Mipi Kan Thin A Kan Khenh Dihtu Thawngpang Chia Fonh
======================
Kachin ramkulh, Hpakanh Khua ah SAC ralhrang nih khua chung mino minung 2 cu an kahthah hna i an ruak zong an hlonh tak hna tiah khua mi nih an chim. May 5 zinglei suimilam 3 tluk ah Hpakanh khua chung Aye-miah-tha-yar sangchung lamtonnak ah thah in an ruak an chiah ta hna hi a si.
“Mino minung 2 an thah hna nak le ralhrang umhmun an khuar nak hmun hi ai hlat lo, zinglei suimilam 3 tluk ah an kah hna nak meithal thawng theih a si. Lam an i chawh nak ah an kah mi hna maw an si, silo ah an tlaih hna hnu ah an kah hna maw a si timi kan hngal fiang lo. Mino 2 zong hi mi zei an si kan hngal hna lo.
Hpakanh khua mi bawmchan tu hna nih an ruak cu lak in siizung ah an kal pi hna, SAC ralhrang nih a tukar hrawng hi pehtlai in mipi an thah ngai hna” tiah khua mi pakhat nih a chim. Mingin peng Paih-khaya khua ah May 4 chun suimilam 1 tluk ah SAC raltuknak vanlawng nih Bomb a thlak caah ngakchia 2 telh in khua mi minung 6 an thi tiah tualchung mi nih an chim.
“Athi mi chung ah ngakchia kum 4 le kum 7 tluk zong an i tel. Vanlawng a ra tiah thawng theih in khur chungah i thuh ding in an zam cio hna, Khua mi mitam deuh cu khur chungah an i thup ko, 500 lb tluk a rih mi Bomb a si caah kan him hlei lai lo tiin hmundang an zam pah ah a tu bantuk in Bomb nih a khen hna hi a si. Khua chungah kahdohnak zong zei hmanh a um lo.” tiah khua mi pakhat nih a chim.
Hi Bomb thlak nak ruangah khua mi minung 11 hliam tuar mi zong May 5 ah a himnak hmun ah an thlop bul hna. A tu lio kahdohnak ah SAC ralhrang a thi mi le hliamtuar an tam caah mipi umnak deuh Bomb thlak in aa sel caah ralrin a herh nak kong hriamtlai phu cheukhat nih mipi ralrinnak an pek hna. Shan-Karenni ramri ah ummi Taungsalong khua kahdohnak ah KNDF ralkap 2 nih ram le miphun caah an nunnak an pek, tiah theih a si.
Taungsalong khua ah umhmun a khuarmi SAC ralhrang cu May ni 3 ah luhhnawh in an kah hna caah KNDF in ralkap San Moe Kyaw le ralkap Aung Myo nih ram le miphun caah an nunnak an pek i, May ni 4 ah an ruak cu tlamtling tein kan vui khawh hna, tiah KNDF Battalion 11 nih cathanh an chuah.
Ram le miphun caah nunnak a petu ralkap San Moe Kyaw le ralkap Aung Myo hna cu upatnak sangbik kan in pek hna i, tantakmi chungkhar hna zong kan in ngaihchiatpituk hna, tiah KNDF Battalion 11 nih cathanh an chuah. Shan-karenni ramri cu February 24 in nihin tiang, thla 2 renglo chung ni fatin in kahdohnak a chuak caah eidin, Petrol, hriamthil le si-ai hna zong kan chanbau caah mizapi nih nan sikhawh tawk cio in nan kan bawmhnak lai, tiah nawlnak zong an tuahchih.
Yangon ramthen, Mawbi peng Sat-tua-daw sangchung Mucu sianginn motor chung ah kum 5 ngakchia pa pakhat cu motor chung a um theih lo in tawh an hrenh kanh caah a nunnak a liam tiah khua mi hna nih an chim. “Kan theih ningah Mucu sianginn kai mi ngakchia 3 cu an sayama le a dawngpa nih an va don hna.
Ngakchia pa pakhat nih motor chung ah tidur a philh sual i a va lak than tikah motor mawngtu nih thei lo in motor Lock a hrenh sual caah nili lak ah motor cu a um. Zanlei ah ngakchia pa a tin ti lo caah a nu nih an sianginn cu phone a chawnh hna tikah motor chung an zoh i ngakchia pa cu a rak thi cang” tiah sangchung mi pakhat nih a chim.
Ngakchia pahi motor chung ah nilinh tuk nak in a thi mi a si tiin X-ray hmanthlak he chungkhat neihniam pakhat nih Social Media ah a tar langh.
“Mucu an sayama le an pa daithlan ruang ah kum 5 ngakchia pa a thi, ngakchia pa a titsa zong mei em mi bantuk in aa rawk dih”tiah chunkhat neihniam pakhat nih a tar langh. Ngakchia pa cu an chungkhar unau chung ah a mah te lawng Pa a si i Taunggo khua ah a ruak an vui tiah kan theih.
2022 August 30 Sagaing ramthen Chaung-u pengah SAC ralhrang sin ah thawngpang petu hna tiah puh in kum tlinglo ngakchia telh in minung 7 tleihhrem hnu ah a that tu Pah-kah-phah chungtel minung 4 hna cu dantat dingin kan tawlrel lio an si tiah NUG nih May 4 ah thanh ca an chuah.
SAC ralhrang sin ah thawngpang pe tu tiah puh mi minung 7 hna cu 2022 August 8 ah Chaung-u Pah-kah-phah nih an rak tlaih hna i August 30 ah phungning lo in an rak thah hna hi a si. Hi konghe pehtlai in Pah-kah-phah minung 4 cu tualchung PDF nih 2022 August 30 ni lila ah an tlaih hna i August 31 ah an thah mi hna ruak cu an hlai than hna hnu ah check hlatnak an tuah.
Lainawng mi minung 7 hna cu 2022 September 22 ah Chaung-u PDF kut ah an chanh hna hnu ah a dang tein an chiah hna. 2023 January 26 ni in zarhkhat chung NUG cozah tuanvo ngeitu zung hna nih phungning in dandat ding in an tawlrel lio hna a si.
Mah pin ah hi tuahser nak cu NUG cozah nih a ngeih mi, mipi ralkap ukhrauinak phungphai (Code of conduct) he aa kalh mi a si pin ah nuhrin covo buar nak kong le nu le ngakchia cungah an limhang thlak le dawhcah lo in tuahsernak kongkau upadi ningin tawlrel lio le an cungah dandat nak pek mi kong zong a rauh hlan ah mipi theih in thawngthanh nak kan tuah than lai i sualnak a tuah mi poah NUG cozah nih thleidannak um lo in upadi ningin dantat an si lai nak kong cathanh chuah mi ah an langh ter chih.