SAC Ralkap Sakhan Hmun 5 cu KNLA le Ṭangṭi Phu Hna Nih An Laak
=================
June 6 Zing suimilam 4:00 in 7:00 kar ah KNLA le tangti phu hna nih KNU Kaw Htoo Lei hmunram, Mu khuakomh le Leido khuakomh chung um SAC ralkap umhmun khuarnak sakhan 5 cu an laak i, an hrawh dih lengah SAC ralkap eidin phorhnak hlei 3 zong an hrawh, tiah KNU nih an thanh. KNLA nih an laakmi SAC ralkap sakhan 5 hna cu Yedwinkung sentari hngahnak sakhan, Nattankwin Palek sakhan, Kunchaungwah nichuahlei BGF sakhan le Tadaw sakhan hna an si i, an hrawh mi hlei 3 cu Nattankwin hlei, Ungnyepyin le Nwaypyin kar hlei, Htarsi le Htarsung hlei hna an si.
https://www.facebook.com/photo/?fbid=629384635879329&set=pcb.629384665879326&__cft__[0]=AZU0QvVNbKkZFJJxrrlPoXskdz1KHXPW0dQ1yHC1eFKWXLF95rtkBy1TYKxdh__NE3VYHVQty9IriUhAjAYCXJnd1G6uObZtUXR1VUMgNq8cc_SXwzvK31ym_8HwWFLGr9Tu2fjYDVgIpGQqIDXd1jKupDaw7b7aP9toy78dJUViRDLpP32Qy1G11U7Of5931J8&__tn__=*bH-R
Kahdohnak ah hin SAC ralkap in 40 an thih pin ah 12 hliam an tuar, KNLA lei in minung 4 an nunnak a liam i, 13 an i hliam. KNLA tangti phu hna nih hriamnam zeimawzat le phaisa zong an laak, tiah KNU nih cun an thanh. KNLA le tangti phu hna cu SAC Sakhan an lak lio ah Jet Fighter in voi 3, raltuknak helicopter in voi 6 a kah hna lengah SAC ralkap nih Sittaung tiva nitlaklei in nichuahlei khua hna ah hriamngan pehtlaih in an kah.
Hriamngan kahnak ruangah KNU Leido khuakomh in khuate 6 le KNU Mu khuakomh, khuate 5 in minung 4508 cu ralhrial in an zaam hna. June 7 zing suimilam 8:15 i an hrawhmi Nattankwin hlei le Palek sakhan ah a rak phan ṭhanmi SAC ralkap hna nih, Nattankwin um khuami a zaam lomi pawl cu hramhram in an ṭhialter hna, tiah Karen National Union nih cun anmah facebook page ah an taar.
SAC ralkap vanlawng kah khawhnak point 5 hriamngan zun hnih cu kan sin a phan cang, tiah KNDF Brigade 1 in ṭuanvo ngeitu pakhat nih a chim. “Hriamnam cawknak ah sui ngun chawva a pechantu nan dihlak kan in philh hna lo. Vanlawng kahnak hriam hi kan ramkulh luatnak, Myanmar ram luatnak le hramhram uknak tang in kan luat khawh nak ding ah kan hman lai,” tiah ṭuanvonngeitu nih cun a chim.
Atu lio hi Karenni ramkulh, Pekhon le Pinlaung peng kar um Taungsalun khua ah kahdohnak a zual ngaingai, tiah KNDF ṭuanvo ngeitu nih cun a chim chap. Cu bantukin Pekhone khuapi nitlaklei Loihoi le Loilone lei ah rallam a sialmi, Hkawngi(ခေါင်းအိ) le Settaw lei rallam a sialmi le Latoe lei ah rallam a sialmi SAC ralkap pawl cu Karenni ralkap hna nih an kah cuahmah hna, tiah theih a si. A luancia May thla chung ah SAC ralkap nih vanlawng in kahdohnak voi 100 tluk a tuah i, nawlngeihnak an laak hnu ah vanlawng in kahdohnak an tuah tam bik tan a si. SAC nih nawlngeihnak an laak hnu in Karenni ramkulh chungah vanlawng in kahdohnak voi 463 an tuah cang, tiah Progressive Karenni People Force(PKPF) nih an thanh.