 phunghram hrim hi ralkap nih anmah nawlngeihnak a hmunh camcin zungzal khawhnak dingah an suaimi a si ko ti usihlaw kan palh tuk lai lo. Phundang chim ahcun, Kawlram democracy hi ralkap nih an phahmi lamthluan a si ko. Anmah duhning in thil a kal lo tik paoh ah nawlngeihnak lak te ding hi an rak i timhciami te a si. Tutan thil cang zong hi anmah duhning in thil a kal lo tikah chikhat teah nawlngeihnak cu an lak colh ko. Tulio ralkap nih kumkhat chung uknak tlaih chung dingin thawng an thanh i, hruaitu thar zeimawzat an thim cang hna. Anmah ralkap lawng si loin rammi mipi chungin a za an timi, NLD a do deuhmi minung an thim hna.

Aralaimi kumkhat chungah an chimning bantukin thimnak an tuah lai hi zumh a um lo ngaingai. An tuah hmanh ah, NLD party chung i mi zaza deuh pawl hi thimnak ah lut kho lo dingin an sualnak an kawl hmasa hna lai i, der dih in an tuah hna hnu lawngah thimnak tuah hi an ngamh te lai. Cuti an i timhning in tlam a tlin ahcun USDP le ralkap nih vawlei a hmuh chung nawlngeihnak an tlaih cang ko lai.

Cucaah tutan thilcang in hin biatakin ralkap uknak le an ziaza ṭhalo pawl cu a hram in phuk khawh an hau. Hriamnam ai bochanmi ralkap sing 5 fai a simi cu Kawlram mipi nuai 40 renglo nih lungrual tein a lamkip in kan doh hna ahcun an nawlngeihnak thazaang hi a dong caan a phan hrimhrim ko lai tiah zumhnak ka ngei. Doh loin dai ziar in kan um ahcun, an nawlngeihnak a hmun camcin ko lai. Zumh an um hrim lo. Credit: Biak Hmun Lian